جەمالى دەلاک : ئەگەر بگەڕێینەوە بۆ ناوەڕاستى ساڵەکانى سەدەى پێشووى شارى سلێمانى ، ئاوڕێک لەبوارى هونەرى گۆرانى و میوزیکى ئەو شارە بدەینەوە ، دەبینین کۆمەڵێک کەسایەتى بەهرەمەند و دەنگخۆش و هونەرمەند و ژەنیارو ئاوازدانەر لەشارى سلێمانى و دەوروبەرى سەریان هەڵداوە ، بەهەوڵ کۆشش و تەقەلایان بوونەتە بەشێکى گرینگ لەمێژووى سلێمانى و کوردستان بەگشتى ،
شارى سلێمانى لەسەرەتاى سەدەى پێشووەوە خاوەنى تیپى موزیکا بووە ، لەگەڵ ڕەوتى گەشەکردنى شارى سلێمانى لەهەموو بوارەکاندا ، بوارى هونەرى میوزیک و گۆرانى دا ڕۆڵى بەرچاو و کاریگەرییان هەبووە ،
هونەرمەندانى دەنگخۆش و میوزیکژەنانى شارى سلێمانى هەریەکەیان بەهونەرەکەیان مێژوویەکیان تۆمارکردووە و بەردى بناغەى پێشکەوتنى ئەوشارەیان پتەوتر کردووە ، ئەوەى جێگەى خۆش حاڵى و سەرفرازییە هونەرى ئەو هونەرمەندانە بەگشتى لەشارى سلێمانیدا قەتیس نەماون و بەڵکو هونەرەکەیان سنوورى بەزاندووەو بەتەواوى کوردستاندا بڵاوبوونەتەوە ،
لەبوارى هونەرمەندانى ژەنیاردا باسى لێوەبکەین خاوەنى ئەم کەڵە هونەرمەندانەیە کەبەدەست و پەنجە زێڕینەکانیان خزمەتێکى گەورەیان بە هونەرى نەتەوەکەمان کردووە و بۆ هەمیشە دەبێت شانازیان پێوەبکەین ،کە نموونەکانیان زۆرن وەک .:
(ولیەم یوحەننا ، قادر دیلان ، شەوکەت ڕەشید ، حاتەم سەعید ، نەجاتى عەبدە ، ئەنوەر قەرەداخى ، خالید سەرکار، نامدار قەرەداخى ، سەلاح ڕەووف ،عەلى ڕەزا ، حەمەسەعید عەبدوڵا ،…….تاد) (لەگەڵ داواى لێبوردن ئەگەر ناوى ئەو ژەنیارە بەتوانایەنەمان لەو سەردەمەدا لەیاد کردبێت )
هەروەها لەبوارى هونەرى دەنگخۆشى و گۆرانیبێژیشدا بێگومان شارى سلێمانى هەژار نیە بەڵکو چەندین گۆرانیبێژ و دەنگخۆشى تێدا هەڵکەوتووە ، و گەنجینەیەکى پڕبەهاى هونەرییان لەپاش خۆیان جێهێشتووە ، نموونەى ئەو هونەرمەندانە وەک (ئەحەى ناسر ، مەلا کەریم ،ڕەشۆڵ، حەمە ێاڵح دیلان ،ڕەفیق چالاک ، مەحموى تۆفیق شلک ، قادرى حاجى حسێن ، مەحموى حەمەى لەیلێ، شەماڵ ێائیب، ئەحمەد شەماڵ و عومەر ڕەزا ………تاد )
لەگەڵ هەوڵ و تێکۆشانى هونەرییانەى هونەرمەندانى ئەو شارە نابێت ڕۆڵى ئیستگەى کوردى بەغدا فەرامۆش بکەین ، کە دەنگى هونەرمەندانى کورد بەگشتى لەڕێگەى ئەو ئیستگەیەوە دەدرا بەگوێى بیسەرانى ئەو ڕادیۆیە ، ئەوەش بەهەوڵ و تێکۆشانى کەسانى دڵسۆز و بەئەمەکى گەلەکەمان دەرگاى ئەو ڕادیۆیەیان خستەسەرپیشت بۆ خزمەتکردن بەهونەرى میوزیک و گۆرانى کوردى ،
