هەموو ساڵێک بە بەرهەمێکی شانۆیی، ژمارەیەکی بەرچاو لە بەینەران لە خۆیان و هۆڵە شانۆییەکان کۆدەکەنەوە، ئەو تیپە هونەرییە شانۆییە کە بەناوی تیپی هونەری (رەنگاڵە) لە ساڵی (1998) لە شاری سلێمانی دامەزراوە، ماوەی چەند ساڵێکە بە چەند بەرهەمێکی شانۆیی (رەخنە ئامێز) و لە هەمان کاتدا (کۆمیدیا) بەشێکی زۆری ئەو بەرهەمانەی پێکهێناوە، ئەم ساڵیش وەک ساڵانی پێشوو ئاسا، بەرهەمێکی دیکەی شانۆییان بەرهەم هێناوە بەناوی (دارستان و یاساکەی)، لە یەکەم رۆژی جەژنی رەمەزانی ئەم ساڵدا دەستیان کردووە بە نمایشکردنی، ئەو بەرهەمەش جەماوەرێکی بەرچاوی لە خۆی کۆکردۆتەوە، هونەرمەند (ماهیر حەسەن) سەرۆکی تیپی هونەری (رەنگاڵە) و ئەکتەری سەرەکی سەرجەم کارە شانۆییەکانی ئەو تیپە لە میانەی دیمانەیەکی تایبەتدا بۆ خوینەرانی “هەولێری هونەری” دەربارەی ناوەرۆکی ئەو کارە شانۆییە و کارەکانی رابردوویان و هۆکاری کۆکردنەوەی ئەو هەموو جەماوەرە لە بەرهەمە شانۆییەکانیان، بەم شێوەی خوارەوە هاتە ئاخاوتن :..
(دارستان و یاساکەی) تێکستەکەی بەرهەمێکی ناوازە و سەردەمیانەیە
هونەرمەندی ئەکتەری بواری شانۆ و دراما (ماهیر حەسەن) لە دەستپێکی دیمانەکەماندا ئاماژەی بۆ ناوەرۆکی ئەو بەرهەمە تازەیەیان کرد و گوتی : “شانۆگەری (دارستان و یاساکەی) لە دەقێکی عەرەبی وەرگیراوە، لە نووسینی (تامر العربید)، لە وەرگێران و ئامادەکردنی (د. شێرکۆ عەبدوڵڵا)ـیە، کاری دەرهێنانی لەلایەن هونەرمەند (ئەحمەد رەئوف) ئەنجام دەدرێت، ئەکەتەرانی بەشدار بووی ئەم کارە شانۆییە بریتین لە بەندە و هەروەها هەریەک لە هونەرمەندانی تیپەکەمان (ئەحمەد جۆڵا، ئاڵا عومەر، کەمال چالاک، بەهاددین نوری، زاهیر غەریب، رێبوار رەحیم، نەوزاد ئەحمەد، کامیل حمەد ئەمین)ـ و چەند هونەرمەندێکی لاوی تیپەکەمان، ئەو بەرهەمە (9)ـمین کاری شانۆیی تیپەکەمانە، کە هەموو سالێک وەرزی نمایشی کارێکی شانۆیی لەم کات و ساتەدا دەست پێدەکات و بینەرەکانمان بەسەر دەکەینەوە”.
