هه‌ڵه‌بجه‌ جوانه‌ پیرنابێ

هه‌ڵه‌بجه‌ جوانه‌ پیرنابی

تیشکی خۆره‌

ته‌نیا به‌شه‌وان ئه‌خه‌وێ

هه‌ڵه‌بجه‌ هێند سیحراوییه

هاوینان ئه‌بێت به‌باران

چرۆ ئه‌کات به‌ پایزان

هه‌موو شه‌وێک له‌ناو خه‌ودا

هه‌ڵه‌بجه‌ پۆله‌ نه‌وره‌سه‌و

له‌که‌ناری چاوانم دا

له‌نگه‌ر ئه‌گرێ

له‌م ته‌نگه‌ژاوه‌ی دڵمدا

دارێک نه‌ماوه‌ سه‌وزبێ

له‌م بێزارییه‌ی ناخمدا

باخێک نه‌ماوه‌ زه‌رد نه‌بێ

بۆ دڵ دانه‌وه‌ی ئه‌م دڵه‌

هه‌ڵه‌بجه‌ دێت و گوڵ ئه‌گرێ

به‌داوێنی شنروێ وه‌

بوکی ڕازاوه‌ی به‌هاره‌

له‌ناو سینه‌ی شاره‌زووردا

هه‌ڵه‌بجه‌ گوڵی هه‌ناره‌

زه‌ڵم بێ ئه‌و وشکه‌ لێوی

دنیا بێ ڕه‌نگه‌ بێ ڕه‌نگی

هه‌ڵه‌بجه‌ جوانه‌ پیر نابێ

له‌گه‌ڵ هه‌موو جوانێ یاره‌

ڕێباز عوسمان عزیز

ستۆکهۆڵم