یەکێک لەو هونەرمەندانەى کەلەڕێگەى ڕادیۆى کوردى بەغداوە گۆرانیەکانى تۆماردەکردو بڵاودەبوونەوە ، بەدەنگێکى خۆش و ناسک گۆرانى دەچڕى و گۆرانیەکانى ببوون بە گۆرانى ڕۆژ ،
کاتێک گوێ بیستى گۆرانیەکانى ( هاتم هاتم و پەڵپوبیانوم پێ مەگرە ) دەبیت ڕاستەوخۆ هونەرمەند ( عومەر ڕەزا ) لەدەرگاى بیرو هۆشمان دەدا ، هونەرەکەى دەمانگێڕێتەوە بۆ ناوەڕاست و دەیەى کۆتایى سەدەى بیست ، دەنگێکى ناسک و خۆش و ئاواز و تێکستى سادە کەبەزوویى ببوونە وێردى سەرزارى کۆمەڵانى خەڵکى کوردستان ،دەنگێکى عاشقانەى خۆڕسک و بێ مامۆستا گۆشکراو ،دەنگێکى گەنجانەى ئەو سەردەمە کە عەشق و سۆزى بەخشیوەتە گوێگر ،
هونەرمەند عومەر ڕەزا هونەرمەندێکى جوان و هەست ناسکى شارى سلێمانى دواى تۆمارکردنى ئەو چەند بەرهەمە ، زۆر بەداخەوە ، لەهونەرى گۆرانبێژى دوورکەوتەوە ، ئەویش بەهۆى هەژارى و نەبوونى هاوکارى و دەستگیرۆیى هونەرى ، ئێستاش کەلەژیاندایەوە و بارى تەندروستى لەبار نیەوە و پەراوێز خراوە ،
بیبلۆگرافیاى هونەرمەند عومەر ڕەزا :
عومەر حەمە ڕەزا شەریف ، ناسراو بە عومەر ڕەزا ، لەشارى هەڵمەت و قوربانى لەگەڕەکى چوارباخ لەساڵى (1942) لە خێزانێکى کرێکارو زەحمەتکێش ونەدار لەدایکبووە ،
بەڵام عومەر نەیتوانیوە تەمەنى خۆشى منداڵى و بەها جوانەکانى منداڵى لەسلێمانى بەسەر بەرێت ، بەهۆى ئەو بارودخە ناهەمووارەى دواى جەنگى جیهانى دووەم کە نەهامەتى و قات و قڕى کەبەسەر جیهاندا باڵى کێشاو خانەوادەى ئەو هونەرمەندەش کەوتنەبەر شەپۆلى ئەو بەدبەختی و نەبوونیە ، باوکى لەپێناو دابینکردنى نان و ژیان بۆ خۆى و خێزان و منداڵەکانى ،ڕوو دەکاتە شارى هەڵەبجە ، ئەو شارەى بەشارى شاعیران و هونەرمەندان و ڕووناکبیران ناسراوە ، لەوێ درێژە بەژیان دەدەن ،
عومەر ڕەزا لە هەڵەبجە دەچێتە قوتابخانە ، لە قوتابخانەى هەڵەبجەى سەرەتایى دەخرێتە بەر خوێندن و فێربوونى ئەلف و بێى کوردى ، بەڵام لەو قوتابخانەیە عومەر ڕەزا بەهرەى دەنگخۆشى تێدا بەدى دەکرێت ئەویش بەهۆى مامۆستاى ئەدیب و هونەرمەند ( عەلى شەونم) ، ( ع،ع،شەونم)
مامۆستا عەلى شەونم کەسەرپەرشتیارى تیپى سروودى قوتابخانەى هەڵەبجە بووە ، بەهەست و سۆزى هونەرییانەى خۆى درکى بەبەهرەى دەنگ خۆشى عومەر ڕەزا کردووە ،هەوڵى لەگەڵدا داوە و لەتیپى سروودى قوتابخانەى هەڵەبجە دایناوە و بەیانیان عومەر ڕەزا لەگەڵ هاوڕێ قوتابیەکانى بەدەنگێکى خۆش سروودە ڕەسەنە نەتەوەییەکانى گەلەکەمانیان خوێندووە ، وەک ( خۆشم ئەوێ وڵاتەکەم ، ئەى ڕەقیب ، ئەى دلێران ، خوایە وەتەن ئاواکەى ، …..تاد )
