دەنگ پرێس _ هاوكار نامۆ :هونەرمەندی میوزیسیان (هەڵكەوت زاهیر) كە خاوەنی چەندین كار و پرۆژەی هونەرییە، لە دیدارێكی تایبەتی لەگەڵ (دەنگ)دا وەڵامی هەموو ئەو كەسانە دەداتەوە كە قسەی زبر و نایاسایی لەسەر دەكەن و هەروەها باس لە چەندین لایەنی گرنگی هونەری و ژیانی تایبەتی خۆی دەكات
هونەرمەند لە دایك بووی شاری سلێمانیە, پەیمانگای هونەرەجوانەكانی سلێمانی بەشی موزیكی تەواوكردووە، خوێندنی ئەكادیمیای باڵای موزیك لە ئەڵمانیا تەواو كردووە، دكتۆرای فەخری لە كۆنسورفاتواری قاهیرە وەرگرتووە, خاوەنی زیاتر لە30 ئەلبومی گۆرانییە و نزیكەی 450 گۆرانی داناوە تا ئێستا 4 ئەلبومی شیعری و موزیكی دروستكردووە بۆ ڕەنج سەنگاوی و حەمە سەعید حەسەن و مەهاباد قەرەداغی, هەروەها ئەلبومێك بۆ هونەرمەندی گەورە سعاد حسنی موزیكی بۆداناوە،ئێستا خەریكی تەواوكردنی دكتۆرایە، زۆرترین ڕێژەی گۆرانیبێژی ئافرەت لەسەر دەستی ئەو هاتونەتە نێوگۆرانی وتن لە كوردستاندا.
دەنگ:پۆستی ئێستات لە كابینەی تازەی حوكمەتدا چی یە؟
+ من ڕاوێژكارم لە سەرۆكایەتی ئەنجومەنی وەزیران.
دەنگ: بۆچی هەمیشە هێمن و بێدەنگی لەسەر ئەو لێشاوە ئیعلامییەی لەسەرتە؟ پێتوانییە ئەم بێدەنگییەت زەرەرت پێ بگەیەنێت، زیاتر رێگاخۆشكەر بێت ئەو لێشاوە(فشار)ە؟
+ من مرۆڤێكی ئارامم سروشتی من وایە، پێموانییە دەبێت مۆرڤ خۆی توڕە بكات لە ئاستی هەندێ قسەی بەرزو نزم گرنگ ئەوەیە بزانی كێ قسە لەسەرت ئەكات هەركات كەسێكی شایستەی گۆێ گرتن بێت قسە بكات لەسەر من ئەوكات هەوڵئەدەم بزانم چییەو تا سوود لە ڕەخنە كانی وەرگرم بەڵام تا ئێستا من تەشهیرم پێكراوە . كەسانێكی وەها نەبوون تا گرنگیان پێ بدەم دواتر ڕەخنەگری بواری موزیكمان نییە زۆر دوورن لەوەی بگەنە ئەو ئاستە هێشتا لە كارەكانی من تێ بگەن تەنها لەلایەن چەند كەسانێك كە لە بواری هونەر كاردەكەن یاخود نزیكن لەوانە من زیاتر لە 7000000 حەوت سەد هەزار لایەنگرم هەیە لە ناو كوردستان، ڕۆژانە بە چەندین ئیمێڵ دەستخۆشی و لایەنگری خۆیانمان بۆ دەردەبڕن و بێ گومان هەموو گۆڕانكارییەك لە كۆمەڵگادا تووشی ڕەخنەو تانە دەبیتەوە من زۆر بەئاسایی دەبینم ئەگەر ئەو جۆرە بیركردنەوەیە نەبووایە بە ئاساییم نەدەبینی كاركردنم ماندوو بوون جەزای خۆی هەیە، من قبوڵم كردووە قەتیش بێزار نابم بەوەی گرنگیان پێ بدەم ئەوان با قسە بكەن لەسەر من, منیش بەكاركردن وەڵامیان ئەدەمەوە.
