ژووری عیشق

به‌ندی عه‌لی .. 2012

که‌هاتیته‌ ژوورێ ، گوڵم

گڵۆپه‌کان بکوژینه‌وه‌و

په‌رده‌ به‌ڕوی مانگه‌شه‌وا

داده‌ ، گوڵم

له‌م ژووره ده‌یجوره‌ی عیشقا

دوو ئه‌ستێره‌ی چاوه‌کانت

له‌من سه‌روزیاده‌ ، گوڵم

که‌هاتیته‌ ژوورێ ، گوڵم
ده‌رگای ژیان
به‌کراوه‌یی جێ بهێڵه

که‌س شه‌رم له‌ئێمه‌ ناکا
چیمان هه‌یه‌ له‌خه‌ڵکی بشارینه‌وه‌
غه‌یری خه‌زنه‌یه‌کی پڕی
هه‌وری خه‌ستی عیشق نه‌بێ
ده‌لێگه‌ڕێ ، گوڵم ئه‌مشه‌و
ئه‌ویش به‌ڕه‌‌هێڵه‌ داکا

که‌هاتیته‌ ژوورێ ، گوڵم
خه‌مه‌کانت به‌بزماری
پشت ده‌رگاکه‌وه‌ هه‌ڵواسه‌
ئه‌مشه‌و ته‌نیا شه‌وی عیشقه‌و
ئه‌وی پێویستن بۆ ژیان
هه‌ر دوو ماچ و دوو چرپه‌یه‌و
دوو هه‌ناسه‌

که‌هاتیته‌ ژوورێ ، گوڵم

به‌ر له‌هاتن

پێویست ناکا له‌ده‌رگا به‌ی

نه‌با په‌ریه‌کانی عیشق هه‌ڵدێن

پرسی ده‌نگ و ڕه‌نگیش مه‌که‌

لێره‌ له‌م ژووری عیشقه‌یا

ڕه‌نگی عاشقان هه‌مان ڕه‌نگه‌و

هه‌ر به‌یه‌ک زمانیش ئه‌دوێن

که‌هاتیته‌ ژوورێ ، گوڵم

قه‌فه‌زی سنگ ئاوه‌ڵاکه‌

با ڕه‌نگاڵه‌ی دڵت بفڕێ

ژوور ئامانه‌

تفه‌نگ زاتی ئه‌وه‌ ناکا

بێته‌ ژوورێ و

ئه‌وه‌ی ئێره‌ی لێ یاساغه‌

نه‌سلی به‌دی ڕاوچیانه‌

ده‌سا بێره‌ ژوورێ ، گوڵم