ئەو بەردەوامییەى عومەر ڕەزا لەناو تیپى سروودى قوتابخانەى هەڵەبجە زیاتر مامۆستا عەلى شەونمى هانداوە کە گرینگى زیاترى پێبدات ، تا ئەو جێگەى ئەو مامۆستا هونەرمەندە دوو گۆرانى بۆ عومەر ڕەزا ئامادەبکات لەهەڵبەست و ئاوازى مامۆستا عەلى شەونم خۆى بووە ،داویەتى بە عومەر تا بیخوێنێ ، گۆرانیەکانیش بریتى بوون لە ( هاتم هاتم ، پەڵپو بیانووم پێ مەگرە ) ئەو گۆرانیانە دەکەونە سەر زارى هاوڕێکانى و خەڵکى و جێگەى خۆشى و داخوازى خەڵکى دەبن
بەمشێوەیە عومەر ڕەزا بەردەوام دەبێت لەخوێندن و ژیان لە شارى هەڵەبجە ، تا ساڵى (1957) بەماڵەوە دەگەڕێنەوە شارى سلێمانى و هەڵەبجە بەجێدێڵن ، بەڵام ئەمجارە لەگەڕەکى ( سەرچیمەن) ى شارى سلێمانى نیشتەجێ دەبن ،
ئەو گەڕانەوەیە بۆ عومەر دەبێتە هۆى دەستبەرداربوونى لە خوێندن بەهۆى سەختى ژیان و ناچار لەگەڵ باوکیدا شان دەداتە بەر کرێکارى و دەبێتە کرێکار لە دروستکردنى کارگەى جگەرەى سلێمانى ، بەڵام لەگەڵ ناڕەحەتى ژیان و ئەو ئەرکە گرانەى سەرشانى ، بەڵام دەست بەردارى هونەرى گۆرانى وتن نابێت و هەمیشە لەخەمى ئەوەدا دەبێت کە گەشەبەهونەرى گۆرانى گوتن بدات ،
ئیستگەى کوردى بەغدا کاریگەرى زۆرى لەسەر بیسەران و هەوادارنى میوزیک و گۆرانى دانابوو عومەر ڕەزا لەپێناو ئەوەى کە هونەرەکەى لەڕێگەى ئەو ڕادیۆیەوە بگەیەنێتە گوێگر لەساڵى ( 1958) عومەر ڕەزا ڕوو دەکاتە شارى بەغدا لەوێ بەڕێکەوت ( خەلیل عەبدوڵا و ئەحمەدى شێخاڵى و هونەرمەند شەماڵ ێائیب ) دەبینێ و زۆر خۆش حاڵ دەبێت بە دیتنى ئەو کەسایەتیانە ، دواى باس و خواسى هونەرى داواى گۆرانى لێدەکەن و عومەریش گۆرانیان بۆ دەچڕێ ، ئەوانیش سەرسام دەبن بەدەنگى و بڕیاردەدەن لەگەڵ خۆیان بیبەن بۆ ئیستگەى کوردى ،
کاتێک دەیبەنە ئیستگە لەوێ وەریدەگرن و ناوى دەنووسن بە (( عومەر ڕەزا ) ) ناوى (حەمە) کەى لێدەکەنەوە ، لەو کاتەوە بە (( عومەر ڕەزا )) نێوبانگى دەرکردووە ،
لەئیستگەى کوردى بەغدا ئەو دوو گۆرانیەى کە مامۆستا ( ع،ع، شەونم) لەشارى هەڵەبجە بۆى ئامادەکردبوو ، لەوێ لەگەڵ تیپى موزیکاى ڕادیۆ ، بەمیوزیکەوە دەیانخوێنێ ،