هونەرمەند هەڵكەوت زاهیر
دەنگ:پێتوایە هێشتا رۆژنامەوانی هونەری لە كوردستان زۆر كەمن؟
+كەمن ئەوانەی لەسەر هونەری بەگشتی ئەزانن بنووسن بەتایبەت لە بواری موزیك، ئەوكارانەی كەمن ئەیكەم هێشتا كەم موزیكزان هەیە ناوی ستایلەكان بزانن، ئینجا نازانم چۆن ڕۆژنامەنووسێك كە هیچ زانیارییەكی لە موزیك نییە لەخۆیانەوە شت ئەنووسن، نەخێر نییە تەمەنام ئەكرد چۆن نموونەی مامۆستای بەڕێز كاك (حەمەسەعید حەسەن) هەیە لە بواری ڕەخنەی ئەدەبی كەسانی واش هەبوایە بۆ موزیك تەنها كەسێكم شكبردبێ توانیبێتی لەسەر موزیك بنوسێ ( كاك وشیار ئەحمەد ئەسوەدە).
دەنگ:باشترین ئەلبومی 2010 ئەلبومی(ساندرێلا)ی (هانی) خانە و هەروها باشترینی 2008 (گوێم لێ گرن) ی (لەیلا) خانە, كە هەردوكیان بەرهەمی هەڵكەوت زاهیرە، بۆ ئەو كەسانەی بەردەوام خەریكی نوسینی ڕەقن لەسەر جەنابتان باسی ئەم كارە و چەندین كاری تر ناكەن؟
+ زۆرن ئەوكارانەی كە هەموویان سەركەوتنیان بەدەستهێناوە قەت باسی ناكەن كۆمەڵێك كەسن تەنها هەوڵی ڕووخاندنی من دەدەن، كە زۆر مەحاڵە ئەو خەونەیان بێتەدی من كاری خۆم دەكەم هەنگاوی نوێ بۆكارەكانم دەنێم، بەڵام تەنها ئەو جۆرە كەسانە بڕیاری جەنگیان داوە هیچ ناكرێ لەگەڵیاندا.
دەنگ:لەگەڵا هونەرمەند هانی و لەیلا فەریقی پرۆژەی تازەتان بەدەستەوەیە؟ تا چەند خۆت ماندوودەكەیت تاوەكو ئەم كارە نوێیە تەجاوزی(ساندرێلا)و(گوێم لێ گرن) بكات؟
+ هێشتا نامەوێ هیچ بڵێم كاتێك كاری من هاتە دەرەوە پێم باشە ئەوكات قسەی لەسەر بكرێت, بێگومان هونەمەند لەیلای فەریقی یەكێكەلە ئەستێرە گەورەكانی كوردستان كاری زۆر تایبەتەو هەموو كات سەركەوتوو بووە و سەركەوتوو دەبێت.
دەنگ:لە زۆر ڕاگەیاندنەوە تەشهیر بە هەڵكەوت زاهیر كراوە، ئەمە پەیوەندی بە هونەرەكەتەوە نی یە، بەڵكو كەسایەتی تایبەتی خۆت، وەكو بڵاو كردنەوەی وێنەكانت وكارەكانی ژیانی ئاسایت، بۆ ئەم مەسەلەیەش هەر بێ دەنگی؟
+خوا چاكیان بۆ بكات سەیرە لەم وڵاتەدا هیچ بنەمای یاساش نابینم هیچ سنورێك نییە بۆ پێشكەوتن، گرفتەكە ئەوەیە ئەمانە هەمووی بە دیموكراتی تێئەگەن مانای دیموكراتییان شێواندووە.
خۆزگە سنورێك هەبوایە بۆ تێگەشتن لە هەموو بوارەكاندا بۆ ئەوەی وەعی خەڵك زیاتر ئاشنا بێت بە ڕاستییەكان، لەسەر كەسانی زۆر گەورەو خەمخۆری میللەت تەشهیر ئەكەن، وەك وتم بڕیاری خۆیان داوە دژ بن بە چاك و بە خراپ.
