تا په‌نجه‌كانی خاتونێك ته‌ونی به‌خته‌وه‌ری نه‌كا
تا تریفه دڵی شكاوی كیژێك
نه‌كاته پۆسته‌ر و به قه‌دی ئاسماندا هه‌ڵی نه‌واسێ
تا ژنێك بۆ ئه‌نفال بگری و هه‌نسكه‌كانی نه‌ژمێردرێت
هه‌ڵدێم
هه‌ڵدێم له موتوربه كردن
نامه‌وێ موتوربه‌م كه‌ن
من منم….من ژنم
تا هه‌تیوه‌كانی مه‌مله‌كه‌تم
ئه‌سرینیان ووشك نه‌كات
تا ئاسمان له خۆی نه نه‌وێت
پروشه به‌فری پاكبونه‌وه
نیشتیمانم دانه‌پۆشێت
هه‌ڵهاتوم و هه‌ڵدێم
تا ئه‌و كاته‌ی شاسواری حه‌زه‌كانم
وه‌ته‌ن ئه‌كاته قیبله‌ی خۆی
ئه‌وسا منیش ئامێزی بۆ ئه‌كه‌مه‌وه
په‌راسوم ئه‌كه‌م به په‌یژه بۆی
تا سه‌ر كه‌وێ
ئه‌ستێره‌ی به‌ختی ووڵاتم
له ئاسماندا بدۆزێته‌وه
ئاڵای پیرۆزی كوردستان
له گه‌ردوندا بشه‌كێته‌وه.