هونەرمەند عومەر ڕەزا دەڵێت ( من خۆم هەستم بەو بەهرەى دەنگخۆشیە نەئەکرد کە لەمندا هەیە بەڵام مامۆستاى گەورەو پیرۆزم ( ع،ع،شەونم) ئەو بەهرە هونەرییەى لەمندا بەدى کرد ئەو گۆرانیانەى بۆدانام ،بەڵام کاتێک چوومە بەغدا و لەئیستگە ئەو گۆرانیانەم بەمیوزیکەوە خوێند ، تام و چێژێکى زۆرى هەبوو ، هەستم بەخۆشى و دونیایەکى گەورە دەکرد و لەخۆشیدا گەشکە ئەیگرتم ))
دواى تۆمارکردنى ئەو گۆرانیانەو بڵاوبوونەوەیان لە ڕێگەى ئیستگەى کوردى بەغداوە ، دەبێتە جێگەى خۆش حاڵى خەڵک و زیاتر بووە هۆى ناساندنى عومەر ڕەزا لەنێو خەڵکیداو بەهۆى ئەو ڕادیۆیەوە دەنگى عومەر ڕەزا سنوورى بەزاندوو لە ڕۆژهەڵاتى کوردستانیش نێوبانگى دەرکرد ،
ئەو سەردەمە لەشارى سلێمانى گۆرانیەکانى عومەر ڕەزا ڕۆژ بەڕۆژ لەنێو جەماوەردا دەنگى دەدایەو و خەڵکى پێى ئاشنا دەبوون ، لەهەمانکاتدا تیپى موزیکاى مەولەوى بەسەرپەرشتى هونەرمەندى گەورە (قادر دیلان ) کارە هونەرییەکانیان ئەنجام دەدا ، هەروەها هەردوو هونەرمەند لەیەک گەڕەکدا دەبن و هاوسێى یەکتریش دەبن ، هونەرمەند قادر دیلان عەمەر ڕەزا دەبات بۆ تیپى موزیکاى مەولەوى ، لەوێ بەم هونەرمەندانەى دەناسێنێ وەک ( ولیەم یوحەننا ، نەجاتى عەبدە ( ناى ژەن)، حازم حەداد (عود ژەن) ، هادى عەنبەر ( کەمانچە ژەن ) ، حاتەم سەعید ( ئیقاع) ، بەهجەتى سەعاتچى و خاڵە حەمەفەرج و چەند کەسایەتیەکى تر وەک لەتیف حەمدى ) ( یادیان بەخێر)
هەرچەندە هونەر بەگشتى لەو سەردەمەدا جێگەى بایەخ نەبووە لەنێو کۆمەڵگادا ئەویش هۆکارى داب و نەریتى کۆمەڵگا بووە، تەنانەت لەلاى هەندێک خێزان و بنەماڵەى ئەو شارە پەسەند نەبووە بەڵکو بەکەمیش سەیرکرا وە ، بەڵام ئەو هونەرمەندە بەڕێزانە توانیان بەهەموو شێوەیەک خزمەتى ڕاستەقینەى هونەرى کوردى بکەن و بناغەیەک بۆ میوزیک و گۆرانى کوردى دابڕێژن ،( هەزار ڕەحەمت لەگڵکۆکانیان )
دواى ئەوەى هونەرمەند عومەر ڕەزا بەتیپى موزیکاى مەولەوى ئاشنا دەبێت ، و دەکەوێتە کارکردن لەگەڵیاندا ، ئەو تێکەڵاوبوونە دەبێتە هۆى تۆمارکردنى چەند گۆرانیەک وەک گۆرانى ( لەیارەوە ) لە هۆنراوەى شاعیرى گەورە ( ئەحمەد هەردى ) یە هونەرمەند قادردیلان ئاوازى بۆ دادەنێت پاشان گۆرانى ( دیارى ) کە هونەرمەند ( نەجاتى عەبدە) بۆى ئامادەکردووە ، هەروەها مامۆستاى گەورە ( ولیەم یوحەننا ) گۆرانى ( گوڵاڵەى ژیان) ى بۆئامادەکات ، بەو گۆرانیانە عومەر ڕەزا زیاتر ناوبانگى دەرکردو ناسرا ،