تەنها لە یەکەم رۆژی جەژندا (1035) کەس هاتوون بۆ سەیر کردنی نمایشەکەمان
هونەرمەند (ماهیر) لەبەشێکی دیکەی ئەو دیمانەیەدا ئاماژەی بۆ پێشوازی کردنی جەماوەرێکی فراوان کرد و لەم بارەیەوە گوتی : ” ناوەرۆکی دەقی ئەم بەرهەمە وەکو بەرهەمەکانی پێشووترمان بریتیە لە ناوەرۆکێکی زۆر جوان و بەهێز لە رووی دەقەوە، هەروەها لایەنی کۆمیدیای رەخنە ئامێزی لە خۆی گرتووە، لە هۆڵی سەنتەری گەنجانی شاری سلێمانی، لە یەکەم رۆژی جەژنی رەمەزانی پیرۆزەوە دەستمان کردووە بەکاری نمایشکردنی، جەماوەرێکی بەرچاو یەکجار زۆر ئەم ساڵیش پێشوازی بەرهەمەکەمان دەکات، تەنها لەیەکەم رۆژدا (1035) کەس هاتوون بۆ سەیر کردنی، ئەم رێژەیەش لە رێگەی فرۆشتنی پلیتەکانەوە ئاشکرا کراون، ئێمە هیچ نمایشکمان بە بێ پلیت ئەنجام نەداوە، هیچ سالێێکیش بۆ هیچ بەرهەمێک بەهەمان شێوە، چونکە ئێمە هونەرمەندانی ئەو تیپە بژێوی ژیانمان و بەڕێوەبەردنی ئەو تیپە شانۆیەمان، تەنها لەسەر ئەرکی ئەو نمایشانە بووە، ئەویش لە رێگەی فرۆشتنی پلیتەکانەوە هاتۆتە دەستمان، لەهەموو وڵاتێکدا ئەو کارە دەکرێت و کراوە، باوەڕ ناوەکەم (عەیبە)ش بێت، چونکە ئێمە ئەو تیپەمان کە دامەزراندووە هیچ بودجەیەکی نیە، کەچی تیپی شانۆیی وامان هەیە لەم کوردستانە کەس نە ناوی دەزانێت و نە ناوەرۆکی کار کردنیان، ماوەی ئەوەندە ساڵە هەموو ساڵێک بەرهەمەکانمان لە سەر ئەرک و گیرفانی خۆمان بەرهەممان هێناوە و مافی بەشدابوونی هەموو هونەرمەندەکانیشمان دابین کردووە لەهەموو روێکەوە قازانجیشمان کردووە”.
لەو باوەڕەدام بەرهەمی ئەم ساڵیشمان زیاتر لە (100) رۆژ نمایشی بەردەوام دەبێت
(ماهیر حەسەن)ـی ئەکتەری شانۆکارلە بەشێکی دیکەدا ئاماژەی بۆ ئەوە کرد، هەموو ساڵێک بەرهەمەکانمان رێژەیەکی زۆر نمایشکردنی بەردەوام دەبێت، لەم بارەیەوە گوتیشی : “بەرهەمەکانی تیپی شانۆیی “رەنگاڵە” لە جەژنی رەمەزانەوە تا دەگاتە جەژنی قوربان و دوای ئەویش بە چەند رۆژێک بەردەوام دەبێت نمایشەکانمان، پار ساڵ بەرهەمی شانۆیی (مەملەکەتی عیللەت) لە شاری سلێمانی (110) رۆژ و لە شارۆچکەی رانیە (7) رۆژ نمایشمان کرد، پێم وایە بەرهەمی ئەم ساڵیشمان رێژەیەکی زۆر نمایشمان دەبێت، کە پێم وایە زیاتر لە (100) رۆژ نمایشمان بەردەوام دەبێت، جگە لەوانەش زۆر جار بە ئێمە دەگوترێت بەرهەمەکانتان پێکەنیناویە، راستە ئێمە نکۆڵی لەوە ناکەین چونکە ئەوە ستایلی کار کردنی ئێمەیە و لەسەرەتای کاری هەموو بەرهەمێکیشدا ئەوەمان ئاشگرا کردووە، بەڵام جگە لە کۆمیدیا رەخنەیەکی زۆر لە بەرهەمەکانمان جێگەی خۆی دەگرێت، بینەری ئێمە لەهەموو چین و توێژێکی کۆمەڵگایە، خێزانەکان دەستە دەستە دێن بۆ سەیرکردنی، پیرو گەنج ژن و پیاو بۆ سەیر کردنی، بۆیە دەتوانم بڵێم ئێمەی هونەرمەند دەتوانین بینەر ئاشت بکەینەوە و دەتوانین بینەریش بتۆرێنین، پێم وایە ئێمەی شانۆکاران خۆمان ئەو قەیرانەمان دروست کردووە بۆ ئەمڕۆی شانۆی کوردی، من هیچ کاتێک لەگەڵ ئەوە دانیم کە دەڵێن شانۆ لە قەیران دایە و بینەری شانۆمان نیە، بەڵکو دەبێ ئێمە بزانین چی دەرخواردی بینەر دەدەین و بینەر چی پێویستە”.
