چرپه‌کانی شه‌وێک

به‌ندی عه‌لی .. 2011

چرپه‌کانی شه‌وێک

ته‌نیایی

کزه‌بایه‌کی بێ شه‌رمی سرکه‌و

خۆ ئه‌گه‌ر ژیان

جه‌نگه‌ڵێکی به‌یه‌کداچووی چڕیش بێ

ئه‌و به‌نێو لاقی

دره‌خته‌کانی ڕۆژگارا دزه‌ ئه‌کاو

ژێر کراسی نهێنیه‌کان هه‌ڵئه‌داته‌وه

له‌و ساتانه‌داو

له‌ئاوێنه‌ی چاوی حه‌شاماتا

واهه‌ست ئه‌که‌م .. ڕووت و قووتم

غه‌ریبی

هه‌ر ئه‌وه‌نده‌ی بووه‌ هاوڕێت

ئیتر ئه‌بێته‌ سێبه‌رو لێت ناگه‌ڕێت

لای ئه‌و ، گرنگ نیه‌ له‌کوێی

ڕه‌دووشی که‌وی نایگری و

ناتوانی له‌ده‌ستی هه‌ڵدێی

شکۆی سێبه‌ری ئاسایی له‌ژێر خۆرا

خۆی ئه‌نوێنی

ئه‌م سێبه‌رێکی بێ عاره‌و

شه‌وان زیاتر

به‌روحه‌وه‌ خۆی ئه‌لکێنێ

غرور

کێوه‌ به‌فرێکی لوت به‌رزی

له‌خۆبایی

له‌سه‌ر پشتی زه‌ریایه‌که

نه‌رم ، به‌ڵام

بێ متمانه‌و ناخ وروژاو

تا له‌باوه‌شی ته‌ما بێ

سه‌ربازێکی پڕ غیره‌ته‌و

له‌گه‌ڵ ڕێژنه‌ بارانیشا

سازشکارێکی زۆر عه‌ییار

که‌چی ئه‌ژنۆی دێته‌ له‌رزین

به‌دزه‌ نیگایه‌کی هه‌تاو

یادگاری

هه‌ندێ هێڵی پچڕ پچڕ

ئه‌مانه‌وێ به‌یه‌کیانی بگه‌یه‌نین

هه‌ندێ توله‌ڕێی ته‌ماوی

گه‌ره‌کمانه‌ به‌هیمه‌تی مۆمێکه‌وه‌

به‌سه‌ریانا بڕۆینه‌وه‌

هه‌ندێ په‌ڵه‌ خه‌وی گه‌واڵ

ئاره‌زوومانه‌ بای شه‌ماڵ

به‌لوتفی خۆی

له‌یه‌کتریان گرێ بداو

ببن به‌زینده‌خه‌وێکی هه‌میشه‌که‌سک

مه‌راقێکی پاییزی ته‌مه‌نیشه‌ بۆ

کۆکردنه‌وه‌ی ده‌نکه‌ هه‌ڵوه‌ریوه‌کانی

هه‌ناری مێخۆشی لاوی

وه‌لێ .. حه‌یفێ

خه‌مۆکی

که‌تاری دڵ هه‌ر میلۆدیی ناڵه‌ لێدا

ده‌روون هه‌ر جامێکی پڕ بێ

دییه‌ش هه‌ر سه‌یلی جوێباری له‌به‌ر بڕوا

گه‌ڵای لێو موحتاجی ماچی

کوڵمی دڕک و

ئه‌وه‌ی سینه‌ش هه‌ڵیده‌مژێ گڕی ئاخ و

ئه‌وه‌ی ئه‌یداته‌وه ، بۆسۆی

خه‌ڵوزی قه‌قنه‌سی ناخ و

که‌روح ته‌نیا به‌هه‌ڵفڕین ئاسووده‌ بێ

که‌لله‌ش هه‌ر به‌کۆنه‌ باده‌ی

بیرچوونه‌وه‌ ئالووده‌ بێ

که‌گوڵ له‌داڵانی دڵدا کرێچی بێ

ئیتر تامی شه‌ربه‌تی عیشق

ئه‌بێ چی بێ

هیوا

ده‌نکه‌ یاقوتێکی ووردی

نێو سه‌ده‌فێک ، ڕه‌قتر له‌به‌رد

دێر زه‌مانه

له‌قوڵایی زه‌ریایه‌کی ترسناکا

ماسیه‌کی ئه‌فسووناوی قووتی داوه

ئه‌م دڵه‌ سه‌رکه‌شه‌ی منیش

له‌که‌ناری هه‌موو خه‌مه‌کانی ژینا

وه‌ک پیره‌ ڕاوچیه‌کی بێ عار

عومرێکه‌ سه‌رقاڵی ڕاوه