دەنگ:ئەتوانم بڵێم ئیشكردن لەگەڵ كچان لە كوردستان كێشە دروست دەكات؟ یان هەندێ لەو كێشانە بوونی غیرەیە لە لایەن خەڵكەوە؟
+ شت زۆرن بەهۆی ئەوەی كۆمەڵگای كوردی كۆمەڵگایەكی پیاوسالاری بووە هێنانەپێشەوەی ئافرەت لە هەموو بوارێكدا ئاسان نییە قبوڵ بكرێت، پێویستی بە سنگی فراوان هەیە غیرەش بە بێ گومان زۆرن.
دەنگ:لە كەیەوە شیعری گۆرانی دەنوسی؟ شیعری(شوو مەكە، كوڕی هەولێری) لە ئەنجامی چییەوە سەری هەڵداوە؟
+ من لەسەرەتای كاری میاۆدی دانانەوە تێكستم نووسیوە زۆرن ئەوانەی من نووسیومن بۆ هونەرمەندەكان، بیرۆكە زیاتر لە كاراكتەری هونەرمەندەكە لام دروست دەبێت پێشتریش بۆ هونەرمەندان لەیلای فەریقی و دەشنێ و میرا و هانی و لۆكەم نووسیوە, بەڵام بیرۆكەی كوڕە هەولێری، هونەرمەند ناسلی خەڵكی هەولێرە یەكەمین كچە هونەرمەندی شاری هەولێری بوو من كارم بۆ كرد گونجاو بوو ئەو بۆ گەنجانی هەولێر كارێكی سەرنجڕاكێش بكات زۆر سەركەوتوو بوو ئەو بەرهەمە.
دەنگ:ئەو تێكستانەی دەیاننووسیت تا چەند زاتین؟
+ هەموو زاتین و هەندێكیشیان بۆ كاراكتەری هونەرمەندەكە، هەندێ لەو هونەرمەندانە كە من بۆیان ئەنووسم كارەكتەری جوانی هەیە لە لام بۆ نموونە( دەشنێ) كاتێك تیكستی (هیلاهۆپ و یار و كوڕی لەخۆبایی)م بۆ نووسی سەیری كاركتەری دەشنێ م كردووە ئەوە تەنها دەشنێ یە چونكە ئێمە یەك دەشنێمان هەیە لە كوردستان لە ستایلی خۆی یەكەمەو (شازادەی پۆپە ) لە كوردستاندا و یەكەمین پێشكەشكارە لە مێژووی كورد، هەورەها هونەرمەندانی دیكەش وەك لۆكە و میرا چەندین تێكستم بۆ نوسیون و ( گومانت كرد) بۆ لۆكە تەنها كاركتەری لۆكە بە دەنگە ڕاقییەكەی بێگومان وەك پێشتر وتومە لۆكە ئەمیرەی گۆرانی كوردیە و پێشبینم بۆ ئایندەی لۆكە زۆر ڕوونە كە لە مێژوو ناوی خۆی بۆ باشترین گۆرانیبێژ تۆماردەكات و بەهەمانشێوە میرا وەك سوڵتانی گۆرانی كوردییە لەلام ئایندەی باشی دەبێ بۆ هونەر لە كوردستاندا.
دەنگ:بۆچی هەمیشە تێكستی بەڕێز(حەمە سەعید ئیبراهیم) بەكار دەهێنیت؟ هەست ناكەیت لەو كارانەدا سەركەوتوو تر بوویت كە تێكستەكانی بەڕێز(د.ئاراس عەبدولكەریم)تان بەكارهێناوە؟
+ تێكستەكانی كاك حەمە سەعید زمانێكی سادەو گونجاوە بەبێ گومان د. ئاراس عەبدول كەریم كەسێكی زۆر بە توانایەو هەموو بەرهەمەكانی ئەو سەركەوتنی بەدەستهێناوە زۆر خۆشم ئەوێت.