ئێمە حەز دەکەین هەموو بەرهەمەکانمان بهێنین بۆ هەولێر… بەڵام
هونەرمەند (ماهیر حەسەن) دەربارەی نەهێنان و نمایش نەکردنی بەرهەمەکانیان لە شاری هەولێر گوتی : “ئێمە هەموو ساڵێک حەز دەکەین، هەموو بەرهەمە شانۆیەکانمان بهێنین بۆ شارە جوانەکەی هەولێر، من دڵنیام لە شاری هەولێر جەماوەرێک و بینەرێکی زۆر باش و جوان هەیە بۆ شانۆ، بەڵام چەند هۆکارێک هەیە، لەوانە ئێمە ساڵی جارێک هونەرمەندەکان ماوەی سێ مانگ زیاتر خەریکی نمایشکردن دەبن لە شاری سلێمانی زۆر ماندوو دەبین، دوای ئەو هونەرمەندانە زۆربەیان دەوامیان هەیە و خاوەن وەزیفەیەکی حکومین، لەگەڵ هەموو ئەوانەشدا ئێمە هەوڵمان داوە، کارە شانۆییەکانمان بهێنین بۆ هەولێر، ئەوە بوو پار ساڵ و پێرار ساڵیش بە هەمان شێوە حەزمان کرد هەردوو بەرهەمی (بەرەو کەلاوە، مەملەکەتی عیللەت) بهێنین بۆ هەولێر، بەڵام هیچ جۆرە ئاسنکارییەک و هاوکاریەک نەکردین، تەنانەت داوامان لەوەزارەتی رۆشنبیری و لایەنی پەیوەندی داریش کرد، بەڵام هیچ وەڵامێکیان وایان پێنەداین کە دڵ خۆش کەر بێت، بۆ ئەو بەرهەمەش هەوڵی خۆمان دەدەینەوە جارێکی تریش داوایان لێ دەکەین، بەڵام ئەگەر وەڵامەکانیان هەر بەو شێوەیەی ساڵانی رابردوو بێت، بەداخەوە ناتوانین، بۆیە هیوادارین هاوکارمان بن بۆ ئەوەی ئەو بەرهەمانەمان بێتە شاری هەولێر، چونکە دڵنیام جەماوەری هەولێر چاوەڕێمان دەکات، چونکە زۆر جار لە هەولێرەوە میوانمان هاتوون و لە نزیکەوە بەمنیان گوتووە لە هەولێر و شارەکانی دیکەوە هاوتووین”.
ئەگەر ئەمجارە هەر کۆمپانیایەک داوای ریکلامم لێ بکات لە سەروو (10) هەزار دۆلار کەمتر بێ ئەنجام نادەم
هونەرمەندی ئەکتەر و شانۆکار (ماهیر حەسەن) لە بەشێکی دیکەی ئەو دیمانەیەدا دەربارەی بەشداریی کردنی لە هەندێ ریکلام بۆ کۆمپانیاکان گوتی : “پێم وایە ئەوە شتێکە لە هەموو دونیادا هەموو هونەرمەندێک و هەموو یارزانێکیش ئەنجامی دەدات، ئەوە شتێکی زۆر سروشتیە بەداخەوە زۆرجار هەندێک رۆژنامە و گۆڤار خۆیان خەریک دەکەن بەو باسانە و ناوی من و چەند هونەرمەندێکی دیکەشیان هێنابوو گوایە ئێمە ئەو کارمان کردوو وەک ئەوەی تاوانێکمان کردبێت، بەهەر حاڵ چی دەڵێن با بیڵێن چونکە من خۆم خاوەنی کاری خۆمم و خۆشم بڕیاری لەسەر دەدەم، من هیوادارم هونەرمەندانی دیکەش ئەگەر کارێکی لەو جۆرە هەبوو ئەنجامی بدەن، بەڵام لە ئاستێک و نرخێکدا بێت رێزی بۆ دابندرێت، نەک خۆیان هەرزان فرۆش بکەن، من دوو ریکلامم بە شەش هەزار دۆلار و هەشت هەزار دۆلار ئەنجامداوە، بەڵام ئەمجارەیان لە سەرووی دەهەزار دۆلار کەمتر بێت بە ئەنجامی ناگەینم، چونکە من کاری هونەری خۆم هەرزان فرۆش ناکەم، جگە لەوانەش من بژێوی ژیانم ماڵ و مناڵم لەسەر کارە هونەرییەکانمە ئیتر بۆچی مافی خۆم و کارەکەم وەرنەگرم”.
دیمانە– عەبدولغەفار عەبدوڵڵا
