ئاکۆ عارف : هونەر بەگشتى و هونەرى نواندن بەتایبەتى ناسنامەیەکى ترى ناسین و ناساندنى گەلانە ، شانۆ و فیلم و دراما کوردیەکانیش لە هەر قۆناغێکدا نمایش و پێشکەشکرابن یان بەرهەم هاتبن سەربارى خەم و کۆسپ و لەمپەرەکانى بەردەمى گوزارشت کردن بووە لە واقع یاخود لە قسەکردن و نمایشکردن ى ناخى بەشێکى زۆرى تاکەکانى کۆمەڵگەى کوردى .
ئێستا هونەرى کوردى ئەگەر تەریب نەبێت بە هونەر لەجیهان دا ، بۆخۆى ئەگەر لە سنورێکى دیارى کروایشدابێت جۆرێک لە پێناسەى لەڕووى تایبەتمەندى وگوزارشت کردن لە واقیع و حەقیقەت ى کۆمەڵگەى کوردى بۆخۆى دەستەبەرکردووە و هەوڵ و هەنگاوەکانیش خەریکە ئاراستەى خۆى دەگرێت ، ئەگەر بەتەنیا قسە لەسەر دراما تەلەفزیۆنیەکان بکەین دەبینین بەردەوام بازدانێک هەبووە و هەیە ، خۆ ئەگەر دراماکانمان لە ئاست خیرایى جیهانى پێشکەوتوودا نەبێت کە بێگومان لە زۆر لایەن و زۆر رووى ترەوە هێشتا زۆر زۆرمان ماوە و بۆئەمەش هۆکار گەلێک ى زۆرهەیە بەڵام دەکرێت بە ئایندەى دراماى کوردى تا ئاستێکى بڵند گەشبین بین ئەمەش بەپشت بەستن بەنمونەگەلێکى زۆر و سەرنج دان لەگەشە و بزافى رۆشنبیرى و هونەر لەکوردستان دا بەڵام ئەوەى دیارە تائێستا دراماى کوردى لەسنورێکى جوگرافى داخراودا قەتیسماوە و بەهۆکارگەلى زۆر ناگاتە گەلانى تر ئەمەش خەمێکى گەورەیە ،هەروەک هەندێک جار کارێکى لاواز ئەگەر بەزەرەر بەسەر هونەرى کوریدا نەشکابێتەوە دواجار لانى کەم هەست و خواست و حەزى بینەرى کوردى لەبەرامبەر دراماى تەلەفزیۆن ى دا کاڵکردۆتەوە کە بێگومان لە گەڵ کارى جواندا هەندێک جار دراماى کرچ و کاڵ یان دراماى لاواز و ناکاریگەریش دەبینین کە چیتر نابێت بۆ ئێستا و بۆ داهاتووش ئەوکارانە نیشانى خەڵک یاخود نیشانى بینەر بدرێت .
سەربارى جوڵە و هەوڵ و کارەکان بە ئاراستەى گەشەو پێشکەوتن ئەگەر کەمێک ورد یان ئەگەر کەمێک بە ئاگاییەوە سەرنج بدەین هەست بەوە دەکەین کە دراما کوردییەکان لە رووى دەق و سیناریۆ و دیمەنى گفتوگۆى ئەکتەرەکانیەوە هێشتا کەم تازۆر هەڵەى زەق و لاوازى پێوەدەبیندرێت و بینەرى ئاسایش زۆر جار بەتەواوى هەست بەهەڵە و هەندێک دیمەنى ناواقع ى یاخود وەک پێویست نەبوونى دیمەنەکان دەکات و لەهەندێک جاردا دەتوانین بڵێین هێشتا وەک پێویست نەتواندراوە پڕبە پێستى رووداوەکان واقع ى کۆمەڵگە وەک خۆى بەتەواوى بەرجەستەبکرێت و هاوشانى ئەمانەش کۆمەڵە خەمێکى تر ئامادەیى هەیە کە لێرەدا دەرفەت ى هێما و ئاماژە و باسکردن ى هەمووى مان نیە ،ئەگەر نەتوانین هەموو خەم و گرفت و لاوازییەکانى دراماى