مەنسوور جیهانی ـ براوەکانی بەشە جۆراوجۆرەکانی بەشی پێشبڕکێی “سینەمای جیهان” و بەشی پێشبڕکێی “سینەمای کوردی” هەشتەمین خولی فێستیڤاڵی نێودەوڵەتی فیلمی “دهۆک” دیاریکران.
ڕێوڕەسمی کۆتایی هەشتەمین خولی فێستیڤاڵی نێودەوڵەتی فیلمی “دهۆک” Duhok بە یادی سینەماکاری هەرمانی کورد “یەڵماز گۆنای” Yılmaz Güney دەرهێنەری براوەی خەڵاتی گەورەی “چڵە خورمای” فێستیڤاڵی نێودەوڵەتی فیلمی “کان”ی فەڕەنسا (1982) و بە ئامادەبوونی دکتۆر “عەلی تەتەر” پارێزگاری دهۆک، “ئەمیر عەلی محەمەد تاهیر” سەرۆکی فێستیڤاڵی نێودەوڵەتی فیلمی “دهۆک”، “شەوکەت ئەمین کورکی” دەرهێنەری هونەری ئەم فێستیڤاڵە، ئەندامانی لێژنەی دادوەرانی بەشی پێشبڕکێی “سینەمای جیهان” و بەشی پێشبڕکێی “سینەمای کوردی”، سینەماکارانی بەشداربوو لەم ڕووداوە سینەماییە و هۆگرانی هونەری سینەما لە هۆڵی “کۆنگرە”ی زانکۆی دهۆک لە شاری دهۆک لە هەرێمی کوردستان بەڕێوەچوو و براوەکانی بەشە جۆراوجۆرەکان ڕاگەیێندران و خەڵاتی زێڕینی “گەلای مێو” و خەڵاتی نوقەرەیی “گەلای مێو”ی ئەم فێستیڤاڵە، لەوحەی فەخری و هەروەها خەڵاتی نەقدیی بەسەریاندا دابەشکرا.
بەشی پێشبڕکێی “سینەمای جیهان”:
ئەندامانی لێژنەی دادوەرانی بەشی پێشبڕکێی “سینەمای جیهان”ی هەشتەمین خولی فێستیڤاڵی نێودەوڵەتی فیلمی “دهۆک” کە بریتی بوون لە: “سەدیق بەرمەک” Siddiq Barmak دەرهێنەر و بەرهەمهێنەر لە وڵاتی ئەفغانستان (سەرۆکی لێژنەی دادوەران)، “فەیاز دۆمان” Feyyaz Duman ئەکتەر لە تورکیا، “حەسەن عەلی” Heseen Ali دەرهێنەر لە هەرێمی کوردستان، “هێڤین ئیل ـ سیندی” Havin Al-Sindy بەڕێوەبەری هونەری لە وڵاتی ئەڵمانیا و “موهەنەد حەیال” Mohanad Hayal دەرهێنەر لە عێراق، دەنگەکانی خۆیان بەم شێوەیە ڕاگەیاند:
ـ خەڵاتی “یەڵماز گۆنای” Yılmaz Güney بە فیلمی سینەمایی “ژیان” Jiyan لە دەرهێنانی “سوهەیلا شۆنک” Süheyla Schwenk لە وڵاتی ئەڵمانیا بەخشرا.
ـ خەڵاتی تایبەتی لێژنەی دادوەرانیش بە فیلمی سینەمایی “نامۆ” The Alien لە دەرهێنانی “نادر ساعی وەر” لە ئێران پێشکەش کرا.
بەشی پێشبڕکێی “سینەمای کوردی”:
ئەندامانی لێژنەی دادوەرانی بەشی پێشبڕکێی “سینەمای کوردی” ئەم فێستیڤاڵە کە بریتی بوون لە: “حوسێن تەباک” Hüseyin Tabak سیناریۆنووس و دەرهێنەر لە وڵاتی ئەڵمانیا (سەرۆکی لێژنەی دادوەران)، “دیرک شێفێر” Dirk Schafer دەرهێنەر و مونتێر لە وڵاتی ئەڵمانیا، “ئێلیس وان مارکە” Elise Van Marcke بڵاوکەرەوە و بەرهەمهێنەر لە وڵاتی ڕۆمانی، “ساڵم سەڵەواتی” دەرهێنەر لە ئێران و خاتوو “زوبێدە بۆلۆت” Zübeyde Bulut ئەکتەر لە تورکیا، دەنگەکانی خۆیان بەم شێوەیە ڕاگەیاند:
ـ خەڵاتی باشترین دەرهێنان بە “ئەرسەلان ئەمیری” بۆ دەرهێنانی فیلمی سینەمایی “زاڵاوا” Zalava لە ئێران بەخشرا.
