کۆتری سپی

ڕێباز مه‌حمود
‌هۆڵه‌ندا

له‌ ژێر مۆڕه‌ی تفه‌نگا ،
هه‌موو دانه‌وێله‌ی دنیاش ڕۆکه‌ن ؛ مه‌حاڵه‌ ؛
کۆتره‌کان بنیشنه‌وه‌ !

کۆتره‌ سپیه‌کان له‌ خوێندا نانیشنه‌وه‌ کۆتره‌ سپیه‌کان به‌ ئاسمانی ترسه‌وه‌ له‌نگه‌ر ناگرن ئاخر کۆتره‌ سپیه‌کان ؛
هه‌وای نیه‌تی بۆگه‌نتان ده‌ناسنه‌وه‌ !

گاڵته‌جاڕیه‌ ،
پێشبینی ئه‌وه‌ بکه‌ین ڤێلایه‌کی چوارشانه‌و ماڵێکی کورته‌باڵای خانوه‌قوڕه‌کان ، ببنه‌ درواسێ !
یان هه‌ر به‌یه‌کتر بینینی ڕۆژانه‌یان سپی ترین کۆتری کوردستان
بۆ دوورترین شوێنی دونیا نه‌فڕێ !!

کانیسپیلکه‌ و فیرعه‌وناوا
له‌ سلێمانین ،
هه‌ردوکیان !
به‌ڵام مه‌حاڵه‌ ببنه‌ ،
دوو براده‌ری گیانی به‌گیانی و
بچنه‌ سه‌را و
کۆتری سپی هه‌ڵده‌ن بۆ ئاسمان !!