هەودا ئەحمەد رەزا، كچی ئەحمەد رەزای شاعیری هەست ناسكە، گۆشكراوی دایكێكی رۆشنبیرە و هاوسەری كاكە ژێیە، ژێ هەموو هەوڵێكی بۆ ئەوەیە كە هەودای هاوسەری لەكارەكانیدا سەركەوتووبێت، هەودا لەشاری سلێمانی لەهەواری تازە لەخێزانێكی نیشتمانپەروەرو شۆڕشگێڕ لەدایك بووە لەساڵەكانی 2000وە لەكەناڵەكانی راگەیاندن بەتایبەتی بەشی منداڵان كاردەكات، بەناوی بەرنامەی پەپولەكانی ئازدای سەرەتا لە تەلەفزیۆنی زەحمەتكێشان‌و دواتر هەفتانە بۆماوەی 45 دەقیقە لەكەناڵی تەلەفزیۆنی ئازادی بەرنامەكەی خۆی پێشكەش بەجگەرگۆشەكانی گەلەكەمان دەكات.
زنار: بۆچی جیهانی منداڵانت هەڵبژارد؟.
هەودا: خۆم لەژیانی منداڵیدا مەحروم بووم لەهەموو شتێك بێبەش بووم لەو تەمەنە بۆیە دەمەوێت قەرەبووی ئەو ساڵانە بكەمەوەو لەگەڵ خۆشەویستی منداڵدا بژیم.
زنار: جیهانی منداڵ، جیهانێكی پڕ لە بەرائەتە مامەڵەكردن لەگەڵیدا چۆنە؟.
هەودا: جیهانی منداڵ وەك گەورە نیە ئەوان زۆر پرسیار دەكەن پێویستی بەوەڵامی راست‌و رەوان هەیە منیش بەزمانێكی پاراو دەدوێم لەگەڵیان بەتایبەتی بواری راگەیاندن كەراستەوخۆیە بۆقسەكردن.
زنار: ئەو پەیوەندیە چۆن دروست دەبێت لەنێوان تۆی بێژەرو منداڵاندا؟.
هەودا: بەرنامەكەم بەناوی پەپولەكانی ئازادیەوەیە، باس لەخۆشەویستی‌و حەزوو ئارەزووی منداڵ دەكات بەرنامەكە راستەوخۆیە، بەڵام بەداخەوە زۆرجار ئەو پەیوەندیە وەرناگیرێت ناچار دایك‌و باوكیان منداڵەكان دێنن بۆ كەناڵەكە بۆلام تاكوو بمبینن‌و قسەكانیان بكەن. بۆ ئەوەی ئەو هەموو خۆشەویستەی كەهەیە لەنێوانماندا كۆبێتەوە.
زنار: زۆر لەمنداڵان دەڵێن دادە هەودا عەجوولە ئەمە چەند راستە.
هەودا: بەرنامەی منداڵان ئەركێكی قورسە توانای زۆری دەوێت، من هەرگیز پرۆڤە ناكەم خۆشم حازر ناكەم بۆ بەرنامەكە بەستایلی خۆم كاردەكەم كاتێك كامێراكە دەبینم وادەزانم هەموو منداڵانی وڵاتەكەم چاوەڕوانی پێكەنینی منن. كەگوێم لە (ئەلوی)منداڵێك دەبێت دەڵێت دادە هەودا چۆنی وادەزانم هەموویان جگەر گۆشەی خۆمن.
زنار: منداڵ پێویستە سەرنجی رابكێشی، هەودا چۆن ئەم كارە دەكات؟
هەودا: دنیای منداڵ پێویستی بەخوێندنەوەی ورد هەیە، منیش زۆر كتێبی پەروەردەی منداڵ، جۆری یاریكردن دەخوێنمەوە تاكوو لەگەڵیان بەجوانی بدوێم هەموو كاتێك چاوشاركێ، فیك ڵانكۆ، یاریە جۆراوجۆرەكانی تریان لەگەڵ دەكەم‌و گۆرانی‌و شیعری منداڵانیان بۆدەخوێنمەوە.
زنار: رووخسار دەور دەبینێ؟.
هەودا: من ئەوەندە گوێ بەروخسارم نادەم چونكە بەرنامەكە وادەخوازێت ئەوەندی ناخ‌و دڵ‌و دەرونی خۆم پێویستە ئەوەندە باكم بەروخسارم نیە، ئارایشت ناكەم كەدەچمە بەرنامەكەوە حەزم لەگۆرینی جل‌و بەرگیش نیە.
زنار: مەرجە پێشكەشكاری بەرنامەی منداڵان، پشپۆڕ بێت یاخود كەسێكی ئەكادیمی بێت؟.
