هەولێر/زریان خەتاب : لەپێناو زیاتر گرینگیدان بەهونەری شێوەکاری و کۆکردنەوەی بەرهەم و تابلۆ هونەریەکانی هونەرمەندە شێوەکارەکانی کوردستان و نمایشکردنیان لەگەلەریەکی گەورە و سەردەمیانەدا،حکومەتی هەرێمی کوردستان لەپرۆژی 2010ی خۆیدا گەورەترین گەلەری شێوەکاری لەسەر دیزاینێکی ئیتاڵی هاوچەرخ لە شاری هەولێر دروست دەکات،
لەم بارەشەوە د.کاوە مەحمود وەزیری رۆشنبیری و لاوانی حکومەتی هەرێمی کوردستان لەلێدوانێکیدا وتی:لەسەرتاسەری کوردستاندا بایەخێکی زۆر بە هونەری شێوەکاری ئەدرێت،جگەلەوەش هەولێر پایتەختی هەرێمی کوردستانە و نەک بەتەنها بەرهەمی هونەرمەندانی هەولێر لەو شارەدا نمایشدەکرێن، بەڵکو بەرهەمە هونەریەکانی زۆربەی هونەرمەندە شێوەکارەکانی کوردستان لە هەولێردا نمایشدەکرێن و پێشانگای شێوەکار هاوبەش و تایبەتیان بۆ دەکرێتەوە و لەشاری هەولێردا بەردەوام پێشانگای شێوەکاری هەیەو هەفتەنیە پێشانگایەکی شێوەکاری نەبێت،بۆیە پێویستمان بەگەلەریەکی گەورەو هەیە کەگەلەریەکی فراوان و بەردەوامبێـت و لەشێوەی مۆزەخانەیەکی گەورەبێت،بۆئەو مەبەستەش لە کار و بەرنامەی پرۆژە و بودجەی 2010ی حکومەتی هەرێمی کوردستان دایە کەگەورەترین گەلەری شێوەکاری لەشاری هەولێردا دروستبکات کە دیزاینێکی هاوچەرخی ئیتاڵی بۆ ئامادەکراوە بۆئەوەی بتوانین هەموو هونەرمەندێکی شێوەکاری کوردستان بەشی خۆی لەو گەلەریە شێوەکاریە داهەبێت،بەهەموو قوتابخانە هونەریەکانی شێوەکاری و ناوچەکانیەوە،وەزیری رۆشنبیری ولاوان وتیشی:لەئێستاشدا دەستمان کردوە بەکارکردن بۆئەو پرۆژەیە و لەماوەی دیاریکراوی خۆیدا ئەو پرۆژە هونەریە ئەنجامدەدرێت و دەبێتە گەلەریەکی هاوچەرخ بۆ نمایشکردنی تابلۆ شێوەکاریەکانی گشت هونەرمەندانی شێوەکار لە کوردستان.
