هەمان تەنیایی

نووسینی: سیسی دوچیو

وه‌رگێڕانی لە یۆنانییەوه‌: ئومێد قەره‌نی

لە هەموو باژاڕە گەورەکانی جیهاندا

کچان بە تەنیا بە تەنوورەی کورتی هەرزانەوە

کە لە ”چین تاون” کڕدراون..

کوڕان دەرۆزەی چەند ”سەنت”ێک دەکەن

لە نێو واگۆنە ساردوسڕەکانی نیویۆرک..

سەرنشینان بە توندیی پەنجە تەزیوەکانیان

لە نێو گیرفانیان گرمۆڵەکردوە

ئامادەن خۆیان بخزێننە ناو ژوورە بچووکەکانی باڵەخانەکانیان.

ئاسمان ڕووت و باڵەخانەی بەرز

جەستەی مرۆڤ بە زنجیر بەستراوەتەوە

بە سەربانی باڵەخانە بەرزەکانەوە،

لە کاتێکدا زەوی بەردەوامە

لە سووڕانەوەی لە بۆشایی ئاسمان

لە کاتێکدا زەوی بەردەوامە

لە سووڕانەوە لە بۆشایی ئاسمان

نیگایەکی مات و ماندوو

بەردەوامە لە تەماشا لە پشت پەنجەرەکانەوە

تەماشای دەرەوە و شەقامە جەنجاڵەکە دەکا.

لە شارە گەورەکانی جیهاندا تەنیایی وەک یەکە.

دامەزراوەکان، قوتابخانەکان

بانکەکان، فەرمانگە شارەوانییەکان

دایکە دەستبەردارەکان

بە چاوی سووری پڕ لە پەژارە بۆ ئەمڕۆ

تژی لە دڵەڕاوکێیی بۆ سبەینێ

لە باڵەخانەکان شیش دراون.

شارستانیەتێک کە گرنگی بە چێژبردن دەدا

لە خاوەنداریەتیە تایبەتییەکان، تەنیایی هەمان شتە.

کۆچبەران، پەنابەران، بێ جێ و ماڵەکان

بە چاوی خەمگینەوە تەواوی کەلوپەلەکانیان

لە ناو یەک کیسەی ڕەشی زبڵ دایە

تەنیایی هەمان شتە.

سەدان ڕێڕەوی شەمەندەفەر ئامادەن

بۆ بڕینی گڵۆڵەی خۆشییەکانی هەر کەسێک،

بەختەوەرییەکانی هەر کەسێک، تەنیایی هەمان شتە.

بزوێنەرەکان بێ وەستان هەناسەدەدەن

لەگەڵ هەناسەدانی بێ وەستانی بزوێنەرەکان

خەونەکانمان لە ”وۆڵ ستریت”ی فراواندا دەخنکێن

تەنیایی لە هەموو باژاڕە گەورەکانی جیهاندا وەک یەکە.

لە پەناگەی کۆکردنەوەی پەنابەران و

گۆڕەپانی کۆکردنەوەی کرێکارە تازەکان

خانووی کرێکاران لە تەنیشت بەنزینخانە و چێشتخانەکان

لەسەر شەقامە تایبەتەکان ئامادەن بۆ فرۆشتن.

تەنیایی لە وەئاگاهاتنی سپێدانی

فەرمانبەرێکی میریی لە لەندەن و

لە وەئاگاهاتنی سپێدانی

فەرمانبەرێکی کەرتی تایبەت لە بەرلینیشدا هەمان شتە .

تەنیایی هەر وایە،

لە زەردەخەنەی نائومێدیی یاخیبووان و

هیوای زیندانییەکان، تەنیایی هەر یەکە

لە گۆڕی هەڤاڵانی ئەنارکیست لە شیکاگۆ

لە گۆڕی هەڤاڵە کوژراوەکانی ئەسینا.

تەنیاییە نەگوجاوەکان

تەنیایی سۆزی و بەزەییئامێز

تەنیایی ئەو کۆیلەیە کە دەیەوێ یاخی بێ.

تەنیایی وەک یەکە تا سەردەکەوین.

لە کاتێکدا زەوی لە بۆشایی ئاسماندا دەسووڕێتەوە

ئێمە نەخشەی ڕزگاریی خۆمان دادەڕێژین

لە کاتێکدا زەوی لە بۆشایی ئاسماندا دەسوورێتەوە

دەبێ ئێمە ئازادبین

تەنیایی هەمان شتە

تا ئەو کاتەی درێژە بە کۆیلەییمان بدەین

تا زەوی لە بۆشایی ئاسماندا بسووڕێتەوە

ئێمە نەخشەمان بۆ ئازادیی دەبێ.

نووسینی: سیسی دوچیو

وه‌رگێڕانی لە یۆنانییەوه‌: ئومێد قەره‌نی

“سیسی دوچیو_Σίσσυ Δουτσίου”

شانۆکار و شاعیرە. ساڵی ١٩٨٠ لە  ئەسینا لەدایکبووە، چوار کتێبی شیعری هەیە لەگەڵ دوو کۆمەڵە کورتە چیڕۆک، دوا کتێبی “خوشکانی قابیل”ە، چەند چیرۆکێک لەخۆ دەگرێ