کۆچێک به‌ره‌و ئۆقیانوسی مه‌رگ و مردنێکی له‌سه‌رخۆ !!

هه‌ڕ به‌ده‌م ڕێگای کۆچه‌وه‌

دڵه‌ڕاوکێی گه‌ڕانه‌وه‌

رێی پێگرتین ..

به‌ڵام کۆچێکی شکسته‌و

چاو له‌کۆشا !!

چۆن ده‌توانێ

هه‌نگاوه‌کان کۆکاته‌وه‌و ‌

به‌ره‌و ماڵه‌ باوانی خه‌م

جگه‌رگۆشه‌ی خه‌مه‌کانی بباته‌وه‌

توێشه‌به‌ره‌ی خۆشه‌ویستی و

دیداره‌کان

له‌کۆڵ به‌ستێ

بۆ‌مه‌به‌ستێ !! ..

(2)

کۆچێکی بێ قورسایی

له‌م ئۆقیانوسی مه‌رگه‌وه‌‌

چۆن ده‌توانێ

ئه‌و زریان و گه‌رده‌لوله‌ خاوکاته‌وه‌

که‌ یاده‌کانی هه‌ڵوه‌ران ..

ئێسک و پروسکی ئه‌وینی

شۆڕشێکی به‌خوێن سووری

له‌ئاوینه‌ی رۆژه‌کاندا

ووردوخاشکرد

سیمای شکاند..

(2)

شکسته‌ کۆچ و گه‌دایی

چۆن ده‌توانێ

جارێکیتر

له‌م غوربه‌ته‌وه‌ کۆچ بکا

به‌ره‌و تروپکی سه‌روه‌ری و گه‌ڕانه‌وه ..

له‌و ژانه‌وه‌ سه‌رده‌ربێنێ

له‌ گیرفانی قاچاخچیه‌کانی سنوردا

بوو به‌ سۆزانی و

زۆڵێکی که‌مفامی ڕووزه‌ردیان

پێ فڕێدا

له‌سه‌ڕێدا !!..

(3)

شکسته‌ کۆچ و گه‌دایی

چۆن ئه‌توانێ

جارێکیتر

له‌م غوربه‌ته‌وه‌ کۆچ بکا

به‌ره‌و تروپکی سه‌روه‌ری و گه‌ڕانه‌وه‌

له‌ژێر باڵی ترس و له‌رزی

درۆ سه‌وزه‌ چڕه‌کاندا

سه‌ر ده‌ربێنێ ..

شکۆمه‌ندی بداته‌وه‌

به‌ئه‌ڤینی بێ کۆتایی و

کۆچی سووری کچانی شار

کۆچی سپی کاکی دڵدار !!..

(4)

ئێمه‌ قوربانی کۆچێکی

شکسته‌ی

چاو له‌ کۆشداین..‌

له‌هه‌‌نده‌رانی بێ دڵ و نامۆییدا

باڵی به‌ستوین

به‌دوای خۆیدا

به‌ره‌و مه‌رگێکی له‌سه‌رخۆو

هێجگار هێمن

گه‌وره‌ییمان تێکده‌شکێنێ

سه‌دان جه‌للادی خوینمژو

کاروانه‌ کۆچ

کک کککککک

ڕه‌وه‌‌ کۆچ و

کۆچی نوێمان بۆ ئه‌هێنێ

چاوو دڵمان ئه‌گرێنێ

عه‌شقی پاک و

کوردستانمان لێده‌ستێنێ

کوردستانمان لێده‌ستێنی …

خاڵه‌حه‌مه‌/دانمارک/ڤالبی/29/30/11/2004