هەردێیتەوە..

تۆی یادێکی ناسڕێیتەوە تۆی خەمێکی نابڕێیتەوە
وەک خۆشیێکی لەبیرناچی ئازارێکی هەردێیتەوە
تۆ سۆزێکی بەخشندەیی تۆ برینێکی دەکولێیتەوە
تۆی هەستێکی لەناخی من لەئەویندا دەتوێیتەوە

مێژووی سوڕی ژیانی من پەڕە پەڕەی هەڵدەیتەوە
گەلێ هاتن زۆریش ڕۆیین هەرتۆ تەنیا بۆم مایتەوە
هەرچەندە لێم دووربکەوی خودا نەکا و نەیەیتەوە
بەئازاری عەشقت ڕاتووم چاوەڕوانم کەی دێیتەوە

من هەمیشە لێت دەپرسم بۆچ وەڵامم نادەیتەوە
دیارە کەوای خۆشتناوێم قەت لەمن ناپرسیتەوە
تۆ شیعرێکی نەگۆتراوم بەوشەکان نانوسرێیتەوە
لەناو باخی دڵی مندا تۆی ئەو گوڵەی دەڕوێیتەوە

‌ دڵشاد تاقانە