ڕۆژ هەڵەبجەی: من تا سەر ئێسقان عاشقم بەڵام تا ئێستا ئەو ئەشقەی خۆمم نەدۆزیەوەتەوە

فۆتۆ و ئامادەكردنی: گوڵان ئەحمەد
ئەو كچێكی ڕوو خۆش و ئێسك سووك و خۆش كەلامە و هەمیشە لەگەڵ شیعرەكانیدا دەژی و نەیوسیتووە یان بۆی نەچووەتە سەر لەگەڵ كەسێكی تردا جگە لە براكەی پێكەوە بژی ئەو لە هەڵەبجەی شەهید لە دایك بووە و هەر لەو شارەش خوێندنی سەرەتایی و ناوەندی تەواو كردووە و ئێستەش مامۆستای كوردیە، هەمیشە بە تەنهایی دەژی و شیعر دەنوسێ‌، كاتێ‌ بە بیری دێنیتەوە بەوەی كە وتوتە:

“من شوم بە شیعر كردووە”، ئەو دەڵێت: “ئەوە قسەیەكی كۆنە كردوومە، بەڵام منیش كچێكی گەنجم، مرۆڤ بونەوەرێكی كۆمەڵایەتییە، ناتوانێ‌ بە تەنها بژی، من خۆم خانو و ئابوری سەربەست و ژیانێكی جوانی خۆمم هەیە، بەڵام لەگەڵ ئەمەشدا من تا سەر ئێسقان عاشقم بەڵام تا ئێستا ئەو ئەشقەی خۆمم نەدۆزیەوەتەوە”، كاتێ‌ پرسیاری لێدەكەیت چۆن خۆت دەناسێنیت بە گوێگرانی و خوێنەرانی شیعرەكانت ئەو بە متمانییەوە دەڵێت: “من لە منداڵییەوە شیعر دەنوسم بۆیە خەڵكێكی زۆر دەمناسێت، وە ئەوەی ڕۆژێ‌ لە ڕۆژان شیعرێكی خوێندبێتەوە عەوداڵی منە و من دەناسێت، بۆیە پێویست بەوە ناكات من خۆم بناسێنم”، زیاتر دووا و وتی: “ئەوەی شعری خۆش بوێت ڕۆژەیش دەناسێت”، ئەو سەڕای ئەوەی لە ناوخۆی كوردستاندا هەوادارێكی هەیە لە دەرەوەی كوردستانیش گوێگرێكی باشی هەیە و سەرەڕای شیعریش نوسینی جیاجیای هەیە وەك خۆی ئاماژەی پێدا: “من لە زۆربەری ڕۆژنامەكان و سایتە ئەلیكترۆنەكانیش بابەتم هەیە، لە سایتی هەڵەبجە لاپەڕەیەكی تایبەتیم هەیە”، دیارە ئەمڕۆی كوردستان گەنجانێكی زۆر ڕوویان لە دونیای نوسینی شیعر كردووە، بۆیە لەم كاتەشدا شیعری باش و شیعری خراپیش دێنە دونیای شیعرەوە، وە زۆربەی چاودێرانی دونیای شیعریش ئاراستەی شیعری كوردی پێیان وایە شیری كوردی بە ئاقارێكی نا تەندروستدا دەڕوان، ڕۆژ هەڵەبجەی جۆن دەڕوانێتە ڕوتی شیعری كوردی لەم سەردەمەدا؟ ئەو وتی: “منیش بە هەمانشێوەی خەڵكی ڕئیم لەگەڵ ڕەئی خەڵكدایە، ئەمڕۆ شیعر لە قەیرانێكی زۆر سەختدایە”، دیارە ڕۆژ هەڵەبجەی هۆكارەكەیشی گەڕاندەوە بۆ تەكنەلۆجیا هەروەك وتی: “تەكنەلۆجیا بەو بارە سەقەتەی كە هاتووەتە ناومان ئێمە، تەكنەلۆجیا ئیتر مۆبایل بێ‌ ئەنتەرێت بێ‌ سەتەلایت بێ… ئەمانە هەمووی شیعریان بەرە و كاڵ بوونەوە بردووە”، بەڵام ڕۆژە