نوسینى : ئارى ئازاد : کاتێ ئەم ووشانەت بۆ ئەنووسم خەمێکى ترى پڕ ئێش لەگەڵمان ئەژى کۆستى کەسێکى پڕ وەفایە کۆستى ئەو مرۆڤەیە کە هەموو مەجلیسێک تۆ پێناسەت دەکرد و پێت دەوتین کاک (حەمە جەزا) ى مامى گەورەم ، لاى من نیشانە و ڕەمزى هونەر و مەردایەتى کوردە نموونەى مرۆڤى شۆرشگێرى گەلەکەمانە ، کاکە ئەردەلان نازانم لە کوێى یادەکانتەوە دەست پێ بکەم
کام نموونەى مەردایەتیت بکەم بە خاڵى دەستپێک هونەرەکەت یا هەڵوێستى کوردانەت یا خۆشەویستى و مرۆڤایەتیەکەت ئەرێ برا ساڵێکە ساڵێک هەر چاوەڕێتم وەکو بروسکەى خەباتى گەل ئاسا بۆ سەر سەرى دوژمنەکەى بێیتەوە ناومان ئاخر تۆ کە ڕۆیشتى هیچ قسەیەکت بۆ نەکردین هیچت نەوت ئێمە دواى تۆ چى بکەین کێ ئەبێتەوە ئەو کەسەى وەکو خۆت مەرد بێت بۆ برا و برادەرەکەى ، ساڵێکە برا بولبوکانى وڵاتە وێران بووەکەمان چاوەڕێى مامۆستاکەیانن وانەکانى ژیانیان بۆ بڵێتەوە ، ئاخر برا ساڵێکە هەموو شەوێ عاشقە گەنجە خێر لە خۆ نەدیوەکانى کوردستان و پیرە هەولێرى رەمزى هەڵوێست ، بیرى گۆرانییەکان و کچى گاوڕ دەکەن ، لەم پایزە پڕ ئێشە کە رۆژەکانى وەکو گەڵاى درەختە سووتاوەکانى شار کەوتوون بە کۆستى مامۆستاى پێشمەرگەکان و خۆشەویستەکەى تۆ کاکە (حەمە جەزا) ، ئێستا بەیەکەوە لە ساڵیادى تۆ دا میوانێکە و توخوا برا خۆت ئاگادارى بە هەرچەندە هیچ کەسێ نیە وەکو تۆ رێز و قەدرى میوانى لابێت ، لەوێوە بەیەکەوە سرودێک بۆ عەشقى وڵات بڵێنەوە لەوێ وە بارانى خۆشەویستى نیشتمان و کوردستان بۆ گەنج و پیرانى خاک بە هەورێکا بنێرن ، برا بیرمان ناکەیت دەزانم بێ وەفا نیت بەڵام رێگەت پێنادەن بێیتەوە لامان چۆن بیرمان ناکەیت دواى تەمەنێک هاتیەوە هەولێر و قەڵا و منارەکەت شادمان کرد لەو شارەى تۆى کرد بە پێشمەرگە بە قسە خۆش و گۆرانیە شیرینەکانت ئەو خەڵکەت دڵخۆش کرد و گڕى ئاگرى نەورۆزت بە جۆش تر کرد ، برا ساڵێکە ، دووریت بە ئێشترین زامە برا یادى تۆ هەموو شەوێ هەموو کاتێ ئێمە دەخاتە گریان ، ئێستا کۆستمان بۆتە دوو وەکو چۆن نیشتمانمان دابەشکرا بۆ دوو ، هێشتا فرمێسکى کۆچى تۆ ووشک نەبوو پێشمەرگە و هونەرمەندێکى زۆر ئازا و بە هەڵوێست ماڵئاوایى لێکردین ئێستا لە یادى ساڵێ دوورى تۆ لە ساڵێ سەفەرى تۆ هەولێرەکەت یادەکانت وەکو گوڵ ئەنێرێتە شارەکەى هەڵمەت و قوربانى نامەى پرسەى تۆ ئەنێرێتە گردى سەیوان و دەڵێ سڵاو مامى گەورەم مامە (حەمە جەزا) منیش ساڵێکە بیرت دەکەم ……
ariazad999@yahoo.com
