فیلمی سینەمایی کوێستانی قەندیل، بەشداری لە نۆیەمین خولی فێستیڤاڵی فیلمی ئاسیایی چاوی سێهەم لە وڵاتی هیندستان دەکات.
فیلمی سینەمای کوێستانی قەندیل لە دەرهێنانی هونەرمەند تەها کەریمی و نواندنی هونەرمەندان د. قوتبەدین سادقی و جومەرد قارەمان و عەینەدین مەریوانی،لەمیا حسێن، کامەران رئوف دوای بەشداریکردنی لە فێستیڤاڵی فیلمی ئۆرەنسە لە وڵاتی ئیسپانیا، دەچێتە وڵاتی هیندستان.
کوێستانی قەندیل چیرۆکی خوشەویستی سێ فەقێ مزگەوتێکە کە لە ژیان و خوشەویستی ئەوانەوە دەچێتە ناو ژیانی دەیان دایکی رۆڵە وون بووی کورد و تورک و عەرەب و فارس لە ناوچەیەکی وەک کوێستانی قەندیل، ئێستا ئەم چیرۆکە لە میانەی نەویەمین فێستیڤاڵی فیلمی چاوی سێهەم لە شاری مومبای لە ولاتی هیندستان نمایش دەکرێت. فێستیڤاڵی چاوی سێهەم لە لایەن ناوەندی فیلمی ئاسیا لە بۆمبای لە ساڵی 2002 دامەزراوە و تایبەتە بە دەرهێنەرەکانی کیشوری ئاسیا، کە لە سێ بەشی پێکهاتووە، بەشی کێبەرکێی فیلمی درێژی یەکەم، بەشی کێبەرکێی فیلمی درێژی دووهەم و بەشی کورتە فیلمەکان. بە مەبەستی خستنەروی توانای دەرهێنەرە ئێرانیەکان بەرپرسانی فێستیڤاڵ لەم خولەدا بەشێکیان بۆ نمایشی فیلمی دەرهێنەرە ئێرانیەکان کردۆتەوە کە زیاتر لە 20 فیلمی دەرهێنەرانی ئێرانی تێدا نمایش دەکرێت کە فیلمی کوێستانی قەندیل یەکێکە لەو فیلمانە.
ئەو فێستیڤاڵە لە رۆژانی 28 ئۆکتۆبەر تا 4 نۆڤامبەر لە شاری بۆمبای لە وڵاتی هیندستان بەرێوە دەچێت و یەکێکە لە فێستیڤاڵە دیارەکانی ئەو وڵاتە کە کار لەسەر خستنەرووی هونەرمەندانی بواری سینەما دەکات، ماڵپەری رەسمی فێستیڤاڵ سەبارەت بە بەرێوە چوونی ئەو فستیڤاڵە ئاماژە بە توانای دەرهێنەرانی کیشوری ئاسیا دەکات لە وەرگرتنی خەڵاتی فێسیڤاڵە جیهانیەکاندا، لە کاتێکدا ئاسیا خۆی نەیتوانیوەی بینەری تایبەتمەند دروست بکات و فێستیڤاڵی چاوی سێهەم بە هەوڵێک ناو دەبات لەو پێناوەدا.
فیلمی کوێستانی قەندیل بەرهەمی بەرێوەبەرایەتی هونەری سینەمای سلێمانی سەر بە وەزارەتی رۆشنبیری و لاوانی حکومەتی هەرێمی کوردستانە کە لە لایەن کۆمپانیای ستاک فیلم لە شاری تاران کاری بڵاوکردنەوەی بۆ دەکرێت، لە شاری سلێمانی و دەوروبەری وێنەی گیراوە.
کوێستانی قەندیل
دەرهێنەر: تەها کریمی
ئەکتەرەکان: د. قوتبەدین سادقی، جومەرد قارەمان، عەینەدین مەریوانی، لەمیا حسێن، میوانی بەرهەم کامەران رئوف
وێنەگر : کەیوان یوسفی
مونتاژ: محەمەدرەزا وەتەندوست
مۆسیقا: فەردین خەلعەتبەری
بەرێوەبەری بەرهەم: عەبدورەحمان محەمەد
راگەیاندن: هاوڕێ کەریمی