لەگەڵ ئەمەشدا نائومێد نەبووە و دەڵێ‌: “وە لە هەمانكاتیشدا پێموایە شیعر شتێكی ڕۆحییە، ڕاستە هەندێكجار بەرەو ئاقاری كاڵبوونەوە دەڕوات، بەڵام تا ئێستاش جەوهەری خۆی لە دەست نەداوە، جونكە وەك وتم شیعر سەر بە ڕۆحە سەر بە ماددە نییە، سەر بە مەنتق نییە، ئەوەی بڵێیت مەنتق و لۆژیك بەلای شیعردا ناڕوات، لەگەڵ هەموو ئەمانەشدا من پێموایە تا مرۆڤێك بمێنێت شیعریش هەر دەمێنێت”، ڕۆژ هەڵبجەیی بۆ زیاتر ڕازاندنەوەی دونیای شیعر وتی: “قسەیەكی مامۆستا عەبدالڵا پەشێویشم زۆر پێ جوانە كە دەڵێ: (تا خانوە قوڕەكانی خەبات بمێنێ‌ شیعریش هەر دەمێنێ‌)”، ئەو زیاتر درێژەی بە مانەوەی شیعر لە ناو میللەتدا داو وتی: “هەموومان ئەوە دەزانین كە فەرەنسا كانگەی بەرەوپێشچونی هەموو بوارەكانە بۆ هەموو ئەوروپا لەوێ‌ ماهیەتی شیعر ماوە ئیتر چۆن لەناو ئێمەدا شیعر ماهیەتی لە دەست دەدات”، ڕۆژ هەڵەبجەی هەموو بابەتەكانی تری نوسینی وەك ڕۆمان پەخشان هەرنوسینێكی تر بە قەرزاری زمانی شیعر دەزانێ‌ و دەڵێ‌: “ئێمە هەمویشە قەرزاری زمانی شیعرین، ئەگەر ڕۆمان بنوسین دیسان پێویستمان بە زمانی شیععر دەبێت، ئەوەتا بەختیار عەلی بە زۆری لە ڕۆمانەكانیدا شیعری بەكار هێناوە، بۆیە ئەو ڕۆمانانەی ئەوەندە جوانە، نەك هەر ڕۆمان بەڵكو كورتە چیرۆك، نۆڤلێت…هتد پێموایە ئەگەر زمانی نوسینەكەی زمانی شیعر نەبێت ماهیەتی نییە، لەگەڵ ئەمانەشدا هەموومان قەرزاری شیعرین كەچی تانەش لە شیعر دەدەین، سەیری ئەم هاوكێشە نا عادیلە، ئەمە دەگەڕێنمەوە بۆ ئەوەی كە هەمیشە دەخوازرێت غەدرێك بەرامبەر بە شیعر بكرێت”، ئەو پێی وایە هەرچی ئیمپڕاتۆریەت و تۆتالیتاریەكان هیچیان نەماون ئەوەی كەماوەتەوە تەنها شیعر و شاعیرانن كەماونەتەوە، وەك وتی: “كوا ئیمپراتۆریەتەكان؟ كوا تۆتالیتاریەكان؟ كوان ڕژێمە سەركوتكەراكان؟ هەمویان رۆشتن، نەمان بەڵام هەرگیزا و هەرگیز شیعرێكی جوان لە ناوناچێت، دەقێكی زیندوو هەمیشە بوونی خۆی دەسەلمێنێت”، ئەمڕۆكە شیعریش وەك كاڵایەكی بازرگانی پێوە كردنەوە لێهاتووە وە دروست بوونی (مۆبایلە شیعر)، ڕۆژ هەڵەبجەی چۆن لەو جۆرە شیعرانە دەڕوانێت؟، “من ڕێزم هەیە بۆ ئەوە كەسانەی شیعری مۆبایلە شیعر دەنوسن، بەڵام دەڵێم ئەوان غەدر لە شیعر دەكەن”.
ڕۆژ هەڵەبجەی هێندەی خۆی بەرهەمە شیعریەكانیشی خۆش دەوێت و هەرگیز ئامادەی دەست بەرداربوونی تەنها شیعرێكیشی نییە.