یەکێک لەکارە گرینگەکانى تیپى موزیکاى مەولەوى کەبەرامبەر هونەرمەند عومەر ڕەزا ئەنجامیان داوە و خودى هونەرمەندیش هەمیشە سوپاسگوزارى ئەو کارە باشەیە ،کە تیپى ناوبراو توانیویانە عومەر ڕەزا وەک فەرمانبەر لە فەرمانگەى دارستانى سلێمانى ( دائرە غابات) وەک چاودێر دایبمەزرێنن،
لەساڵى (1959) لەلایەن ئیستگەى کوردى بەغداوە بانگهێشت دەکرێت ، بۆمەبەستى بەشداریکرنى لەئاهەنگى یادى شۆڕشى 14 ى تەمموز ، لەهۆڵى ئوتێلى بەغداد ، کە چەندین کەسایەتى نیشتمان پەروەرى کورد و عەرەب و بەڕێز عبدالکریم قاسم ئامادەى ئەو ئاهەنگە بوون ،
هونەرمەند عومەر ڕەزا لەهەمان ساڵدا لەئیستگەى کوردى بەغدا بەهاوکارى هونەرمەند (شەماڵ ێائیب) چەند گۆرانیەکى تر ئەخوێنێ ، گۆرانى ( بۆتۆیە دڵ بۆ تۆیە و تاکەى تاکەى ) کەلەئاواز و هەڵبەستى شەماڵ ێائیب بوون ،
سەبارەت بە و گۆرانیانە و هاوڕێیەتى و دۆستایەتى لەگەڵ شەماڵ ێائیب ، عومەر ڕەزا بەم شێوەیە دەدوێت :
( هەر لەساڵى 1959 دا بوو ڕۆژێک شەماڵ ێائیب بانگى کردم و وتى وەرە دوو دیارى چاکم بۆ ئامادەکردوویت ، بەخوێندنى ئەو گۆرانیانە دەبیت بە ( فەرید ئەترەش) ( ئەو کاتە فەرید ئەترەش یەکێک بوو لە هونەرمەندە گەورەکانى عەرەب و کاریگەرى لەسەر هونەرمەندانى کورد بەتایبەت شەماڵ ێائیب دانابوو ) منیش وتم دەستەکانت ماچ ئەکەم کاکە شەماڵ ، هەربۆیە کاکە شەماڵ بەعودەکەى خۆى لەئیستگە سووکە پرۆڤەیەکى پێکردم ، شەماڵ وتى بڕۆ بەخوا خۆیەتى!!!!!! سبەینێ عەسر وەرە بابەکوێرەکانى لەبەر بکەم و تەسجیلى کەین ، مەبەستى کوێرەکان ،
( گرووپە میوزیگژەنەکانى ڕادیۆى کوردى بەغدابوو) ئەوەبوو لەکاتى دیاریکراودا کە هونەرمەند شەماڵ ێائیب داینابوو ئەو دوو گۆرانیە تۆمارکراو و بڵاوکرایەوە ، دەنگى دایەو و سەرکەوتنێکى گەورەبوو بۆمن )
دواى ماوەیەک هەردوو گۆرانى ( ئەرێ لەیلێ و بۆتۆیە دڵ) هونەرمەند شەماڵ ێائیب بەدەنگى خۆى تۆمارى کردونەتەوە
لەساڵى (1961) مامۆستاى هونەرمەند ( لەتیف حەمدى ) چەند ئاوازێکى بەتێکستى باش و سەرکەوتوو بۆ عومەر ڕەزا ئامادەکات وەک گۆرانى ( یارى چاوکاڵ و گۆرانى ئەڵێم وەک ساماڵ ) ئەو گۆرانیانەش دەچنە سەر خەرمانى هونەرى عومەر ڕەزا و زیاتر ناوبانگ لەنێوەندى هونەریدا پەیدا دەکات ،
بڵاوبوونەوەى ئەو بەرهەمانەو زیاتر ئاشنابوونى دەنگى عومەر ڕەزا لەنێو خەڵکیدا بووە هۆى ئەوەى لەلایەن کۆمپانیاى (چەقماقچى) داوالەعومەر ڕەزا بکرێت کە گۆرانى ( هاتم هاتم ) لەسەر قەوان تۆماربکات بەلاًَم بەشێوازێکى نوێ و کۆرسى کچانى لەگەڵدا دەبێت ،ئەوکارە بۆ ئەو سەردەمە زۆر دەگمەن بووە ، لەبەرابەر تۆمارکردنى ئەو گۆرانیە لەسەر قەوان کۆمپانیاى چەقماقچى بڕى (200) دینارى ئەو سەردەمەى وەک دیارى دەدەنێ ،
