مه‌نسوور جیهانی ـ فیلمی سینه‌مایی “پارازیت” (مشه‌خۆر) براوه‌ی خه‌ڵاتی چڵه خورمای زێڕینی باشترین فیلمی حه‌فتاودووهه‌مین خولی فێستیڤاڵی نێونه‌ته‌وه‌یی فیلمی “کان”ی فه‌ڕه‌نسا له چوارەمین خولی فێستیڤاڵی فیلمی نێودەوڵەتی “سلێمانی” چووه سه‌ر په‌رده و خه‌ڵاتی سنه‌وبه‌ری باشترین ده‌قی سیناریۆی فیلمی به‌ده‌ستهێنا.
بە پێی ڕاپۆڕتی لێژنەی ڕاگەیاندنی گشتیی چوارەمین خولی فێستیڤاڵی فیلمی نێودەوڵەتی سلێمانی، فیلمی سینه‌مایی “پارازیت” (مشه‌خۆر) PARASITE له ده‌رهێنانی “بۆنگ جوون ـ هۆ” Bong Joon-ho له وڵاتی کۆریای باشوور براوه‌ی خه‌ڵاتی چڵه خورمای زێڕینی باشترین فیلمی حه‌فتاودووهه‌مین خولی فێستیڤاڵی نێونه‌ته‌وه‌یی فیلمی “کان”ی فه‌ڕه‌نسا، له به‌شی رکابه‌ریی سه‌ره‌کیی “سینه‌مای جیهان” له چوارەمین خولی فێستیڤاڵی فیلمی نێودەوڵەتی “سلێمانی” Slemani له هۆڵی سینه‌ما سالم له شاری سلێمانی پایته‌ختی فه‌رهه‌نگ و هونه‌ری هه‌رێمی کوردستانی عێراق چووه سه‌ر په‌رده و خه‌ڵاتی سنه‌وبه‌ری زێوینی ئه‌م به‌شه‌ی فێستیڤاڵه‌که به “بۆنگ جوون ـ هۆ” Bong Joon-ho و “هان جین ـ وون” Han Jin-Won بۆ نووسینی ده‌قی سیناریۆی فیلمی ئه‌م به‌رهه‌مه سینه‌ماییه پێشکه‌ش کرا.
فیلمی سینه‌مایی “پارازیت” (مشه‌خۆر) که ئه‌مساڵ پڕفرۆشترین فیلم له نێوان هه‌موو براوه‌کانی چڵه خورما له گیشه‌ی جیهانییدا بۆ خۆی مسۆگه‌ر کرد؛ له لایه‌ن وڵاتی کۆریای باشوور له لقی باشترین فیلمی زمانی بیانی بۆ نه‌وه‌دودووهه‌مین خولی خه‌ڵاته‌کانی ئه‌کادیمیای ئۆسکار له ساڵی 2020 ناسێندرا.
ئه‌ندامانی ده‌سته‌ی ناوبژیوانی به‌شی رکابه‌ریی سه‌ره‌کیی “سینه‌مای جیهان” (نێونه‌ته‌وه‌یی) پێکهاتوو له به‌رهه‌مه‌کانی نێونه‌ته‌وه‌یی و نه‌ته‌وه‌یی چواره‌مین خولی فیستیڤاڵی فیلمی نێونه‌ته‌وه‌یی “سلێمانی” بریتی بوون له؛ “هینز هێرمانس” Heinz Hermanns ده‌بیر و به‌رپرسی فیستیڤاڵی نێونه‌ته‌وه‌یی فیلمی CEO و ده‌بیر و به‌رپرسی فیستیڤاڵی نێونه‌ته‌وه‌یی کورته فیلمی به‌رلین ـ سه‌رۆکی ده‌سته‌ی ناوبژیوانی ئه‌م فێستیڤاڵه له وڵاتی ئه‌ڵمانیا، خاتوو “پووران دره‌خشه‌نده” سیناریۆنووس، ده‌رهێنه‌ر و به‌رهه‌مهێنه‌ر له وڵاتی ئێران، “ئادریان بیلچ” Adrian Belic ـ ده‌رهێنه‌ر، به‌ڕێوه‌به‌ری وێنه‌هه‌ڵگرتنی فیلم و به‌رهه‌مهێنه‌ر له وڵاتی ئه‌مه‌ریکا، “یوهانی ئالێنین” Juhani Alanen ـ به‌ڕێوه‌به‌ری جێبه‌جێکاری فیستیڤاڵی نێونه‌ته‌وه‌یی فیلمی “ته‌مپره” Tampere له وڵاتی فینله‌ندا و خاتوو “زولفیه ئاکولاک” Zülfiye Akkulak ـ به‌ڕێوه‌به‌ری فیلم و راگه‌یاندن له وڵاتی ئه‌ڵمانیا.
چواره‌مین خولی فێستیڤاڵی فیلمی نێوده‌وڵه‌تی “سلێمانی” له لایه‌ن کۆمپانیای سینه‌مایی “مه‌ستی فیلم” به به‌ڕێوه‌به‌رایه‌تی “فوئاد جه‌لال”، به سه‌رۆکایه‌تی “مه‌لا به‌ختیار” به‌رپرسی به‌شی پاڵپشتیی ئه‌م فێستیڤاڵه و له که‌سایه‌تییه‌کانی به‌رجه‌سته‌ی سیاسیی هه‌رێمی کوردستانی عێراق، به به‌ڕێوه‌به‌رایه‌تی هونه‌ریی “دانه‌ر عومه‌ر فارس” و به به‌ڕێوه‌به‌رایه‌تی به‌رنامه‌داڕشتنی خاتوو “لینا ره‌زا” و به نمایش کردنی 134 فیلم له ده‌رهێنه‌ره‌کانی ٧9 وڵاتی جیهان؛ له دوو به‌شی رکابه‌ریی سه‌ره‌کیی “سینه‌مای جیهان” (نێوده‌وڵه‌تی) و به‌شی رکابه‌ریی “سینه‌مای کوردی” (نه‌ته‌وه‌یی) و هه‌روه‌ها سازدانی په‌نێلی “شێرپه‌نجه‌ی زه‌وی” و په‌نێلی به‌رهه‌مهێنانی هاوبه‌ش واته “ده‌زگای فیلم”؛ له 5 هۆڵی “سیتی سینه‌ما”، “سینه‌ما سالم”، هۆڵی “ئه‌منه سووره‌که” و هه‌روه‌ها له ته‌لاری “هونه‌ر” له شاری سلێمانی له هه‌رێمی کوردستانی عێراق به‌ڕێوه‌چوو.
وێنه و فۆتۆکان: مه‌نسوور جیهانی
بەڕێوەبەرایەتی ڕاگەیاندنی گشتیی فێستیڤاڵی فیلمی نێودەوڵەتی سلێمانی.