دەنگ:چ هەستێكت هەیە بۆ شاری سلێمانی(شاری منداڵی)؟ ئەو بیرەوەرییانەی لەوێ جێتهێڵاون ئازارت نادەن؟
+ شاری سلێمانیم زۆر خۆشدەوێت و لەو شارە گەورەبووم و خۆێندم تەواوكردووە هەمیشە یادگاری مناڵیم دێتەوە یاد، مانگانە جارێك سەردانی شاری سلێمانی دەكەم خەڵكەكەیم خۆشدەوێت.
دەنگ:هاوڕێكانت زیاتر لە كام شارن؟ كێ زۆر هاوڕێ ی مناڵیت بوو؟ ئەی هاوڕێ ی هەمیشەییت كێ یە؟
+ من ئاشنایەتیم زۆرە و بەگشتی هاوڕێی مناڵیم موزیكژەن( شازاد محمد جەزا و گۆران كامل) بوون, ئێستا كاك( ڕەنج سەنگاوی) هاوڕێیەكی زۆر نزیكمە و كاك (كاوە شێخ) هەروەها (میرا و لۆكەو دەشنێ) زۆر نزیكن لێمەوە هاوڕێیەكی ڕۆژانەی یەكین هونەرمەند كاك (قادر ئەسعەد) هاوڕێیەكی نزیكمە.
دەنگ:ئێستا مەرجی خۆت و كۆمپانیاكەت (شانێل میوزیك) چی یە بۆ كاركردن لەگەڵ هونەرمەندانی گۆرانی بێژ؟ هەموو گۆرانیبێژێك دەتوانێ پەیوەندیتان پێوە بكات؟
+ پەیوەندی جیایە و كاركردن شتێكی ترە بۆ ڕێنماییكردن ئاساییە، بەڵام بۆ كاركردن هەندێ مەرجی خۆمان هەیە تایبەتە بە ستایل و بۆچونی شانێل موزیك.
دەنگ:سەرچاوەی دارایی كۆمپانیاكەت لە كوێوەیە؟
+ زۆرن ئەو شەریكانەی هاوكاری ئێمە دەكەن، لۆگۆكانیان دیارە لە كلیپەكان.
دەنگ:ئەگەر حەزت لە دەنگی كەسێك نەبوو، دەتوانی كاری بۆ بكەی؟
+ بەگشتی نا بەڵام هەندێ جار داواكاریم لێكراوە و كردوومە.
دەنگ:دەربارەی كەناڵەتازەكەت، گەیشتە كوێ و بە نیازی ناوی بنێی چی؟
+ بۆ ناوەكەی لە بیركردنەوەیەن و ڕۆژانە لەگەڵ دەنشێ و میرا و لۆكە لە بیری ئەوەداین بەڵام ناوێكمان هەڵبژاردووە دواتر ڕایدەگەیەنین.
دەنگ:شێوازی ئیشكردن و پلانەكانت هەروەك و( كۆڕەك تی ڤی ) جاران دەبێت؟ ئەی دەربارەی میدیاكار و كاستی ئیشكردن لەو كەناڵە كێ دەبن؟
+ پلانی ئێمە كەناڵێكی هونەرییە تایبەت بە موزیك هەندێ بەرنامە لە خۆدەگرێ لەوانە پرۆگرامی ( دەشنێ شۆ) دڵنیام دەبێتە باشترین پرۆگرام و جەماوەرێكی زۆر بۆخۆی پەیدادەكات چونكە بیرۆكەی نوێی تیایە و بێگومانم جێی سەرنجی جەماوەر دەبێت ئەوكەسانەی نزیكن.. لەكارەكانمان بەگشتی هەن.