لەناوەڕاستى سەدەى پێشوو هاوشانى کارى هونەرى میوزیک و گۆرانى ، کارى هونەرى نواندن و شانۆ لەبرەودادەبێت و کۆمەڵێک هونەرمەندى بەتوانا کۆمەڵێک کارى باشیان ئەنجام داوە ، لەنێوان ساڵەکانى ( 1960 بۆ 1961) شانۆگەرى و ئاهەنگى گۆرانى و میوزیک بەیەکەوە پێشکەشکراون ، عومەر ڕەزا وەک هونەرمەندێکى گۆرانیبێژ لەگەڵ تیپى موزیکاى مەولەوى لەچەندین ئاهەنگدا لەگەڵ شانۆگەرى ( بەرەو دوا ) ، (مەم و زین ) و ( پیسکەى تەڕپیر) بەشدارى کردووە ، لەو شانۆگەریانەدا هونەرمەندى شانۆکارو دەنگخۆش مامۆستا ( ڕەفیق چالاک ) ڕۆڵى گرینگ و بەرچاوى هەبووە هەروەها یادیان بەخێر ( هونەرمەندان ڕەووف یەحیا و ئەحمەد دەنگ گەورە ) و لەگەڵ چەندین هونەرمەندى ترى شارى سلێمانى لەبوارى شانۆدا،
هونەرمەند عومەر ڕەزا بەیەکێک لەگۆرانیبێژانى ئیستگەى کوردى بەغداد دێتە ئەژمارکردن ، عومەر ڕەزا کەسایەتیەکى بێدەنگ و هونەرمەندێکى هەست ناسک و خۆشەویستى نێو هاوەڵەکانى دەبێت ، پەیوەندیەکى پتەو و خۆشى لەگەڵ هونەرمەندانى ئیستگەى کوردى بەغداد دا دەبێت ، وەک ( مامۆستا عەلى مەردان ، تایەر تۆفیق ، باکورى ، ڕەسوڵ گەردى ، شەماڵ ێائیب ، محەمەد عارف جزیرى و حەسەن جزیرى و جەلال کۆچەر ….تاد)
دواى تۆمارکردنى ئەو بەرهەمانە ، بەهۆى دروستکردنى خێزان و بوونى منداڵ و قورس بوونى ئەرکەکانى سەرشانى و بەهۆى کەمدەرامەتیەوە ئەو هونەرمەندە لە هونەرى گۆرانیبێژى دوور دەکەوێتەوە ، نەبوونى و سەختى ژیان تەنگى پێهەڵدەچنێ ،
لەساڵى ( 1984) لەسەر داخوازى تەلەفزیۆنى کەرکوک هەموو گۆرانیەکانى هونەرمەند بەشێوەى ( پلەى باگ) بۆى تۆماردەکەنەوە،
ئیتر عومەر ڕەزا ڕۆژ بەڕۆژ لە هونەرى گۆرانیبێژى دووردەکەوێتەوە ، درێژە بەژیان دەدات تا ڕاپەڕینە مەزنەکەى ساڵى 1991 وەکو هەرتاکێکى ئەو کۆمەڵگایە خراپى و دژاواریەکانى ژیان زیاتر بەرۆکى پێدەگرن و خەم و کەسەرى لەدەستدانى هاوسەرى ئەوەش بۆ عومەر ڕەزا خەم و داڕووخانێکى تر دەبێت ،
عومەر ڕەزا دەبێت بە کارمەندى خزمەتگوزتر لەدیوانى پارێزگاى سلێمانى ، هونەرمەند بەم شێوەیە باس لە پارێزگارى ئەو کاتەى شارى سلێمانى بەڕێز (سالار عەزیز) دەکات کە شێوازى مامەڵکردنى لەگەڵ عومەر ڕەزادا بە چ شێوەیەک بووە:
