من و تۆ

به‌ندی عه‌لی .. به‌هاری 2011

له‌له‌نجه‌ولاری شه‌پۆلا

هه‌ر میزاجی بێ متمانه‌ی ڕاز ئه‌بینم

ده‌مێ له‌هه‌ڵچوونی زیکرایه‌و

ده‌مێ له‌داچوونی خه‌ڵوه‌ت

له‌پرژه‌ بارینی تاڤگه‌ی مانگه‌شه‌وا

سیحری حوسنی فریشته‌یه‌ک

نازانم بۆ گیان کێشانم دابه‌زیوه‌

یان په‌یامێکی یه‌زدانی بۆ هێناوم

به‌بێ ڕوخسه‌ت

له‌ئاگردانی خۆروه‌

هه‌ندێ کورته‌نامه‌ی عیشق

که‌تۆ جارجاره‌ ئه‌ی نێری و

هه‌ر له‌ڕسته یه‌کتر بڕه‌کانی گۆڤاری

ژیان ئه‌چن

یان پڕن له‌کۆده‌کانی کامه‌رانی

یان ده‌رزیله‌کانی حه‌سره‌ت

له‌هات و چۆی

نه‌رم و نیانی شه‌ماڵی ئێوارانا

بۆن و به‌رامی هه‌ناسه‌ت هه‌ست پێده‌که‌م

که‌هه‌ر له‌نه‌فخی به‌زه‌یی ره‌حمان ئه‌چێ

بۆ په‌یکه‌ری به‌ده‌نی منێکی خوڵقاو

له‌گڵ و ئاو

له‌ماچی لێوی باریکی

هه‌موو پێکه‌ شه‌رابێکا

تامی شه‌ونمی تکاو له‌لێوت ئه‌که‌م

که‌جورعه‌ی ئه‌به‌دیی خه‌یاڵ

سه‌رم مه‌ست و

روحم وه‌ک توفلێکی ساوا

ئه‌هێنێته‌ سه‌ر گڕوگاڵ

هه‌موو دوو چڵه‌ نێرگزێکیش

مژده‌ی به‌هاری نیگاتم پێ ئه‌ده‌ن و

توانه‌وه‌ی .. کێوه‌ به‌فری خه‌مه‌کانم

ئه‌ی دورگه‌ ئه‌فسوونایه‌که‌ی

نه‌وره‌سه ماندووه‌که‌ی روحم

ئه‌ی هاوڕێی سه‌فه‌ری عومری

هه‌میشه‌ ڕوو له‌زریانم