ـ خەڵاتی باشترین ئەکتەری پیاو بە “نەوید پوورفەرەج” بۆ ڕۆڵ بینین لە فیلمی سینەمایی “زاڵاوا” لە ئێران پێشکەش کرا.
ـ خەڵاتی باشترین ئەکتەری ئافرەت بە خاتوو “مریەم بووبانی” بۆ ڕۆڵ بینین لە فیلمی سینەمایی “زەماوەندی عەلی و زەین” The Dance of Ali and Zin لە ئێران بەخشرا.
ـ خەڵاتی باشترین فیلم بە فیلمی سینەمایی “سەدیق و پڵینگ” Sidik and the Panther لە دەرهێنانی “رۆبێر دۆسکی” Reber Dosky لە وڵاتی هۆڵەندا پێشکەش کرا.
ـ خەڵاتی باشترین سیناریۆ بە فیلمی سینەمایی “پارێزەریی برا” Brother‘s Keeper لە نووسینی هاوبەشی “گوڵستان ئاکێت” Gülistan Acet و “فەرید کاراهان” Ferit Karahan لە تورکیا بەخشرا.
ـ خەڵاتی تایبەتی لێژنەی دادوەرانیش بە “هەڵۆ ڕامشتی” Hello Ramshtî ئەکتەری فیلمی سینەمایی “نیشتمانی پیس” Dirty Land لە هەرێمی کوردستان پێشکەش کرا.
بەشی پێشبڕکێی “کورتە فیلم”:
ئەندامانی لێژنەی دادوەرانی بەشی پێشبڕکێی “سینەمای کوردی” هەشتەمین خولی فێستیڤاڵی نێودەوڵەتی فیلمی “دهۆک” کە بریتی بوون لە: “کامیلا لارسۆن” Camilla Larsson بەڕێوەبەریی سندووقی نوێی نێودەوڵەتی فێستیڤاڵی فیلمی “یۆتۆبۆری” Goteborg لە وڵاتی سوید (سەرۆکی لێژنەی دادوەران)، “ئاپۆ بازیدی” Apo Bazidi دەرهێنەر لە تورکیا و خاتوو “زەهرا غەندۆر” Zahraa Ghandour ئەکتەر لە عێراق، دەنگەکانی خۆیان بەم شێوەیە ڕاگەیاند:
ـ خەڵاتی باشترین فیلمی کوردی بە کورتە فیلمی “حەوت سەمفۆنیای زاگڕۆس” Seven Symphonies of Zagros لە دەرهێنانی “پەرویز ڕۆستەمی” لە ئێران بەخشرا.
ـ خەڵاتی باشترین فیلمی نێودەوڵەتی بە کورتە فیلمی “ڕیکۆردی گەورەی ئیستانبوول” The Great Istanbul Depression لە دەرهێنانی “زێنەب دیلان سۆرێن” Zeynep Dilan Süren لە تورکیا پێشکەش کرا.
ـ خەڵاتی تایبەتی ئەندامانی لێژنەی دادوەرانیش بە کورتە فیلمی “بێدەنگ” Silence لە دەرهێنانی “بڕوا وەهاپور” لە ئێران بەخشرا.
بەشی پێشبڕکێی “بەڵگەفیلم”:
ئەندامانی لێژنەی دادوەرانی بەشی پێشبڕکێی “بەڵگەفیلم”ی ئەم خولەی فێستیڤاڵی نێودەوڵەتی فیلمی “دهۆک” کە بریتی بوون لە: “تەلال دێرکی” Talal Derki دەرهێنەر لە ڕۆژئاوا، خاتوو “باوی یاسین” Bavi Yasin دەرهێنەر و بەرهەمهێنەر لە وڵاتی بەلژیکا و “شەماڵ سەبری” Shamal Sabri بەرهەمهێنەری سەربەخۆ و بەرپرسی نووسینگەی ئەنستیتۆی ئەڵمانی “گۆتە” لە هەرێمی کوردستان، دەنگەکانی خۆیان بەم شێوەیە ڕاگەیاند:
ـ خەڵاتی باشترین بەڵگەفیلمی کوردیی بە فیلمی دیکۆمێنتی “نانی پیرۆز” Holy Bread لە دەرهێنانی ڕەوانشاد “رەحیم زەبیحی” و لە بەرهەمهێنانی “توورەج ئەسڵانی” لە ئێران بەخشرا.
