مه‌نووچێهر جیهانی ـ “عه‌لیڕه‌زا ره‌زاداد” ده‌بیر و به‌رپرسی سی و یه‌که‌مین خولی فێستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران له کۆنگره‌ی رۆژنامه‌وانی ئه‌م فێستیڤاڵه وێڕای ئاماژه‌دان به به‌رپرسایه‌تی کۆمه‌ڵایه‌تی فێستیڤاڵ و به‌شداریی گروپه تایبه‌ته‌کان له‌م رووداوه‌دا رایگه‌یاند: کچانی خه‌ڵکی شیناوێ که به هۆی رووداوی تاڵی ئاگرکه‌وتنه‌وه‌ی قوتابخانه‌که‌یان ئه‌ندامانی جه‌سته‌یان سووتا، بۆ فێستیڤاڵی سی و یه‌که‌م بانگهێشت کراون.
هه‌روه‌ها منداڵانی ناوچه‌ی بوومه‌له‌رزه لێدراوی سه‌رپێڵی زه‌هاو که بۆ خۆیان فیلمیان ئاماده کردووه و له به‌شی ئۆڵه‌مپیاد به‌شداریان کردووه، له فێستیڤاڵی ئه‌مساڵدا بانگهێشت کراون.
به پێی راپۆڕتی لێژنه‌ی په‌یوه‌ندییه‌کان و راگه‌یاندنی سی و یه‌که‌مین خولی فێستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران، “عه‌لیڕه‌زا ره‌زاداد” ده‌بیر و به‌رپرسی سی و یه‌که‌مین خولی فێستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران له کۆنگره‌ی رۆژنامه‌وانی ئه‌م فێستیڤاڵه‌دا که به ئاماده‌بوونی “سه‌ید ئه‌حه‌د میکائیل زاده” به‌رپرسی به‌شی په‌یوه‌ندییه‌کان و راگه‌یاندنی فێستیڤاڵ و به به‌شداریی په‌یامنێران و نوێنه‌رانی ده‌زگاکانی راگه‌یاندن و ئاژانسه‌کانی هه‌واڵنێری له هۆڵی سینه‌ما فیرده‌وس له مۆزه‌خانه‌ی سینه‌مای ئێران له شاری تاران به‌ڕێوه‌چوو، گوتی: به رێژه‌ی 420 به‌رهه‌م له 70 وڵاتی جیهان و 378 به‌رهه‌م له ئێران خوازیاری به‌شداری کردن له فێستیڤاڵی فیلمه‌کانی منداڵانی ئێران بوونه. ئه‌وه‌ی که بنه‌ماڵه‌ی چکۆله‌ی سینه‌ما باری جیدی به‌رپرسایه‌تی کۆمه‌ڵایه‌تی ئه‌مڕۆی له‌سه‌ر شانه، زۆر باشه و هه‌روه‌ها رێز و سوپاسی خۆی ئاراسته‌ی به‌رده‌نگه‌کان له‌به‌ر هاوڕێیه‌تیان له‌گه‌ڵ فێستیڤاڵه‌که کرد. فێستیڤاڵی سینه‌مای منداڵ و مێرمنداڵی ئێران ده‌چێته ده‌یه‌ی چواره‌می چالاکییه‌کانی خۆی و بۆ ئه‌مساڵ به‌دواوه رێککه‌وتننامه‌یه‌کی هه‌میشه‌یی نووسرا بۆ ئه‌وه‌ی که نیگه‌رانی و په‌رۆشی له جێگۆڕکێی فێستیڤاڵ له ئیسفه‌هان بۆ شارێکی دیکه نه‌مێنێت و ئه‌م فێستیڤاڵه به شێوه‌ی سه‌قامگیر له شاری ئیسفه‌هان بمێنێته‌وه.
