هه‌واڵێکی سه‌یر

به‌ندی عه‌لی 2010

په‌نجه‌ره کریستاڵیه‌کانی

ژووری خه‌وتان توند کڵۆم ده‌ن

په‌رده‌کانیش باله‌پێستی وورچ و گابن

خه‌ونه‌کانیش به‌و به‌تانیانه‌ داپۆشن

که‌نیگاری پڵنگێکیان له‌سه‌ر نه‌خشه‌و

نه‌که‌ن ده‌رکی دؤڵابه‌کانی نهێنی و

جلکی شه‌وتان به‌کراوه‌یی جێ بهێڵن

له‌هه‌ر سوچ و قوژبنێکی ماڵه‌که‌شدا

ته‌ڵه‌ی مشکتان بیر نه‌چێ و

قوفڵێکی گه‌وره‌ی گومانیش

له‌دوا ده‌رگای متمانه‌ ده‌ن

چاوه‌زارێک ، بۆ چاوی پیسی به‌دکارو

ناڵی بارگیرێکی شه‌لیش

به‌گوێسه‌بانه‌که‌ی به‌ختا شۆڕکه‌نه‌وه‌

نه‌وه‌ک سواڵکه‌رێکی به‌رباد

ئیره‌ییتان پێ به‌رێت و یان بکه‌ونه‌

به‌ر نه‌فه‌سی قه‌ره‌جێکی بێ نیشتیمان

فه‌رشی دڕکیشتان بیر نه‌چێ

له‌به‌ر ده‌روازه‌که‌ی حه‌وشه‌

ده‌ڵێن گوایه‌

ده‌عبایه‌کی زۆر بێ شه‌رم په‌یدا بووه‌

به‌گشت که‌له‌به‌رێکدا ده‌چێ

ناوی (حیزبه‌)و .. کاتێ که‌دێ

خۆیتان لێده‌کا به‌وه‌نه‌وشه‌