_ نازناو _
ناوت لێنانێم چاوه‌كه‌م ،
چاوم سه‌رچاوه‌ى فرمێسكه
چى له‌م وشه بێهێزه‌كه‌م …
كه ئه‌وینت تا سه‌ر ئێسكه !؟.
ناوت لێنانێم دڵه‌كه‌م ،
سه‌د جار شكێنراوه دڵم
تۆى هیوات پێداومه‌ته‌وه …
تا مردن قه‌رزارتم گوڵم .
ناوت نانێم هه‌ناسه‌كه‌م ،
چونكه هه‌ناسه ساردبوم ، زۆر
نه‌ك خوانه‌كا حه‌زى تۆڵه‌م …
ژیانت پرِكا له ناسۆر .
ناوت نانێم خۆشه‌ویستم ،
نازناوى گشت عاشقانه
چونكه له ناو دڵما ته‌نیاى …
ناوت لێئه‌نێم تاقانه .!!
***
_ من بۆ تۆمه تۆ بۆ كێته _
ئه‌وه‌نده منت خۆشنه‌وێ ،
با خه‌ڵكى پێتنه‌ڵێن شێته
له‌م تكایه‌م زویر مه‌به …
(من بۆ تۆمه تۆ بۆ كێته ؟) .
مه‌به خۆشه‌ویستى كه‌سێ ،
كه خه‌مى به‌دڵ خۆشه‌وێ
خیانه‌ت له دڵم ناكه‌م …
قه‌ت تۆى بۆ ناكه‌م به هه‌وێ !.
شادى له‌خۆت مه‌تۆرێنه ،
منت خۆشنه‌وێ ده‌خیله
چى له‌و دڵه وشكه‌م ئه‌كه‌ى ..
كه به ده‌ست خه‌مه‌وه دیله ؟.
من غه‌رقى كڵۆڵى خۆمم ،
تۆش دواى ژیانى خۆت كه‌وه
كه‌سێ خۆى بێ چاره‌نوس بێ …
كه‌ى چاره‌نوست لاى ئه‌وه ؟.
***
_ دو دڵۆپ خۆزگه _
خۆزگه ئه‌بوم به پیتێك و
بۆ سه‌ر لقى لێوت ئه‌فرِیم
به‌ڵكو جارجار له ده‌مته‌وه ،
به‌ناسكى ده‌رتئه‌برِیم .
یان خۆزگه ئه‌بوم به حه‌رفێك ،
له‌و حه‌رفانه‌ى …
ناوه‌كه‌تى پێئه‌نه‌خشێ
خۆَ هیچ نه‌بێ …
ئه‌گه‌ر بیكه‌یته ملوانكه ،
له‌و مل و گه‌ردنه‌ت ئه‌خشێ !.
_چاوجوان _
چاوى رِه‌شت هێنده جوانه ،
خاكى هه‌ستم ئه‌له‌رزێنێ
سه‌یره ! خۆتۆ زۆر مناڵى
به‌لاَم عه‌شقت ئه‌مبزوێنێ .
له‌و رِۆژه‌وه‌ى كه‌تۆم دیوه ،
هۆشت بردوم به مه‌ستى چاو
وه‌ها چویت به ناخى دڵما ،
بۆمن بویت به هه‌ناسه‌و ئاو .
كه‌تۆ به‌چاو لێم ئه‌رِوانى ،
من هه‌ر له‌چاوت ئه‌رِوانم
كاتێ سه‌ریشت دائه‌خه‌ى…
من سه‌یره‌كه‌م تا ئه‌توانم .
باوكت به‌هه‌ڵه‌داچوه ،
ئه‌و ناوه‌ى ئێستاى لێناوى
چونكه گوڵم له‌گشت لایه‌ك
تۆهه‌ر به‌چاو جوان ناسراوى !!.
***
_ تۆ كیژێ نیت تۆ دوو كیژى _
تۆ كیژێ نیت تۆ دوو كیژى …
رِۆژێ وه‌ك گوڵى ناو باخى ،
هێنده رِازاوه و بۆنخۆشى
رِۆژێ هۆى سه‌د ئاخ و داخى ،
كه‌دێى شه‌رِمان پێئه‌فرۆشى !.
تۆ كیژێ نیت تۆ دوو كیژى …
رِۆژ هه‌یه تۆڵه‌ڵێ گرِى ،
دێى له ماچمان هه‌ڵئه‌كێشى
رِۆژیش هه‌یه سارد و سرِى ،
ئه‌ڵێى چنگێ خۆله‌َمێشى !.
***
_ به‌ڵێننامه _
ئه‌گه‌ر هاتى …
گشت نێرگزى ئه‌م به‌هاره
ئه‌كرِمه‌وه
وه‌ك ته‌وقه ئه‌یده‌م له‌سه‌رت
ئه‌گه‌ر هاتى …
داره‌كانى ئه‌م هه‌واره
ئه‌برِمه‌وه
بێت و هه‌ڵنه‌ستن له به‌رت !.
به‌لاَم
چیبكه‌م كه‌نایه‌یت و
منیش چاوه‌رِێم گشت كاتێ
تۆش
بویت به ئه‌ستێره‌ى سیوه‌یل
چه‌ند ئه‌كه‌م
ده‌ستم ناتگاتێ !!.
aram abubakr
aram aramabu@yahoo.com