کوردى بخەینە بەرباس خۆدەکرێت بەنمونە باس لە هەندیک کارى جوان بکرێت تالەوێوە سەرلەنوێ خاڵێکى تر بۆدوارۆژى دراما یان زنجیرەدراماى کوردى دابنێین بەندە پێموایە دراماى( گەڕان بەدواى سێبەرەکان دا ) کە لە کەناڵى کوردسات ە وە چەند جارێک پێشکەش کراوە شەن و کەوى کۆمەڵگەى کوردى یا بەشێک لە واقعى کۆمەڵگەى کوردى تا ئاستێکى بەرزکردووە و هەموو رەگەزەکانى نواندن تیایدا بەرجەستەکراوە ، رەنگە لە دراماى تریشدا هەمان مەسج گەیشتبێت بەڵام گرنگە بەهەمان شێوازى ئەودرامایە رووداوەکان و پەیامەکان روونتر بگەیەندرێت چونکە بینەر زۆرجار لە دیمەن یان کاراکتەرى دراماکاندا خۆى یان راستیەکان دەبینێت ، لە پێناوى ئەوەى بینەریش هەرگیز دابڕاو نەبێت لەگەڵ ئەو هونەرە مەزنە گرنگە بۆهەمیشە لە بیرى ئەوەدابین بینەر خۆى یان واقع ى کۆمەڵگاکەى وەک خۆى بەتەواوى راستیەکانیەوە لە دراماکاندا ببینێت یان لەیەکەم هەنگاودا کار بۆئەوە بکرێت رووداو و کاراکتەرى دراماکان لەهزر و بیرى بینەردا بۆ هەمیشە بمێننەوە بۆنمونە وەک ئەوەى لە چیرۆکى تەمسیلى ( ژاڵە ) و ( گەردەلول ) و ( گەڕان بەدواى سێبەرەکان دا ) و هتد کراوە کە ئیستاش وەک ئەوکات کاراکتەرى سەرەکى و زۆریک لە رووداوەکانیان و پەیفى ووتراوى نێوان کەسایەتیەکانى ئەو بەرهەمانە لەناخ و لە بیرو هزرى زۆربەى خەڵک دایە ، هەروەک ئێمە خۆشبەختیشین دەرهێنەرى زۆرباش مان لە کایەکەدا هەیە وبەختەوەریشین کەخاوەنى هونەرمەندانێکى وەهاشین کە خاوەنى شاکار و پڕجورئەت و بەهرە و بیرۆکەى جوانن ، هەروەک گەنجانێکى وەهاش لەهەر دوو ڕەگەز هاتونەتە کایەکەوە گەر مەوداکانى بەردەمیان فروانبکرێت خواستى زۆریان بۆ نواندن هەیە ، کەواتە لەهەر دیوێکەوە قسە لە سەر هونەرى کوردى یان دراماى کوردى بکەین کاتى ئەفراندنە یاخود کاتى سەرکێشى زیاترە بۆ ناوازە ترکردنى ئەو کایە ناوازەیە و بۆ تێرکردنى رۆحى بینەرى دراماى کوردیش.
ناکرێت سەربارى جیاوازى قۆناغ و سەردەم و ساڵەکان هێشتا گەر بەشێکى بینەرانیش بێت کاتێک بەدیار درامایەکى کوردیەوە دانیشتووە بەهەر هۆیەک بێت ئاخ بۆ نمونە بۆ زنجیرەیەکى تەلەفزیۆنى وەک ( ژاڵە ) هەڵکێشێت یان دراما کوردیەکە بگۆڕێت بۆ درامایەکى تورکى یان کۆرى .
ئەم پەیفانەم تەنیا وەک نوسەر و رۆژنامەنوسێک پاشان وەک بینەرێک نوسیوە و هێڵى راست و چەپیش بەسەر هیچ کارێک ى هونەرى و درامایەکى کوردیدا نەهێندراوە بەقەد ئەوەى تەنیا هەڵوەستەکردنە و پەرۆشیە بۆ زیاتر باڵاکردنى بیناى هونەر یاخود بیناى دراماى کوردى و بەرزنرخاندنى کارى هونەرمەندانە بێ جیاوازى .
