(دارستان و یاساکەی) نۆیەمین کاری شانۆیی تیپی هونەری “رەنگاڵە”ـیە، لەلایەن دەستەیەک لە ئەکتەرانی بەتوانای شاری سلێمانی کاری نواندنی ئەو شانۆگەرییە بەرجەستە دەکەن، لە چەند رۆژی داهاتوودا، ئەو تیپە بۆ یەکەم جار لە رێگەی ئەو شانۆگەرییە سەردانی شاری هەولێر دەکەن و دەست دەکەن بە نمایشکردن، لەمانگی ئاداری داهاتووشدا هەمان شانۆگەری دەبەن بۆ ئەڵمانیا.
لەم بارەیەوە هونەرمەند (ئەحمەد رەئوف) دەرهێنەری شانۆگەری (دارستان و یاساکەی) لە لێدوانێکی تایبەتدا بە “رۆژنامەی هەولێر”ـی راگەیاند : “شانۆگەری (دارستان و یاساکەی) بریتیە لە (9)ـیەمین بەرهەمی شانۆیی تیپی هونەری “رەنگاڵە”، ئەو بەرهەمە لە دەقێکی عەرەبی نووسەر (تامر العربید) وەرگیراوە، لە لایەن نووسەر (د. شێرکۆ عەبدوڵڵا) وەرگێراوەتە سەر زمانی کوردیی، منیش کاری دەرهێنانیم بۆ بە ئەنجام گەیاندووە”.
(ئەحمەد رەئوف) هەروەها گوتیشی : “ئەو شانۆگەرییە لە شاری سلێمانی لە بەرواری (20 – 9- 2009) دەست کرا بە نمایشکردنی، بۆ ماوەی (3) مانگ نمایشکردنی بەردەوام بوو، هاتنی جەماوەر بۆ سەیرکردنی شانۆگەرییەکەمان بە شێوەی بلیت بوو، کە زیاتر لە (36000) سی و شەش هەزار کەس هاتن بۆ سەیرکردنی لەماوەی ئەو سێ مانگەدا، بە شێوەیەکی گشتی ئێمە هەموو ساڵێک جەماوەرێکی بەرچاو و فراوان پێشوازی لە بەرهەمەکانمان دەکەن، هەموو ساڵێکیش هەوڵمانداوە بەرهەمەکانمان بهێنن بۆ هەولێر، کەچی کارەکان مەیسەر نەبووە بەو شێوەی کە بتوانین بێن بۆ ماوەی چەند رۆژێک نمایشی بکەین، بەڵام ئەم ساڵ هەوڵماندا شانۆگەرییەکە بهێنین و بەرهەمەکانمان ببینن و لە نزیکەوە ئاشنای ئەو جەماوەرە هونەر دۆستی شاری هەولێر بین، بۆ ئەو مەبەستە بەنیازین لە رێکەوتی 13 – 2 – 2010 یەکەم رۆژی نمایشی شانۆگەرییەکەمان دەست پێ بکەین لە شاری هەولێر”.
دەرهێنەری شانۆگەری (دارستان و یاساکەی) لە بەشێکی دیکەی ئەو لێدوانەدا گوتی : “شانۆگەرییەکەمان پۆڵێک لە هونەرمەندی بە ئەزموونی بواری شانۆ، بەشداری لە کاری نواندنی ئەو شانۆگەرییە دەکەن، لەوانە (ماهیر حەسەن، ئەحمەد جۆڵا، کەمال چالاک، ئالا عومەر، بەهادین نوری، زاهیر غەریب، رێبوار رەحیم، کامل حمە ئەمین، نەوزاد ئەحمەد، سیقڤەر سەرکەوت، ئەحمەد رەئوف، کادیر ماهیر، بروسک بهادین، کاروان فلامەرز، بە ختیار نوری، هەردی عوسمان، شکار فەخرەدین)، بەڕێوەبەری ئەم بەرهەمە (ئومێد مەحەمەد)ـە، یاردە دەری کاری دەرهێنان هونەرمەند (ماهیر حەسەن) ئەنجامی دواە، کاری موزیک لەلایەن ( بابۆ سەروەت) ئامادە کراوە، رووناکی (ئاوارە عومەر) جێ بەجێکراوە”.
لە کۆتایی لێدوانەکەی دا هونەرمەند (ئەحمەد رەئوف) گوتی : “ئەو شانۆگەرییە وەکو زۆربەی بەرهەمەکانی دیکەی پێشوومان، ناوەرۆکەکەی شێوازی رەخنەی کۆمیدی لە خۆی گرتووە، هیواداریین بتوانین کاتێکی خۆش پێش کەشی جەماوەر بکەین لە شاری ئازیزی هەولێری پایتەخت، لە دوای ئەو نمایشەمان لە شاری هەولێر، لەمانگی ئاداری داهاتوودا بەداوتنامەیەکی فەرمی دەچین بەرەو وڵاتی ئەڵمانیا لەوێش بۆ چەند رۆژێک دەست دەکەین بەکاری نمایشکردنی شانۆگەری (دارستان و یاساکەی)”.
عەبدولغەفار عەبدوڵڵا
