سەردار جاف / ئەڵمانيا لەم رۆژانە و بە دياریکراوی ڕۆژی ١٢/ ٥/ ٢٠٢٢ لە هوتێل ڕۆتانە ديدارێکی زانستی سەبارەت بە پرۆگرامی خوێندن بۆ پۆلی يەکی بنەڕەتی سازدرا، بە داخەوە لەوێ نەبووم، ئەوەی دوور بە دوور لێی بە ئاگا بووم، برادەرێک بە ناوی فرياد فازڵ گوايە داهێنانێکی تازەی داهێناوە، کتێبێکی نوێی پێشکەشی وەزارەتی پەروەردەی حکومەتی هەرێمی کوردستان کردووە بۆ ئەوەی ببێتە وانەی خوێندنی کوردی بۆ ئەو پۆلەی لە سەرەوە ئاماژەمان پێداوە، جگە لە هەندێ بڕگەی زياد کراو بۆ کتێبەکەی ڕەوانشاد ئەمين باڵدار هيچی ديکەی تێدا بە دی ناکرێ، لەم سۆنگەيەوە ئێمە بۆ خۆمان تێبینی و سەرنجی تايبەتمان هەيە، بە هۆی ئەو بەرەڵاییەی لە رێنوس و بواری زمانەوانی هەيە، وای لێهاتووە پیتەکانيش ڕەنگاوڕەنگکراون، بۆيە هەڵويستەی دڵکارانەی لە ئاست وەردەگرين، ناکرێ لە ئێستاوە ( مەبەستم لە ئێستا… قۆناغی يەکی بنەڕەتييە) مناڵەکان و نەوەی دادێ بەو جۆرە سەقەتە پەروەردە بکرێ، هەڵبەتە مەبەستم ميتۆدی خوێندنەکە نييە، مەبەستم لەوەيە رەنجی باڵدار و کەسانی دیکە بدرێ بە کەسێکی دی، ئێمە زۆر پێويستمان بە پرۆگرامێکی سەرەتايی هەيە، هەتاوەکو نەوەيەکی ساغلەم بۆ نيشتيمانەکەمان پەروەردە بکەين، بزانە چ تاوانێکە منداڵی کورد وا تێبگەيەنرێ کە ئەوەی هەيە بەرهەمی باڵدار نييە و کەسێکی دی هاتۆتە سەر سفرەی ئامادەکراو و لە خوانەکەی دەخوا، زمان کۆڵەکەی هەم نەتەوە و هەم کەڵچەڕەکەيەتی، پێم وابێ ئەم بێسەر و بەرييەی زمانی کوردی گرتۆتەوە لە دەرئەنجامی ئەم جۆرە کۆڕ و ديدار و سمينارانەيە کە لەو ديو دەرگا داخراوەکانەوە ساز دەدرێ، با هيچ کەسێ وا تێنەگات دنيا سەرگەردانييە و هەر کەس بۆ خۆيەتی، مرۆڤ وا هەست دەکات کە کەسێک دەخرێتە پێشەوە لە ئاکامی قاڵبوويەتی نييە، وەلێ دۆراندۆرەکەيە و لە چوارچێوەی (( المحسوبية و المنسوبية )) ناترازێ، رێک ڕووپەرمایی و خۆچەماندن نيشان دەدا، سەرکەوتن بە سەر گازەرەی پشتی ئەم و ئەو گەرەکە پێی بوترێ ستۆپ تائێرە و بەس، سڕێنەوەی ناوی ئەوانەی رۆژگارێکی زۆر زۆر خزمەت بە زمان و خوێندنی کوردی کردووە جگە لەوەی تاوانێکە و هيچ پاساوێک هەڵناگرێ، ئەوا لە کتێبە نوێیەکەيشدا تازەگەرێتییەکی تێدا نابينی جگە لە جوینەوەی رابردوو.
لێرەوە ڕووی ئاخاوتنمان دەکەينە وەزيری پەروەردە و پێی دەڵێین ئامانەتێکی گەورەتان لە ئەستۆ دايە و ناکرێ کارێکی وا بکەن قەڵەمی نوسەر و ڕەخەگر و پسۆری بوارەکە لێتان بێتە دەنگ و بەزەیی پێتاندا نەيەتەوە، بە پێچەوانەيشەوە مێژوويەکی پاک بۆخۆتان تۆمار دەکەن، کە نها ناوی چاکەکاری بەڕێوەبردنتان سنووری وڵاتی بەزاندووە، با ( العد التنازلی ) دەست پێنەکات، هەرچەندە کەمێکی وا تێگەيەنراوم کە وەزير بەم ديدارەوە ڕاناوەستێ، بە هيواين پرۆگرامی خوێندن ئەو ڕەوتە پاکەی بگرێتە بەر کە هەموو خودان قەڵەمی بە حەسرەتن بۆی، لەم دەرگاوە واسيتە و خاتر و خۆتر نەخوا، گرينگ بوژانەوەی پرۆگرام بێت، قسە زۆرە و بەم چەند دێرە کۆتایی پێدێنم، لێرە و لەوێ خەلکی غەيرە کورد و رۆژنامەوانيش گەواهی ئەوە دەدەن کە کورد سەرباری ئەوە بە درێژایی مێژوو لە لايەن دوژمنەکانییەوە سەرکوت دەکرێ و گەمارۆ دراوە کەچی زمانەکەی خۆی لە دەست نەداوە ماوە و گەشەی پێداوە، لە خۆڕاییش نییە زمانزانەکانمان پەنايان بۆ زمانی لادێی دەڤەرە جياجياکان بردووە، چونکە پاکی زمان وا لەوێ.
