نه‌ورۆز

به‌ندی عه‌لی .. 2012

ئه‌گێڕنه‌وه‌ ئه‌ڵێن گوایه‌

جاری جاران ، زه‌مانی زوو

نیشتمانی مرۆڤ ته‌نیا

په‌ناو سوچی ئه‌شکه‌وتێ بوو

شه‌وی تارو نسرم و سارد

دیواری ته‌ڕ ، هه‌واشی په‌نگ

له‌نێویا دیده‌ نابیناو

هزر خنکاو ، هه‌ناسه‌ ته‌نگ

ئه‌و عه‌یامه عه‌رشی گومان

که‌تاقانه‌ قه‌ڵه‌م ڕه‌و بوو

ترس سوڵتانێکی ڕه‌هاو

ئومێد کۆیله‌و یه‌قین خه‌و بوو

ئه‌گێڕنه‌وه‌ ، ئه‌لێن گوایه‌

بێ مه‌به‌ست و هه‌ر به‌ڕێکه‌وت

شه‌وێکیان سنگی جووتی به‌رد

یه‌کێکیان به‌ر ئه‌وی تر که‌وت

یه‌که‌م کۆرپه‌ی پریشکی گڕ

له‌دایک بوو به‌یه‌کجاری

ئیتر له‌و ساته‌وه‌ ئاگر

بوو به‌ده‌ستووری ڕزگاری

بۆیه‌ هه‌رده‌م منی گڕ دۆست

بێ چه‌ن وچون له‌لام وایه‌

بڵێسه‌ی ئاگری نه‌ورۆز

زه‌نگی رزگاریی دونیایه