ڕازی په‌نهان

به‌ندی عه‌لی .. 2010

-1-

پێده‌چێ من

له‌هه‌ساره‌ی دۆزه‌خه‌وه‌ هاتبێتم

ئه‌گه‌ر نا ، بۆ

فریشته‌ چاو سه‌وزه‌کانی

ئه‌م نیشتیمانی به‌هه‌شته

که‌یفان به‌ڕوخسارم نایه‌و

چڵێک له‌گوڵزاری میهری

یه‌زدانیشم پێ نابه‌خشن

-2-

ئه‌و شه‌وه‌ی به‌ختی چاو ڕه‌شم

له‌خه‌وا بوو

قه‌ده‌ر مه‌ست و گه‌روی گه‌ردوون

بۆنی باده‌ی لێوه‌ ئه‌هات

ئه‌و شه‌وه‌ غوربه‌ت به‌هه‌ڵه‌و

هه‌تاوه‌کو دره‌نگانێ

میوانێکی قیرسچمه‌ بوو

له‌مه‌یخانه‌ جه‌نجاڵه‌که‌ی چاره‌نووساو

منیش مه‌ی گێڕ

-3-

واهه‌ست ئه‌که‌م ، خه‌م و باده

له‌زۆر خاڵا وه‌کو یه‌ک بین

وه‌ک ، تامی تاڵی هه‌ردووکیان

وه‌ک ، ئالووده‌ بوونی روحم

به‌هه‌ردوکیان .. هه‌ردوکیانیش

کاتێ هزرم له‌خۆیانا نغرۆ ئه‌که‌ن

ئه‌مبه‌نه‌وه بۆ باخچه‌کانی مناڵی

بۆیه‌ هه‌رده‌م .. مه‌ستم به‌خه‌م

-4-

له‌و ڕۆژه‌وه‌ی

خاره‌ به‌خوێن تینووه‌کانی

سه‌ر لقی گوڵه‌ نه‌سرینه‌کان

له‌به‌ر نامه‌یه‌کی عیشق

فه‌توای تیرۆری په‌نجه‌یان بۆ ده‌رکردم

له‌و ڕۆژه‌وه‌

کۆچ بوو به‌دواهه‌مین پیشه‌ی

به‌ر له‌خانه‌نشین بوونم

له‌و ڕۆژه‌وه‌ ، له‌نێوان ژیان و مه‌رگا

هه‌ر خه‌ریکی هات و چوونم

-5-

دوێنێ ، دووری نێشتمانێک

پێکی دڵمی پڕ له‌باده‌ی غوربه‌ت ئه‌کرد

سنوورێکم .. له‌خه‌یاڵداو

له‌ئاوریشمی کرمی هه‌راش بۆ چنی بوو

نه‌خشه‌که‌شی له‌سه‌ر باڵی په‌پووله‌کان

نشتیمانێک له‌په‌شمه‌کی خه‌وی عیشق و

چلوره‌ی خه‌می سه‌ده‌یه‌ک نائومێدی

ئه‌مڕۆش خه‌می دۆزینه‌وه‌ی خودی خۆم و

مناڵه هاره‌که‌ی دوێنێ و

ترسی گه‌ڕانه‌وه‌م له‌نێو

سنوقی بێده‌نگی مه‌رگا

تووشی بیرچوونه‌وه‌م ئه‌که‌ن

-6-

له‌ئه‌مڕۆوه‌ ئیتر غوربه‌ت

سێبه‌ری جه‌سته‌ی شه‌که‌تی هه‌موومانه‌

گرنگ ئه‌وه‌ نیه له‌کوێین یان له‌کوێنین

له‌ئه‌مڕۆوه‌ ئیتر غوربه‌ت

دووری نێوان هه‌ر یه‌که‌مان له‌خودی خۆی

ئه‌کات به‌یه‌که‌ی پێوانه‌