بۆ هه‌ڵه‌بجه‌

به‌ندی عه‌لی .. 2012

سڵاو

له‌ 5 هه‌زار گوڵه‌ هه‌ناری وه‌ریو

به‌رله‌ژوانی هه‌ڵاڵه‌

سڵاو

له‌ 5 هه‌زار په‌پووله‌ی مه‌لوول

به‌دیار چراکانی به‌رائه‌ته‌وه‌

سڵاو

له‌ 5 هه‌زار کۆتری سپیی هه‌ڵفڕێنراو

له‌حه‌و‌شه‌که‌‌ی ماڵی خودا

سڵاو

له‌ 5 هه‌زار ئه‌ستێره‌ی نغرۆ

له‌قه‌ترانی ترین شه‌وی غه‌درا

سڵاو

له‌ 5 هه‌زار ژانی

زامێکی تاهه‌نوکه‌ ته‌ڕ

سڵاو

له‌ 5 هه‌زار هاوار

به‌گوێی مۆزه‌خانه‌ی جیهانێکا

پڕ له‌په‌یکه‌ر

سڵاو له‌تۆ ئه‌ی هه‌ڵه‌بجه