(هیچ کات دڵسۆزى و هەستى پاک و بێگەردى و مرۆڤدۆستى کاکە سالار عەزیز لەیاد ناکەم ، چونکە ئەو کاتە من فەڕاش بووم زۆر بێ دەرەتان بووم ، ئەو بەڕێزە وەک هاوەڵێکى ساکار و سادەى دێرینى خۆى دەست لەملانم دەبوو ، هەمیشە هەڵگرى خەمەکانم بوو، دڵنەوایى دەکردم و قسەى خۆشى بۆ دەکردم بۆئەوەى خەمەکانم بڕەوێتەوە ، بەردەوام هاوکارى ماڵى دەکردم و هیچ کات فەرامۆشى نەدەکردم ، هەموو کات چاکە و پیاوەتى ئەو مرۆڤ دۆستەم لەیادە ، بەهاوکارى کاکە سالار عەزیز یارمەتى بەڕێز مام جەلال بۆ هونەرمەندان بۆم بڕایەوە و هەموو مانگ وەرم دەگرت )
هونەرمەند عومەر ڕەزا خانەشین دەبێت ، و بارى تەندروستى ڕۆژ بەڕۆژ ڕوو لە خراپیەو مووچەى ڕێزلێنانیشى بڕاوە لەبەر ئەوەى کە مووچەى خانەنشینى وەردەگرێت ، ئایا ئەو مووچەى خانەشینەى کەوەریدەگرێت تۆبڵێى بەشى ژیانى بکات ، ئێستا ئەو هونەرمەندە لەژیاندایەو بەڵام بارى تەندروستى باش نیە و داواکارم لەسەندیکاى هونەرمەندان و یەکێتى هونەرمەندان ئاوڕێک لەو هونەرمەندە بدەنەوەکەڕۆژانێک بوو خزمەتێکى بەهونەرى میوزیک و گۆرانى نەتەوەکەمان کردووە ، ئومێدى لەش ساغى و سەرفرازى بۆ هونەرمەند عومەر ڕەزا و یادى هەموو ئەو هونەرمەندە کۆچکردووانەى گەلەکەمان بەگشتى بەخێرو ڕووحیان شاد بێت
گۆرانیەکانى هونەرمەند عومەر ڕەزا :
1: هاتم هاتم / لە ئاواز و هەڵبەستى / ( ع ،ع، شەونم )
2: پەڵپ و بیانووم پێ مەگرە / لە ئاواز و هەڵبەستى / ( ع ،ع، شەونم )
3: لەیارەوە / ئاوازى / نەجاتى عەبدە …. هۆنراوەى / ئەحمەد هەردى
4: گوڵاڵەى ژیان / ئاوازى / ولیەم یوحەننا
5: یارى چاوکاڵ / ئاوازى / لەتیف حەمدى
6: گۆرانى ئەڵێم وەک ساماڵ / ئاوازى / لەتیف حەمدى
7: بۆتۆیە دڵ بۆتۆیە / لە ئاواز و هەڵبەستى / شەماڵ ێائیب
8: تاکەى تاکەى / لە ئاواز و هەڵبەستى / شەماڵ ێائیب
تێبینى / ڕێزوسوپاسم بۆ کاکە ( ڕێژین ) کوڕى هونەرمەند کە هاوکارى کردم بە پێدانى زانیارى و هەروەها مامۆستا و هونەرمەندى میوزیکژەن ( عەلى حەمە ڕەزا ) براى هونەرمەند ( عومەر ڕەزا ) لەسەر هونەرمەندى ناوبراو ،
تکایە ئەم بابەتە ئەو (3) وێنەیەى لەگەڵدایە
1/ وێنەى هونەرمەند عومەر ڕەزا ( سەردەمى گەنجى )
2/ شەماڵ ێائیب و باکوورى و عومەر ڕەزا … جەژنى قوربان مانگى 6/1958 باخچەى کتێبخانەى گشتى سلێمانى
کاتى ئاهەنگى تیپى موزیکاى مەولەوى
3/ تازەترین وێنەى هونەرمەند لەڕێکەوتى (10/9/2010) سلێمانى
