مه‌یلی ووڵات

شیعری : ئیسماعیل خورماڵی

چه‌ند ڕۆژێکه‌ ، دڵم مه‌یلی ئێوارانی ووڵات ده‌کا

چاوم مه‌یلی سه‌رچنار و شنه‌ و ئاوی ووڵات ده‌کا

چۆن بیر ده‌چن باده‌ی ئه‌وێ و چپه‌ و ڕازی دڵدارانی

گه‌ڵای زه‌ردی پیره‌ دار و کوانووی گه‌رمی دڵدارانی

خۆزگه‌ ده‌کرا له‌سه‌ر باڵی گۆرانیه‌ک ده‌هاتمه‌وه‌

له‌شه‌قاما ، له‌کۆڵانا ، وه‌ک مناڵی ده‌خولامه‌وه‌

ئه‌ی نیشتمان قه‌زای به‌فری ، کۆێستانه‌که‌ت له‌ئێره‌ خه‌م

قه‌زای هۆبه‌ی گه‌رمیانه‌که‌ت ، سه‌د هه‌زار جار له‌ئێره‌ خه‌م

چۆله‌که‌ی سه‌ر هه‌ر چڵێکت ، سه‌د (که‌ناری) ئێره‌ دێنێ

شه‌رم و بزه‌ی هه‌ر شۆخێکت ، سه‌د فریشته‌ی ئێره‌ دێنێ

ئه‌ی نیشتمان ئێمه‌ بێ تۆ ، ڕوبارێکین ڕۆخمان کوژراو

ئێمه‌ لێره‌ ، ئێمه‌ بێ تۆ ، به‌هارێکین گوڵمان کوژراو

ئه‌ی کوردستان دۆزه‌خیش بی ، هه‌ر به‌هه‌شتی ئێمه‌ی به‌خوا

خوێنمان بۆ تۆ ، دڵمان بۆ تۆ ، تۆ به‌هه‌شتی ئێمه‌ی به‌خوا