ـ خەڵاتی باشترین بەڵگەفیلمی نێودەوڵەتی بە فیلمی دیکۆمێنتی “ئەو بەریی ڕووبار” The Other Side of the River لە دەرهێنانی “ئانتۆنیا کیلیان” Antonia Kilian بەرهەمی هاوبەشی وڵاتانی ئەڵمانیا و فینلەندا پێشکەش کرا.
خەڵاتی فیپێڕشی:
ئەندامانی لێژنەی دادوەرانی فیدڕاسیۆنی نێودەوڵەتی ڕخنەگرانی فیلم “فیپێڕشی” FIPRESCI ئەم فێستیڤاڵە کە بریتی بوون لە: دکتۆر “ییلماز ئۆزدیل” Yılmaz Özdil ڕخنەگری سینەما و مامۆستای زانکۆ لە تورکیا، “هینک بوڤێکێرک” Henk Bovekerk ڕۆژنامەنووسی سینەمایی لە وڵاتی هۆڵەندا و “ئیکسێل تیمۆ پۆٌڕ” Exel Timo Purr سەرنووسەر لە وڵاتی ئەفریقای باشوور؛ خەڵاتی فیپێڕشیان بە فیلمی سینەمایی “زەماوەندی عەلی و زەین” The Dance of Ali and Zin لە دەرهێنانی “محەمەد عەلی کۆنار” Mehmet Ali Konar لە تورکیا پێشکەش کرد.
فێستیڤاڵی نێودەوڵەتی فیلمی “دهۆک” ئەندامی باوەڕپێکراوی ڕێوڕەسمی پێشکەشکردنی خەڵاتەکانی ئسکرین “ئاسیا پەسیفیک” ناسراو بە “ئۆسکاری ئاسیا” APSA لە وڵاتی ئۆستوڕاڵیایە و لە ئاستی وڵاتی عێراقدا بەرهەمە سینەمایی و بەڵگەفیلمەکان بەم ڕووداوە گرینگە سینەماییە دەناسێنێت.
فێستیڤاڵی نێودەوڵەتی فیلمی “دهۆک” بە سەرۆکایەتی “ئەمیر عەلی محەمەد تاهیر” و بە دەرهێنانی هونەری “شەوکەت ئەمین کورکی” بە یادی سینەماکاری هەرمانی کورد “یەڵماز گۆنای” Yılmaz Güney دەرهێنەری براوەی خەڵاتی گەورەی “چڵە خورمای” فێستیڤاڵی نێودەوڵەتی فیلمی “کان”ی فەڕەنسا (1982) و بە مەبەستی پردی پەیوەندی نێوان دەرهێنەرە کوردەکان و سینەماکارانی سەرتاسەری جیهان و هەروەها ڕەخساندنی ئاڵووگۆڕی کەلتووری نێوان نەتەوەکانی دنیا دامەزراوە.
هەشتەمین خولی ئەم فێستیڤاڵە، بە نمایشی 94 بەرهەم، لە چوارچێوەی فیلمە بڵیندە سینەماییەکان، کورتە فیلم و بەڵگەفیلمەکان لە چەندین بەشی پێشبڕکێی و دەرەوەی پێشبڕکێی لەوانە: بەشی پێشبڕکێی “سینەمای جیهان”، واتە: 9 فیلمی بڵندی سینەمایی، 5 بەڵگەفیلم و 9 کورتە فیلم، بەشی پێشبڕکێی “سینەمای کوردی”، واتە: 6 فیلمی بڵندی سینەمایی، 6 بەڵگەفیلم و 12 کورتە فیلم، بەشی “ڕوانینێک بە سینەمای جیهان”، واتە: 8 فیلمی بڵندی سینەمایی، 4 بەڵگەفیلم و 7 کورتە فیلم، بەشی “پانۆڕامای سینەمای کوردی”، واتە: 17 کورتە فیلم، بەشی “نمایشی تایبەت بە سینەمای ئەفغانستان” 8 فیلمی بڵندی سینەمایی و هەروەها بەشی “نمایشی تایبەت بە سینەمای کوردستان” 4 فیلمی بڵندی سینەمایی لە شاری دهۆک لە هەرێمی کوردستان بەڕێوەچوو.
بۆ زانیاری زیاتر:
