ھیڤیێن زاروکەکی
بلبلەک بووم دڤیا بخوینم
ئاوازێن نازک بڤەھینم
لێ ژ بەر چار نچیرڤانا
ئەز بووم ئخسیرێ زیندانا
********
گولەک بووم دڤیا بشکڤم
ل سەر ئەنیا ھەیڤێ بنڤم
لێ ژ دەستێن چار رەزڤانا
بووم ڤەرێژا دەرد و ژانا
**********
زاروکەک بووم جان و ساڤا
دڤیا پاڤێژم پێنگاڤا
لێ ژ بەر چار دین و مەستا
ئەڤروکە یێ دژیم بن دەستا
*************
دوژمن چەند درندە و ھوڤن
ناھێلن خو ئەم بلڤن
دا مە خانویەک چار دیوار
گوتن ئەڤەیە بۆ تە وار!
***********
بەیار قەرەنی
…………………………………………………………………….
یارا شوخ و شەنگ
بلبل بمینە کر و بێ دەنگ
گولزار بمینە ژار و بێ رەنگ
ئاسمان بمینە بچیک و تەنگ
ئەڤە ھات یارا شوخ و شەنگ
………………..
ژبەر پەیڤێن شرین و خوش
جیھان دێ مینیت مەندەھوش
ل جھێ دەرد و خەم و ژانا
دێ کەتە سەما و کەیف و جوش
……………..
ببن دەشت تەڤ شاخ و چیا
زەر ببن تەڤ لات و گیا
زوھا بە ئاڤا کانیا
ئەڤە ھات یارا شوخ و شەنگ
………………..
سیمەرخ و ئەلھو نە فرن
نێرگز و شەوبو نە ڤەبن
پێلێن دەریایێ نە لڤن
ئەڤە ھات یارا شوخ و شەنگ
……………………..
بەیار قەرەنی
………………………………………………………………………………………….
شاە و سولتانم
شەڤێ دی چووم دیدارێ
دیدارا یارا شرین
مە دەستێن خۆ دان تێکدا
ژ بیرکرن ئاە و برین
………………
شەوقا خۆ دا و بشکڤی
دێمێ وەک دێمێ ھەیڤێ
وێ ئەلندا سپێدەیا
نەھێلا تاریا شەڤێ
…………………..
جوانیا خۆ دیار کر
دڤیا بەرێ خۆ بدەمێ
نەمان توخیب و سنور
ژبەر کر کراسێ شەرمێ
…………………
سینگ و بەر خوخ و ھنار
بەژن و بال گارە و مەتین
ژ لێڤێن وێ دباری
شیر و شەکر و ھنگڤین
………………………..
دوو دەریانە ھەردوو چاڤ
ژێدەرێن مان و ژینێ
م ژ ھەردوو چاڤا ڤەخار
مەیا عەشق و ئەڤینێ
………………….
چ ژڤان بوو دایە مە
وێ دلبەرا خن و جان
ئەو چ خوش شانەشین بوو
تێدا بووم شاە و سولتان
……………………
بەیار قەرەنی
………………………………………………………………………………………..
خوشی بەھرا مە نینە
گەر گولێن ئادارێ نە ڤەبن
گەر کانیکێن بوھارێ نە پەقن
گەر ستێرێن شەڤێ گەش نەبن
چەوا خوشی دێ بەھرا مە بن
……………
گەر چ چیا کەوا نە حەوینن
باغ و باغچە بەلگا بوەرینن
بلبل کر و بێ دەنگ بمینن
چەوا خوشی دێ بەھرا مە بن
…………..
روندک مەزنتر بن ژ چاڤا
خەم ببن مێھڤان دەم و گاڤا
مەبەست دویرتر بن ژ پێنگاڤا
چەوا خوشی دێ بەھرا مە بن
……………….
گەر ھەتاڤ نەگریت پەسارا
نەھێن شۆرە عەورێن بوھارا
باران نە باریت بۆ ھەژارا
چەوا خوشی دێ بەھرا مە بن
…………………
بەیار قەرەنی
