ئەمرۆِ دووشەممە (31-5-2010) ساڵێك بەسەر كۆچی دوایی هونەرمەندی دەرهێنەری بواری دراما و شانۆ (حوسێن میسری) تێپەڕ دەبێت، ئەو هونەرمەندە كەسێكی بەتوانا و دەست رەنگین بوو، لە نێو دراما و شانۆیی كوردیی دا، خاوەنی چەندیین بەرهەمی دیار و بەرچاو بوو، ئەو هونەرمەندە كۆچكردووە ناوی تەواوی (حوسێن رەحیم محەمەد ئەمین)ـە لە ساڵی (1957) لەگەرەكی شوانی شاری كەركوك لە دایك بووە، لە ساڵی (1973) بۆ یەكەم جار لە شاری موسڵ لەشانۆیی (الزی قتل الوحش) وەكو ئەكتەر بەشداری كردووە، لە ناوەڕاستی (1979) پەیوەندی كردووە بە تیپی شانۆی ئەزمونگەری كەركوك، هەر لەو تیپیە دەستی بە ئەزموونی شانۆ كردووە بەشدار یی چەند بەرهمێكی شانۆیی كردووە،
لەوانە شانۆگەریی (باڵندە و رێوی) وەكو ئەكتەر رۆڵی بینیووەهەر لە ساڵی (1979)ـدا وەكو ئەكتەر بەشداریی لە لەو شانۆگەریانە كردووە (ئستعرازات توراسیە و الدرویش یبحسون عن الحقیقە) لەساڵی (1980 و 1981) وەكو یاریدەدەری دەرهێنەر بەشداریی لە هەردوو بەرهەمی شانۆیی (دوا گۆرانی و بەسەرهاتی دۆستی ئاژەڵ) كردووە، لەساڵی (1981)ـدا، وەكو ئەكتەر بەشداریی لەو بەرهەمە شانۆیانە كردووە (خۆشەویستی ئەبیكاب و مردنی، گەمەی سوڵتان و وەزیر، بنادت الام جیرار).
ئەو بەرهەمە شانۆیانەی كە خۆی كاری ئامادەكار و دەرهێنانی بۆ ئەنجامداوە بریتی بوون لە (گوڵی بەهار هات ساڵی 1986، هەڵهاتنی مانگ ساڵی 1987، ئەو پیاوەی خۆی بەبارمتە دانا 1988) لە ساڵی (1989) وەكو ئەكتەر بەشداری لە شانۆیی (سێتای ئاسنین) كردووە.
لە ساڵی (1990)ـدا شاتۆگەری (نجنسكی ساتی زەماوەند) كاری نواندن و دەرهێنانی خۆی ئەنجامی داوە، لە فیستیڤاڵی (منتدی المسرح) لە بەغەدا خەڵاتی رێزلێنانی وەرگرتووە.
شانۆیی (سەمایەكی بێ ناونیشان) ساڵی (1991) بەرهەم هێناوە و خۆی كاری نواندن و دەرهێنانی ئەنجامداوە.
شانۆیی (كەرناڤاڵی هەڵبجە) ساڵی (1992) لەسەرشەقامی مەولەوی تا بەردەركی سەرا نمایشی بۆ كردووە.
شانۆیی (كەرنەڤاڵی ئاشتی) ساڵی (1992) لە ئەمنە سوورەكە كاری ئامادەكاریی و دەرهێنانی بۆ ئەنجامداوە، شانۆیی (تابلۆی رامان) ساڵی (1992) لە 1ی ئایار بەرهەم هێناوە.
ساڵی (1993)ـدا ئەم فیلمانەی بەرهەم هێناوە (فرمێسكی رەش) و (دەروێشەكان بەدوای راستی وێڵن) لە یەكەم فیستیڤاڵی شاری سلێمانی دا نمایشكراوە و خەڵاتی باشترین بەرهەمی پێ بەخشراوە.