دەنگ:لەم دواییەدا كارەكانت تەنها بۆ خانمان بوو، جگە لە هونەرمەند (میرا) نەبێت؟
+ هونەرمەند ( میرا ) ئەو دەنگەیە كەمن سەرسامم پێی بۆیە كاری بۆ دەكەم، بەڵام من بەگشتی حەز بەدەنگی ئافرەت دەكەم مەبەستمە دەنگی نوێ ی ئافرەت زۆر كەمن لە كوردستاندا و بێنە مەیدانەوە بەڵام ئەگەر دەنگی كوڕێكیشم پێخۆش بێت بێگومان بەردەوام كار بۆ دەنگی دەكەم، زۆرن ئەو گەنجانەی داوا دەكەن بڕیارمداوە لە ئایندە دا لەڕێی تیڤیەكەوە كۆمەڵێك گەنجی نوێ بێهێنمە مەیدانەوە، مەبەستم دەنگی كوڕی گەنجە.
دەنگ:ئێستاش هەر خۆشترین و باشترین دەنگی كوردی لە لای بەڕێزتان(باخان)ە لە كچەكان و (میرا) یە لە كوڕەكان؟
+تایبەت بە ( میرا) ڕاستە پێم خۆشترین دەنگە بەڵام بەكچەكان باخان دەنگی زۆر خۆشە بەڵام بەهەمان شێوە هونەرمەند لەیلای فەریقی هەیە هەروەها من زۆر حەز بەدەنگی هونەرمەند ( لۆكە ) دەكەم، ئایندەی لۆكە زۆر بە باشی دەبینم چونكە خۆی زۆر ماندوو دەكات لۆكەش بەیەكێك لەباشترین دەنگەكانی دادەنێم، من زۆر سەرسامم بە ڕاقییەت لە دەنگی لۆكەدا.
دەنگ:هونەرمەند بڵند ئیبراهیم دەڵێت :مەرجە هەموو هونەرمەندێكی كوردی چەندین گۆرانی و مەقام و فۆلكلۆری كوردی بزانن و بە باشی بیڵێت، جەنابتان چیتان لەسەر ئەم قسەیە هەیە؟ فۆلكلۆر لای ئێوە چ تایبەتمەندییەكی هەیە؟
+ ئەوە پەیوەستە بە ڕای ئەو هونەرمەندە و بۆچوونی ئەوە، زانستی مەقام پێویستە بۆ هەموو هونەرمەندێك، فۆلكلۆر خۆشە و تایبەتمەندی خۆی هەیە بەڵام من كاری لەسەر ناكەم.
دەنگ:چی بكرێت بۆ ئەوەی هونەری كوردی لەسەر ئاستی زۆر فراوان بناسرێت و مۆركی تایبەتی خۆی پێوەدیاربێت؟
+ تا بتوانین هونەرمان بەرەو ئاستی دەرەوە بیبەین دوور بین لە خۆبەستنەوە بە شتی سەیرو سەمەرە ئەمە موزیكە لەوە دەچێ و پێویستە ئاستی بیری هونەرمەندی داهێنەر ئازادبێت تا بتوانێت كار و داهێنانی باش ئەنجامبدات ئێمەش وەك وڵاتانی تر بتوانین بەشداری ڤیستیڤاڵی دەرەوە بكەین.
دەنگ:ئاستی ئاوازدانەر چۆن دەبینی لە كوردستان و بەگشتی بەكێ سەرسامی؟
+ لە كوردستاندا من ئاواز دانەرم نەبینیوە جگە لە مامۆستا عەلی مەردان و شەماڵ سائیب نەبێ ئەوانەی ئێستا محاوەلە دەكەن نەك ئاوازدانان، بەتایبەت لەگەنجەكان زۆر دوورن لە دانانی ئاواز بەڵام دەستخۆشی دەكەم كە هەنگاو دەنێن, من سەرسامم بە (بلیغ حمدی) قێم لوتكەی موزیكە لە جیهاندا بە مامۆستای ڕوحی خۆمی دادەنێم ڕێگەی كارمان نزیكەو هەستدەكەم ڕۆژانە لەگەڵی ئەژیم
نابغێكە كەقەت دروستنابێتەوە.
