گریان له ده‌نگی تۆپه‌کان، ناڵه‌و شیوه‌نه
له نێوان ده‌نگی نه‌ڕه‌ی شێرو لوره‌ی گورگه‌کان
گریان له ترسی وه‌رینی په‌ڕه‌ی گوڵه‌کان
کڕوزانه‌وه‌یه بۆ وه‌رزی به‌خونچه نه‌بوون !
گریان له ترسی په‌ڕی کۆتره‌کان
هاوارکردنه بۆ نه‌بوونی ئاشتی له سه‌ر زه‌مین
گریان له ترسی وه‌رینی پووله‌که‌ی ماسیه‌کان
پاڕانه‌وه‌یه بۆ قڕ بوونی ڕازه‌کان
گریان بۆ کارگه هه‌ڵنه‌تۆقیوه‌کان
نوشته‌کردنه بۆ وێرانی زه‌مین
گریان بۆ مناره‌ی مزگه‌وتاکان
کڕنوش بردنه له ترسی به‌رپا بوونی چه‌نگی دیینه‌کان
گریان بۆ زه‌نگی کڵێساکان
تۆبه‌کردنه له ترسی له خاچدانی ڕوحه‌زیندوه‌کان
گریان بۆ بێشکه‌ی منداڵه گرینۆکاکه‌کان
گریانه بۆ نان و گریانه بۆ ئاو !!
گریان بۆ‌ڕوخساری باوکه ڕیش سپیه‌کان
گریانه بۆ نه‌هامه‌تی جیله چکۆله‌کان
گریان بۆ چارۆکه‌ی کۆڵی دایکه‌کان
گریانه بۆ سنگه‌ڕه‌ش و ڕووته‌که‌ی نیشتمانی یه‌که‌م !!
گریان بۆ قردێله‌ی به‌ر به‌رۆکی پاکیزه باڵقه‌کان
گریانه بۆ فه‌وتانی عیشق !
گریان بۆ به‌د به‌ختی کوڕه هه‌رزه‌کان
گریانه‌بۆ فانابوونی عیشق لێره…
گریــــــــــــــان بـــــــــۆ ڕووت بونه‌وه‌ی زه‌مـــــین
له گوڵ ، له بولبول ، له سروشت
له عیشق، له گۆرانی،له من، له تۆ ،
له هه‌موومان، له هه‌موو شته‌کان…
گریان بۆ ئازادیش له‌م خاکه‌دا
نا بێت ده‌نگو ڕه‌نگی ببیسترێت..
له‌م جه‌نگه‌ڵستانه‌دا؛
ئازادی له زیندوه‌کان ده‌ستێننه‌وه!!..
له‌و مه‌مله‌که‌ته‌سوتاوه‌دا؛
ئازادی به‌جه‌سته ڕاکشاوه‌کان ده‌به‌خشنه‌وه!!..
ته‌نها ئازاد له‌م خاکه‌دا که‌هه‌بێت
ئه‌و که‌سه‌یه که زوو ده‌مرێت
خوێن نابینێت به‌ناو چه‌وانییه‌وه
گوێی له نه‌شیدی شکان ناگرێت
قه‌ڵغانه‌شکاوه‌کان نابینێت
ڕمه‌سه‌رشێته‌کان ناناسێت
ڕه‌ق بوونه‌وه‌ی نان نابینێت
توانه‌وه‌ی به‌فر نابینێت ..
شه‌هیده‌کان ئازادن، تفه‌نگه‌کان جه‌للادن
هه‌ناسه‌کان دیلن، سنگه‌کان کون کونن
خاکه‌کان سورن، شه‌ڕکه‌ره‌کان ڕه‌شن
دا‌ره‌کان زه‌ردن، گه‌ڵاکان سپی!!.
پۆستاڵه‌کان هه‌ڵهاتوون، قاچه‌کان ماندوون
به‌رگه‌کان دڕاو، ڕوحیانه‌ته‌کان دۆڕاو ..
خۆزگه‌کانی سه‌ر شێت بوون
جه‌نگ به نه‌علات ده‌که‌ن
نه‌فره‌ت له دۆران و سه‌رکه‌وتنی جه‌نگ ده‌که‌ن ..
هیواکانی فانابوون; له‌م ووڵاته‌دا
ئه‌گه‌ر ئازادی هه‌بێت,
ئه‌وا هه‌ر به‌شی مردووه‌کان ده‌کات
که‌نایبینن، که‌نایدوێنن، که‌ناژین له‌ناویدا
گریان لێره، له‌م نیشتمانه‌دا
بۆ نه‌بوونی ئازادی و نه‌بوونی نانه!!
بۆ تروسکه‌ی فیشه‌که گڕداره‌کانه
بۆ بورجه سوره‌کانی سنوری نێوان جه‌نگ و خوێنه
گریان لێره… له‌م زه‌وییه وێرانه‌یه‌دا
له ناو ڕوحی تابوتێکی سنگ قڵیشاوه ده‌ست پێده‌کات
به‌سه‌ر ئاڵایه‌کی پڕ له جوێندا هاوار ده‌کات
به‌سه جه‌نگ … به‌سه جه‌نگ
نه‌فره‌ت له سه‌رکرده‌کان ,نه‌فره‌ت له بیرو باوه‌ڕتان..
نه‌فره‌ت له سه‌بازه‌کانتان، نه‌فره‌ت له عه‌سکه‌ره‌کانتان..
نه‌فره‌ت له جه‌ندرمه‌و، نه‌فره‌ت له جه‌نگه‌که‌تان ..
فره‌ت له سه‌رمایه‌داری و له سیاسه‌تان…
هه‌ردی ئه‌حمه‌د
28/02/2008
