گله‌یی

به‌ندی عه‌لی .. جێنیوه‌ری 2010

من روحی مه‌لوولم به‌روخت عاشیقه‌ قوربان

تۆ چنگی موژانت له‌به‌هێی دڵم گیر ئه‌که‌ی

من فه‌رشی حه‌ریری ئولفه‌تم خستۆته‌ ژێر پێت

تۆ ده‌شتی به‌راوی فرسه‌تم لێ داگیر ئه‌که‌ی

من به‌حری ئه‌مه‌کدارم له‌هه‌ڵچوون و سکونا

تۆ دۆندی چیای غه‌دری حه‌ز له‌زه‌مهه‌ریر ئه‌که‌ی

من قومێ ئاوی ڕوونم له‌فنجانی جه‌سته‌یا

تۆ غه‌رقی خه‌یاڵاتی چاوه‌ڕێی ته‌فسیر ئه‌که‌ی

من خه‌سته‌م وتۆ ئازار من جه‌سته‌م و تۆ هه‌ر خار

به‌م زه‌برو جه‌فای نازه‌ توفلی دڵم پیر ئه‌که‌ی

ده‌ست به‌رده له‌ئه‌تواری پڕ ئه‌سراری مه‌کرو ناز

به‌م هه‌وری جه‌وره‌ نوری مانگه‌شه‌و یه‌خسیر ئه‌که‌ی