لەساڵی (1994)ـدا شانۆگەری (گەمەی چاوەڕوانی) كە تایبەت بوو بە شاری (كەركوك) بەرهەمی هێناوە، لە ساڵی (1995)ـدا شانۆگەرییەكانی (مەرگی كورسیەكان و كەرناڤاڵی دەمامكەكان) بەرهەم هێناوە، لە ساڵی (1996)ـدا بەرهەمە شانۆییەكانی (چیرۆكی خۆشەویستی، پاسەوان و لەدوای سەدەیك بۆ شەڕ ساتێكیش بۆ گەمە) بەرهەم هێناوە، لە ساڵی (1997)ـدا دوو كاری شانۆیی بەناوەكانی (گۆڕستانێكی نوێ و كەرنەڤاڵی ناپاڵم) بەرهەم هێناوە، لە ساڵی (1998)ـدا شانۆیی (لەتەمتومانێكدا) لەگەڵ (سەختە فرمێسكەكانی ئەنفال) بەرهەم هێناوە، لە ساڵی (1999)ـدا شانۆیی (سزاو تاوان)ـی بەرهەم هێناوە،
لە ساڵی (1998)ـدا ئەم بەرهەم درمایانەی كاری ئامادەكاری و دەرهێنانی بۆ ئەنجامداوە
(تەرمی هیندی، بۆخۆم ناگریم، سێ دزكە، خەونەكەی مام حوسێن، مانگ گیران، بلە و چاو ماسی، سەعە درۆزنە یان…، بەناو نەقاش، فەرجی پینەچی، پاشا و سێ پرسیار، كلكە رێوی، دیدەنی) هەروەها زنجیرە درامای (كەریم تاك دینار) (6) ئەڵقە، بەرنامەی هونەری تایبەت بەمانگی رەمەزان هەر لەو ساڵەدا بەرهەم هێناوە.
پاشان لە ساڵی (2000) زنجیرە درامای (خۆرنەوەزان)ـی بەرهەم هێناوە كە بریتی بووە لە (17) ئەڵقە، ساڵی (2001) چەندە دراماییەكی تەلفزیۆنی بەرهەم هێناوە ئەوانیش (منداڵانی ئەردەلان و كۆمپیوتەر، سۆرانی بۆیاخ چی، ئەحمەدی نەوت فرۆش) لەگەڵ بەرهەم هێناوی زنجیرە درامای (خەمی چۆلەكەكان) كە بریتی بووە لە (29) ئەڵقە.
هەر لەو ساڵەدا شانۆگەری (گۆڕستانێكی بێ گۆڕ)ـی بەرهەم هێناوە.
لەساڵی (2002)ـدا ئەم بەرهەمانەی هەبووە لەوانە (هەناسەكانی ئەنفال) بە شێوەی شانۆیی گەرۆك لە فەرمانگە و كارگەكان و پاسەكان نمایشكراوە، زنجیرە درامای (رەشەی پۆلیس)ـی بەرهەم هێناوە، كە بریتی بووە لە (31) ئەڵقە.
لەساڵی (2003) چەند بەرهەمێكی دیكەی هەبووە، وەك بەرنامەی تەلفزیۆنی بەشی (درامای خاك و نامەیەكی كراوە، ساڵرۆژی كیمابارانی هەڵبجە، بەرنامەی خاك و خەڵك، بەرنامەی خاك و ساڵرۆژی بەساڵاچووان) لەگەڵ بەرهەم هێنانی زنجیرە درامای (حەسەنە فەنی) .
لەساڵی (2004)ـدا چەند بەرهەمێكی دیكەی ئامادە و پێش كەش كردووە، لەوانە (تابلۆی 1ی شوبات) لە چلەی شەهیدانی كارەساتی 1 شوباتی (2004) لەشاری هەولێر نمایشی كردووە، هەر لەو ساڵەدا زنجیرە درامای (جومعە)ـی بەرهەم هێناوە و بریتی بووە لە (27) ئەڵقە.
لە ساڵی (2005) زنجیرە درامای (گوڵە بێ رۆژەكان)ـی بەرهەم هێناوە.
لە ساڵی (2007) زنجیرە درامای (نیشتمان)ـی بەرهەم هێناوە.
