زانا گەڵاڵی: دوای ململانێیەکی زۆر لەگەڵ نەخۆشی، بەرەبەیانی ئەمڕۆ یەکشەممە هونەرمەندی ناوداری میسری (یوسف داود) لەتەمەنی ٧٤ ساڵی کۆچی دوایی کرد. هونەرمەند ڕۆژی جوارشەممەی رابردوو لەپڕ باری تەندروستی تێكچوو بەوهۆیەوە گوازرایەوە بۆ نەخۆشخانەی (جمال عبدلناسر ) لە ئەسکەندەرییە، تا بەرەبەیانی ئەمڕۆ یەکشەممە٢٤/٦ ماڵئاوایی لەژیان کرد. هەروەک بریاریشە ئێوارەی ئەمڕۆ
مەراسیمی بەڕیکردنی تەرمی ناوبراو لە کڵیسای((المرقسيە)) لەئەسكندريە بەڕێوەبچێت .
هونەرمەندی گەورە ژیانی هونەری لەناوەراستی هەشتاکان دەستپێکرد و لەماوەی تەمەنی هونەرییدا ژمارەیەکی زۆر بەرهەمی سەرکەوتووی پێشکەشکرد، بەتایبەت لە هونەری کۆمێدیا ((سەرکەوتنێکی باشی بەدەست‌هێنا و توانایەکی مەزنی هەبوو لەبەرجەستەکردنی ڕۆلەکان لەهەریەک لە بوارەکانی سینەماو تەلەفزیۆن و شانۆ.
لەماوەی ژیانی هونەریدا هونەرمەند یوسف داود چەندین بەرهەمی پێشکەشکردین کە هەمیشە لە بیرو هزری جەماوەر بەنەمری دەمێننەوە، لەوانە ((يوميات ونيس، في شقة مصر الجديدة، حلق حوش، اﻹرهاب والكباب، الشيطانة التى أحبتني )) وەچەندانی تریش..
دووا کاری هونەریی یوسف داود :
دواکاریشی بەشداریکردنی بوو لە فیلمی ” 365 يوم سعادة ” هەروەها خەریکی خۆ ئامادەکردن بوو بۆ بەشداریکردن لەبەشی دووەمی “قصص الإنسان في القرآن” کەبڕیار بوو لە مانگی رەمەزان پەخشبکرێت .
شایەنی باسە هونەرمەند یوسف داوود لە ١٠ مارس ١٩٣٨ لە شاری ئەسکەندەرییە لەدایک بووە، دەرچووی کۆلیجی ئەندازیارییەو لەم بوارەشدا کاری کردووە بەر لەوەی دەست بەکاری هونەری بکات.
زانا گەڵاڵی
