گوێم لە هەناسەی پەپولەکانە

-١-

ئەی ژن

دەست بەرزکەرەوە

با هەورە یاخی بووەکان

دابکەنە باران

ئێرە بۆنی وشکانی

لێ دێ

-٢-

ئەی ژن

پێکێک شەڕابم

بۆ تێکە

با کەمێک

لە تەنیایی خۆر و سەمای

پەڕەسێلکەت بۆ

بخوێنمەوە

-٣-

لە دیوانی شعری مندا

دەنگی شاییەک دێ

ژنێک

سەرچۆپی گرتووەو

پیاوێک لە

گاوانیە

-٤-

گوڵفرۆشێکی ژن

ئەوەندە

بەخشندە بوو

گوڵەکانی ئەبەخشینە

مناڵان

-٥-

ئەمەوێ ببمە

مامانی دەریا

ئەڵێن ژن

لە ئاو ئەخوڵقێ

نەوەک خۆڵ

-٦-

ژنێک بەڕەشەبا

ئەڵێ

هێواش وا

قژم سەما

ئەکا

-٧-

ئەی زەوی دە

بوەستە

وا ژنێک بەسەر

پردی سیراتتدا تێپەڕ

ئەبێ

-٨-

ئەی دەریا

شەپۆلەکان ڕابگرە

ژنێک ئەیەوێ

مەلە بکا

-٩-

ئەی ژن

تۆ بە گەنجیەکەت بە کۆڵانەکانی ژیاندا

گوزەر بکە

با منی (پیر)سەیری

دواهەمین شانۆ بکەم

-١٠-

ژنێک وتی

گوڵەکان لەناو

ئینجانەدا (دیل)مەکەن

ئەوان جەنگاوەری

بەهەشتن

،،،،،،،،،،،،

… هاوڕێ ڕەش …