( بەشی دوانزەهەم )
لەمێژە تەنهایی دەچێژم
بۆیە.. کاتێ کە،تۆ دەبینم.
تەتەڵە دەکا زمانم.
***
بیرتدەکەم،
نەك لەبەرئەوەی هاوڕێمی.. نا
لەبەرئەوەی..
خۆشمدەوێی.
***
پێت وانەبێ من ڕوبار نیم و
ئاوم سوێرە
نا من ڕوبارم، ئاوم شیرینە
چبکەم تینوێتیی تۆ .. بە من ناشکێ.
***
بە ” من” چی ” تۆ” لە من دا بژی
بە من چی تۆ، خۆ لە من دا ھەڵگری
بە من چی.
خۆ لەنێو شیعرەكانما حەشاردەی
ئەی شاژنی خەونەكانم،
ئەی سندوقی ڕەش..
بۆ قۆرغ دەكەی خەندەكانم.
***
بەسەرکردنەوەی جێگەی ژوانەکانت
ئۆخژن دەدەن بەگیانی تەریوم.
هەر جێگەیەو
دەبێتە خەمڕەوێنی
خەمێکی بێ باڵم.
لەم بێ تۆییەدا
کەسێ نییە بێتە هانام
خۆ من قیبلەم نەگۆڕیوە
چییە، نازانم تاوانم!؟
***
هیچ سەرسام نیم بە عینادییت
چون لەتۆ عینادتر
ئە منم
وەلێ خۆزگە هێندەی ئە تۆ
خاوەن بڕیار دەبووم
ئای لە من کە لەرزۆکم..
بەرامبەر تۆ.
***
کەس ناچارناکەم، کە،ناچاربێت، بیربکاتەوە لە من.
کەسێ بەناچاریش، بیرنەکاتەوە لەخۆی
چ ناچارم، ناچاریکەم بیربکاتەوە لەمن.
***
ئەمشەو ژنێك
بەجۆرێك لە گیانکێشان ئاشنای کردم
ئەویش ..
ماڵئاواییکردن بوو بەبێدەنگی.
***
کۆستی دورکەوتنەوەی تۆ لە من
هەمان سوێ، دەخاتە دڵەوە
کە،دەیخاتە دڵی ئەو پیاوەی
لەپەنجەرەی ماڵەکەیەوە،دەبینێ
دەستڕێژ، لەتاقانەکەی دەکەن.
***
ئەمشەو
شەوی یەڵدایە،
بۆ دواجارە
بەبێ تۆ، پێك فڕدەکەم
چیدیکە
پەرداخمان نادەین لەیەك و
بەیەکتری ناڵێین نۆش.
فەتاح حەسەن
دانیمارك/ ڤالبی
