وه‌رزی بارینی تفه‌نگ

به‌ندی عه‌لی .. به‌هاری 2011

ئه‌م به‌هاره

له‌به‌هاره‌کانی تر ناچێت

ئه‌م ئازاره‌ش

له‌ئازاره‌کانی تر ناچێت

ئه‌م به‌هاره‌

شه‌قامه‌کانی ئه‌م شاره

چنراون به‌تۆڕی بوغزو

گۆڕه‌پانه‌ گشتیه‌کانی

چێنراون به‌تۆوی تفه‌نگ

ئه‌وه‌ی هه‌موو به‌یانیانێ

قژی سه‌وزی دره‌خته‌کان ئه‌شواته‌وه‌

دڵۆپه‌ مرواریه‌کانی شه‌ونم نیه‌

فرمێسکی پاساریه‌کانه

بۆ مه‌رگی زه‌ڕنه‌قووته‌کان

ئه‌وه‌ی ده‌مه‌و ئێوارانیش به‌ئاسمانا

گوزه‌ر ئه‌کات

سروه‌باکه‌ی جاران نیه‌

هه‌ڵاوی گه‌رمی نه‌فه‌سی عیزره‌ئیله‌و

زه‌نگی کۆتایی دوا وانه‌ی

قوتابخانه‌ی ژین لێ ئه‌دات

ئه‌م به‌هاره

له‌گه‌ڵ هه‌ر چه‌خماخه‌یه‌کا

دڵم وه‌ک شه‌قشه‌قه‌ی مناڵ

دێته‌ له‌رزین

چونکه‌ ئه‌ترسم گشت جارێ

له‌هه‌ر په‌ڵه‌ هه‌ورێکه‌وه‌

ڕێژنه‌بارانێ له‌تفه‌نگ بێته‌خوارێ