دەنگ:دەڵێیت زۆر لە گەنجە كوڕەكان داوا دەكەن كاریان بۆ بكەیت، بەڵام بۆیان ناكەیت؟
+ بێگومان داواكاری زۆرە بەڵام خۆ من ناتوانم وەڵامی هەموو داواكاریەكان بدەمەوە ئەوەی پێم بكرێت كردومەو دەیكەم زۆر خۆشحاڵم كە كار بۆ گەنجان دەكەم ئەوەی پێم بكرێت توانام هەبێ كار بۆ سەرجەم گەنجانی كوردستان دەكەم.
دەنگ:ئەتوانم بڵێم ئەم هۆكارە دەگەڕێتەوە بۆ بۆچونی هەردوو هونەرمەندان(پەیوەند جاف و ئەیوب عەلی) كە زۆر بە ئاشكرا پەشیمانی خۆیان دەربڕی لەوەی لەگەڵ جەنابتان كاریان كردووە؟
+ من پەشیمانیم نەبینی قسەی سەر ڕۆژنامەكان شتێكەو كە خۆشیان قسە دەكەن شتێكی ترن.
دەنگ:ئەتوانم بلێم (خۆت بە سروشت حەزت لە دەنگی ئافرەتە)؟
+ بەڵێ دەنگی ئافرەتم پێخۆشترە من زۆر گۆێ بۆ دەنگی فەیروز دەگرم ڕۆژانە.
دەنگ:بەردەوام ڕەخنە لە هەڵكەوت زاهیر دەگیرێ, كە گوایە میوزیكی عەرەبی بەسەر كارەكانیا زاڵە, یان دەڵێن هونەری كوردی شێواندووە(لەگەڵ رێزمدا)؟
+ شەڕ شەری نەمانە و شەڕی بێتواناییە و ئەی ئەو كارانەی بۆ دەشنێ كردم ئەمانەش عەرەبین یان ناسلی یان هانی یان نیلیساو میراو لۆكەش.. ئەوە چەكێكە بۆ چەواشەكردنی خەڵكی لەلایەن چەند هونەرمەندێكی بێ توانا من بەزەییم پێیاندا دێتەوە زۆر پێم خۆشە كۆمەكیان بكەم.
دەنگ:ئەو هونەرمەندانەی كارت بۆ كردوون كێ بوون تا ئێستا؟
+ دیارە زۆرن ناتوانم ناوەكانم هەمووی لەبیر بێت بەڵام ئەوەی لەبیرم بێ( مەرزیەی فەریقی و لەیلای فەریقی و دڵنیا ڕەزازی و ناسری ڕەزازی و ئەژدەر وەهبی و حەمەڕەئوف كەركوكی, تارا ڕەسوڵ و باخان و میرا و دەشنێ و لۆكە و چۆپی فەتاح و هەڵدێر و هانی و جەلال و مستەفا دادار وئازاد خانەقینی و لالۆ ڕەنجدەر و د. بەلقیس و ناسلی و شانیا و نیلیسا و هونەر ئەحمەد و كریستاڵ وئەیوب عەلی و پەیوەند جاف و ئالان عمر و هەروەها ( مەها) كچێكی ئەسیوبییە،عەشیر و ڕبێن ، عەلی حەجارو وەعد و ئەوانەن لەبیرم بێت.
دەنگ:تا چەند ناسك و رۆمانسیت؟ بێگومانین كە هونەرمەندی میوزیسیان دەبێت وا بێت…
+ من مرۆڤێكی ڕۆمانسیم زۆریش.
دەنگ:دەربارەی هونەرمەندان (شیرین و نەجوا) داوای هاوبەشی كاركردنیان لێ كردویت؟ ئەو هونەرمەندە عەرەبانەی كە داوای كاریان لێ كردووی كێن؟
+ زۆرن كاری زۆریشم كردووە بۆ هونەرمەندە عەرەبەكان..
دەنگ:كۆنتاكتێكی باشتان هەیە لەگەڵ دەهێنەری لوبنانی(فادی حەدداد)؟
+ فادی حەداد هاوڕێیەكی زۆر خۆشەویستمەو كار بەبەردەوامی دەكەین لەگەڵ یەكتری.