هەودا: لەرووی كاری یاسای راگەیاندنەوە بەڵێ‌و زۆر گرنگەو كاریگەری خۆی هەیە، بەڵام ئەوەندە حەزوو ئارەزوو گرنگە ئەوەندە ئەكادیمی بۆ ئەو بەرنامەیە گرنگ نیە.
زنار: نهێنی چۆن سەرنجڕاكێشانی منداڵان لای هەودا چیە؟.
هەودا: زیاتر بەپێكەنین و قسەی خۆش چونكە ئەو بونەوەرێكی پاك‌و بێگەردە.
زنار: بواری راگەیاندن چی پێبەخشیویت؟.
هەودا: زۆر شتی جوانی پێبەخشیوم، بووم بەو هەودایەی كەزۆربەی منداڵی وڵاتەكەم لەرێگەی ئەو كەناڵەوە دەمناسن. تەماعی زۆرم هەیە دڵم زۆر ناسك بوە بەهەموو شتێك دەگریم حەزدەكەم بواری راگەیاندن داگیربكەم ئەگەر دەرفەتم هەبێت. هەروەها راگەیاندن زۆرهاوڕێت پێدەناسێنێ بەڵام فێرت دەكات پێویستت بەچ هاوڕێیەكە.
زنار: هیچ كات تووشی گلەیی وگازندە پلار بویتەوە؟.
هەودا: كۆمەڵگای ئێمە دووبەشە وەكخۆم بیرم لێكردۆتەوە‌و بروام پێیەتی، هەندێك دەستخۆشیم لێدەكەن‌و ئەو ستایلەی منیان بەدڵە، هەیانە كەدەمبینین لەسەر رێگە پلارو توانج تێدەگرن، من گوێیان نادەمێ هێڵی سورم بەزاندووە خۆشحاڵم بەو ستایلەی كە گرتومەتەبەر، من لەساڵی 2000هەزارە خەریكی ئەو بەرنامەیەم.
زنار: ئەو ستایلەی كە دەوری پێدەبینی گونجاوە لەگەڵ پێشكەشكردنەكەدا
هەودا: هەر یەكێك لەئێمە حەزدەكات بەجۆرێك بیربكاتەوە، بێگومان ئەو دەورەی من دەیبینم زۆر گونجاوەو سەرنجی منداڵانی بەلای خۆیدا راكێشاوە، منداڵ حەزی لەپێكەنینەو دەیەوێت خەمەكانی بڕەوێتەوە، پێویستی بەهاوڕێیەو بەتاڵی خۆی پڕبكاتەوە من دەمەوێت لەرێگەی ئەو كەناڵەوە هاوڕێی زۆر نزیكی منداڵان بم واهەست بكەن لەگەڵ سفرەی نان خواردن لەگەڵیاندادام.
زنار: پێت وانیە ئەركت زۆر قورسە؟.
هەودا: راستە خزمەتكردنی بواری منداڵان زۆر ئەركێكی قورسە بەڵام من دەمەوێت لەرێگەی خۆمەوە پرسیاری سادەو ساكاریان لێبكەم و بەو سادەییە تێیان بگەیەنم ئەگەر بەمن بێت حەزدەكەم باسی ئەو رۆژە چیرۆكی ژیانیان‌و بەسەرهاتی قوتابخانەو خۆشەویستی دایك‌و باوك‌و هاوڕێ‌و هاوسێكانیان بگێڕنەوە، بەڵام ئەوانەی كەسەرپەرشتی بەرنامەكە دەكەن جۆرێكی تر بیردەكەنەوە.
زنار: حەزدەكەیت كەناڵی ئاسمانی تایبەت بەمنداڵانمان هەبێت؟.
هەودا: حەزدەكەم چەندەها كەناڵی تەلەفزیۆنی هەبێت بۆمنداڵان تاكوو حەزوو ئارەزووەكانیان بێتەدی بۆ ئەوەی ئەو هیوایەت‌و ئارەزووەی كەهەیەتی بێتەدی هەقە بەرپرسانی ئەو كەناڵانە زیاتر خزمەتی منداڵان بكەن نەك كاتێكی كەمیان بۆدابین بكرێت من كاتەكەم تەنها 45 دەقیقەیە ئەوەش بەشی ئەوان ناكات.
زنار: منداڵ بونەوەرێكی ناسكە باسی چیت بۆدەكەن؟.
هەودا: منداڵەكان زۆربەیان باسی ژیانی رۆژانەی خۆیان دەكەن كەچی روویداوە ئەو رۆژە، بەتایبەتی باسی قوتابخانەو مامۆستاكانیان بەڵكوو زۆرجار گلەیش دەكەن.