“عه‌لیڕه‌زا ره‌زاداد” هه‌روه‌ها گوتی: ئه‌مساڵ کارنامه‌ی سینه‌مای منداڵان و مێرمنداڵان لێکدانه‌وه‌ی بۆ ده‌کرێت. سینه‌مای منداڵ و مێرمنداڵ شانازییه‌کی زۆری له ناوه‌وه و ده‌روه‌ی وڵاتدا به‌ده‌ستهێناوه و پێویست بوو که به تایبه‌ت له‌مساڵدا به له‌به‌ر چاو گرتنی ئه‌و به‌ربه‌سته دارایی و ماڵیانه‌ی که هه‌یه، چه‌ند هێما و سه‌مبولمان ناساندووه بۆ ئه‌وه‌ی که فێستیڤاڵ به جۆش و خرۆش و شادییه‌وه به‌ڕێوه‌بچێت. دابین کردنی شادی و دڵخۆشی کۆمه‌ڵایه‌تی وه‌کوو یه‌کێک له ئامانجه‌کانی به‌ڕێوه‌چوون و به‌م دروشمه که منداڵان و مێرمنداڵان سه‌رمایه‌کانی سه‌ره‌کیی سینه‌مان.
ده‌بیر و به‌رپرسی سی و یه‌که‌مین خولی فێستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران له درێژه‌ی ئه‌م کۆنگره‌یه‌دا به ئاماژه‌دان به به‌رجه‌سته کردنه‌وه‌ی پرسی ده‌وری سینه‌ما له پێشگیری کردنی ئازاردانی منداڵ رایگه‌یاند: چه‌ند فیلمێک سه‌باره‌ت به پرسی ئازاردانی منداڵ و رێکاره‌کانی بنه‌ماڵه‌کان بۆ به‌ره‌نگاربوونه‌وه‌ی ئه‌م دیارده ناحه‌ز و نه‌شیاوه و پێگه‌ی داموده‌زگاکان له داڕشتن و ئاماده‌کردنی پێکهاته‌ی به‌ره‌نگاربوونه‌وه‌ی ئه‌م کێشه‌یه له‌م خوله‌ی فێستیڤاڵدا نمایش ده‌کرێت. به بڕوای من پێویسته ئه‌م پرسه وه‌کوو به‌رپرسایه‌تییه‌کی کۆمه‌ڵایه‌تی له فێستیڤاڵدا به‌رجه‌سته بێته‌وه و فیلمی “ژووری تاریک” به‌رهه‌می “روحوڵڵا حیجازی” که سه‌باره‌ت به منداڵ و بابه‌تی ئازاردانی منداڵه ده‌توانێت له‌م بواره‌دا کاریگه‌ر بێت و له فێستیڤاڵدا بخرێته به‌ر باس و لێکدانه‌وه.
“عه‌لیڕه‌زا ره‌زاداد” به جه‌خت کردنه‌وه له‌سه‌ر دابین کردنی جۆش و خرۆش و شادی کۆمه‌ڵایه‌تی دوابه‌دوای نمایش کردنی فیلمه‌کانی سی و یه‌که‌مین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران له‌سه‌ر ئاستی 31 پارێزگای وڵاتی ئێران و 2 ناوچه‌ی سه‌ربه‌ستی بازرگانی و ئابووری رایگه‌یاند: به له‌به‌ر چاو گرتنی به‌ڕێوه‌چوونی فێستیڤاڵ له وه‌رزی هاوین و به‌رپرسایه‌تی کۆمه‌لایه‌تی فێستیڤاڵ له‌مه‌ڕ وه‌دیهێنانی جۆش و خرۆش و شادی و دڵخۆشی کۆمه‌ڵایه‌تی له هه‌موو پارێزگاکانی ئێراندا فیلمه‌کانی منداڵان نمایش ده‌کرێن، بۆ ئه‌وه‌ی که به‌شی منداڵان و مێرمنداڵانی پارێزگاکانی دیکه‌ش له سینه‌مادا فه‌رامۆش نه‌کرێت.
سی و یه‌که‌مین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران ICFF به ده‌بیری و به‌رپرسایه‌تی “عه‌لیڕه‌زا ره‌زاداد” له رۆژانی 8 تا 14ی مانگی خه‌رمانانی 1397ی هه‌تاوی رێکه‌وتی 30ی ئۆگۆست تا 5ی سێپته‌مبری 2018ی زایینی له دوو به‌شی نه‌ته‌وه‌یی و نێونه‌ته‌وه‌ییدا له شاری مێژوویی ئیسفه‌هان له وڵاتی ئێران به‌ڕێوه‌ده‌چێت.