دەنگ:لە هەموو ئەو گەنجانەی ئێستا بە بەردەوامی كاریان بۆ دەكەیت، زیاتر هیوات بە كێ یان هەیە؟
+ هیوام بەهەموویانە بەتایبەت ( لۆكەو میراو دەشنێ) بەبەردەمومی كار دەكەین هەروەها ناسلی و كریستاڵ و نیلیساو شانیاش..
دەنگ:لەگەڵ گۆرانی بێژی ناوداری لوبنانی(ئەلیسا) هیچ پرۆژەیەكی هونەریتان دروستكرد؟
+ نەخێر، من ئاشنایەتیم زۆرە بەڵام شەرت نییە هەمووی كاری هونەری لەگەڵ دابێت.
دەنگ:دەربارەی ستافی كەناڵ 4 و كۆرەك تی ڤی، هیچ كێشەیەك هەیە لە نێوانتان؟
+ نەخێر تەمەنای سەركەوتنیان بۆ ئەخوازم.
دەنگ:چەند ئامێرێكی مۆسیقی دەژەنیت؟
+ پیانۆ و ئۆبوا.
دەنگ:لەو هەموو ئەزموونی كاركردنە چی فێر بوویت؟ وەكو ئەزموونی ژیان..
+ زۆر شت فێربووم بەڵام من لە مناڵییەوە پرۆگرامی خۆمم دانابوو پێشبینی كارەكانی خۆم دەكەم.
دەنگ:دەربارەی ئەلبوومی شیعریی، بە تەنها كارتان بۆ رەنج سەنگاوی كردووە؟
+ نەخێر من كارم بۆ ( مامۆستا حەمەسەعید حەسەن و مەهاباد قەرەداغی و كاك ڕەنج و هەروەها ئەلبومێكی شیعری م بۆ هونەرمەندی گەوروە( سعاد حسنی) ئامادەیە و پێش كۆچی دوای دەنگی تۆمار كردبوو تەسلیم بە من كراو ئێستا ئەو ئەلبومە ئامادەیە.
دەنگ:زۆر بەداخ بووین بۆ كۆچی دوایی دایكی ئازیز و خۆشەویستتان، هیچ پڕۆژەیەكی هونەری بۆ (دایك) دروستناكەیت؟
+ سوپاسی هەستان ئەكەم سوپاسی هەموو لایەك دەكەم كە خەم خۆرم بوون لەو كاتەدا چونكە بەڕاستی لە دەست دانی دایك گەروەترین كارەساتە بۆ مرۆڤ , بێگومان چەند گۆرانیەكم دروستكردووە لە پرۆژەكانی داهاتوو دەیبیستن.
دەنگ:لەگەڵ سیاسەتمەدارەكانی كورد پەیوەندی دۆستانەت هەیە؟
+ پەیوەندی دۆستی و هاوڕیەتیم زۆرە ڕێزم بۆ هەموو لایەك هەیە.
دەنگ:ئێستا لە كوێ و لەگەڵ كێ ژیان دەبەیتە سەر؟00
+ من لە هەولێر ئەژیم .. ژیان لەوێ بەسەر دەبەم زۆربەی كاتەكان لەگەڵ ( میراو دەشنێ و لۆكەم ) هەروەها محمد شكاك قوتابییەكی نزیكە لێمەوە.
دەنگ: ژیانی هاوسەری ڕێگر نابێت لە كاری هونەریت؟ وەكو هونەرمەندێك بیرت لێ كردۆتەوە؟
+ بێگومان ڕێگرییەكی گەورە دەبێت بۆیە تا ئێستا بیرم لێ نەكردۆتەوە.
دەنگ:باسی كارە نوێیەكانت چین؟
+ من هەمیشە كارەكانم بەردەوامەو خەریكم، پرۆژەكان زۆرن باشتر وایە كە بڵاودەبێتە بیبیستن.
سه‌رچاوه..گۆڤاری دەنگ پرێس