لە ساڵی (2008)ـدا، شانۆیی (بێم لەوێیت) لە مزگەوتی قازی مەحمەد لەشاری سلێمانی نمایش كردووە.
لە ساڵی (2009)ـدا شانۆیی (هارون)ـی بەرهەم هێنا، كە دوایین كاری شانۆیی ئەو هونەرمەندە بوو، لەشارەكانی هەولێر و سلێمانی نمایشكرا.
هونەرمەند (حوسێن میسری) بەر لە كۆچی دوایی كردنی لە چەند رۆژنامەیەك هەواڵی ئەوەی بڵاوكدەوە، كە بەنیازە كاری بەرهەم هێنانی درامای (رەزا و رەمەزان) بە ئەنجام دەگەینێت، كە ئەو درامایە دوایین كاری ئەو دەرهێنەرە بوو و كاری ئامادەكاری سیناریۆ و دەست نیشانكردنی ئەكتەرەكانیشی تەواو كردبوو، تەنها ئەوە مابوو دەست بكات بەكاری وێنەگرتنی بەڵام مەرگ نەیهێشت ئەو بەرهەمەش تەواو بكات.
لەیادمە جارێكیان لە چایخانەی شە عب چاو پێ ی كەوت بەدەم چای خواردنەوە ئەنجمدانی یاری تاوڵە لەگەلًَ هاورێیە هونەرمەندەكانی، لێم پرسی ئەو نازناوەی (میسری)یە بۆچی بەخۆتەوە لكاندووە..؟ لەوەڵامدا گوتی (تۆ سەیری سەر و سیمام بكە لەكورد ئەچم..؟!! هەر ئەڵێ ی میسریەكانم..!!) منیش پێم گوت نانا جگە لەنازناوەكەت لەبەرهەمەكانیشدا وەك میسریەكان هەوڵداوە كار بۆ ناوەرۆكی بابەتی سیناریۆكانت بكەی لەوەڵامدا هونەرمەندی كوچكردو (حوسێن میسری) گوتی : (ئەوان خاوەنی مێژوویەكی هونەری درامی گەورەن ئەگەر چاویان لێ بكەین و سوود لە ئەزموونیان وەربگرین وابزان خراپ نیە) ئەو ئێوارەی كە من ئەو هونەرمەندە دەرهێنەرەم بینی قسەكانی زۆر سەرنجی راكێشام و یەكێك لە پرسیارەكانی دیكەم بۆ ئەو هونەرمەندە ئەوە بوو، پێم گوت تۆ دەرچووی چ پەیمانگایەكی لەوەڵامدا گوتی (من دەرچووی چایخانەی شەعبم، ئەو چایخانە ژووانی ئێواران و كارەكان و لەدایك بوونی زۆربەی نووسینی دەقی درامییەكانی منە، بۆیە خۆم بەدەرچووی ئەو چایخانە جوانە ئەزانم كە بۆمن بۆتە پەیمانگا.
بەداخەوە سەر لە بەیانی رۆژی (31-5-2009) دوای ئەوەی هونەرمەند (حوسێن میسری) هەڵدەستێت لەخەو، بەنیازی ئەوەی لەگەڵ هەڵهاتنی رۆژێكی نوێ، وەك هەریەك لە ئێمەی مرۆڤ بە كۆمەڵێك ئاوات و پلان دانان بۆ كاری هونەریی درێژە بە ژیان و بیرۆكەكانی بدات، هونەرمەند (حوسێن میسری) بە هۆی تووشبونی بە جەڵتەی دڵ، بەر لەوەی بگاتە نەخۆشخانە لە رێگا كۆچی دوایی دەكات، لە ساڵیادی كۆچی دوایی ئەو هونەرمەندەدا، لەم رۆژەدا، جارێكی دیكە سەرەخۆشی لە خانەوەدەكەی و سەرجەم هونەرمەندانی كوردستان دەكەین، ئومێدەواریین هونەرمەندانی كورد، بەهەوڵدان بۆ كاری تازەی شانۆیی و درامی درێژە بەخەونەكانی هونەرمەندانی كۆچكردووی وەك (حوسێن میسری) بدەن
عەبدولغەفار عەبدوڵڵا
