مرۆڤێکی تەنیا لە نیشتمانێکی تەنیادا

سەدیق سەعید ڕواندزی

ھەرکاتێک بمەوێت لە بارەی کتێب و خوێندنەوە، پەیوەندی خۆم و سەرەتاکانی ئاشنابوونم بە دنیای کتێب و خوێندنەوە بدوێم و بنووسم، ھەست دەکەم وشەیەک و زمانێکم نییە بۆ ئاخاوتن و قسەکردن، ئاخر ئاسان نییە مرۆڤ وەسفی کتێب و جیھانی کتێب بکات، بە تایبەتیش بۆ منێک کە کتێب بۆی بووە دایک، باوک، مامۆستا، ھاوڕێ ، خێزان و بنەماڵە و ھەموو شتێک ! بۆیەشە زۆر بە ڕاشکاوی ئەوە دەڵێم، من دەتوانم چەندین ساڵ لە دووری ئەوانە بژیم و ھەڵکەم، بەڵام ڕۆژێک بێ کتێب و خوێندنەوە ھەڵناکەم، چونکە من لە کتێبەکانەوە فێربووم و پەروەردە بووم. من لە باوەشی دایک و باوکێکی نەخوێندەوار، میللی و نەریتی و خێڵەکییانە لە دایکبووم، ئاسان نییە مرۆڤ لە باوەشی دایک و باوکێکی چاو نەکراوەو میللی لە دایکبوو بێت و بتوانێت، ئەو کولتوور و نۆرم و دیدگە میللییانەش جێبێڵێت کە ئەوان و کۆمەڵگە ھەیانە. من لە سەرەتاوە، بۆ ئەوەی لەو دیدگایە دەرچم، دەبوو دەرەچەیەک بدۆزمەوە و بەر ژیانێکی دیکەی جیاواز بکەوم بۆ ئەوەی ئەو ھەست و تێگەیشتنە لای خۆم دروست کەم، کە ئیدی مرۆڤم، بە تایبەتیش کە خێزانەکەم وەک ھەر خێزانێکی دیکەی کوردی، کە منداڵەکانییان بێ ھیچ دڵنەوایی و فێرکردنێک فڕێ دەدەنە نێو عەزابی ژیان، منیش بەو شێوەیە کەوتمە نێو عەزابی ژیان. بۆیە دەبوو خۆم لە دنایەکی دیکەی جیاواز بدۆزمەوە ، کە ئەویش دنیای جوانی کتێب بوو. ئەم ئاشنابوونە بە کتێب، بووە سەرەتای کاروان و گەشتێکی ھەمیشەیی ژیانم کە بە ئێستاشەوە، نازانم لە کوێ و کەی کۆتایی دێت. لە ساڵانی نەوەدا، ئەو کاتەی مرۆڤ بەھای نانێکی نەبوو، لوولەی تفەنگەکان ھەموو سووچێکی نیشتمانی تەنیبوو، خوێن لە شەقامەکان دەڕۆیشت، کە قوتابی پەیمانگابووم، بە دەیان و سەدان جار، نان نەبوو بیخۆم، گیرفانم خاڵی بوو، سەرماو بێ دەرەتان وبێ لانە بووم، بەڵام ژوور سەرەینەکەم تەژیبوو لە کتێب. ئەو کات بە لامانەوە ئاسایی بوو، بێ نان بین، بێ خەوتن و پۆشاک و بێ پەیوەندی سۆزداریی و خۆشەویستی بین، بەڵام بێ کتێب نا. بۆیە شەوان تا بەرەبەیان دەمانخوێندەوە و گەنگەشەی کتێبمان دەکرد. ڕۆژگارەکان زوو تێ دەپەڕن، مرۆڤەکان ئەزموونی نوێ تاقیدەکەنەوە، ڕۆژگار مرۆڤەکان بە ئاراستەیەکی دیکە و ژیانێکی دیکە دەبات، بەڵام من ھەرگیز نەمتوانی دەستبەرداری کتێب و خوێندنەوە ببم، تا سەرەنجام بوومە مرۆڤێکی تەنیا، لە نێو نیشتمانی تەنیای کتێبەکاندا. ڕۆژگارەکان ھاتن و چوون، ساڵاکان دێن و دەچن، بەڵام پەیوەندی من و کتێب، ڕۆژ بە ڕۆژ قووڵ دەبێتەوە و بە نێو یەکتری دا دەچێت، تا ئەو ئاستەی ھیچ ڕۆژێک لە ژیانی من تێناپەڕێت ئەگەر کتێبێکی تێدا نەخوێنمەوە. ئەم ھۆگربوونەم بە کتێب، من کردیتە مرۆڤێکی دیکە، مرۆڤێک دابڕاو، گۆشەگیر، تەنھا و دوور لە خەڵک، دوور لە ھەموو بۆنەیەک کە.بە ڕاستی ئەوەندەی کتێبەکان دڵخۆش و ئاسوودەم ناکەن، ھاوکات نیگەرانیشم ناکەن وەک مرۆڤەکان، کە بە داخەوە ئێستا زۆرینەی ھەرە زۆریان تەنھا ناویان مرۆڤە و دوورن لە ھەموو بەھایەکی مرۆیانە. خۆشترین بۆنە و ساتەکانی ژیانی من ئەو کاتانەیە کە کێبێک دەخوێنمەوە، کتێب بۆ من نیشتمان و ژیان و ھەموو بوونمە، کتێب بۆ منی تەنیا و دڵشکاو لە ژیان نیشتمانێکە بێ سنوور، نیشتمانێکە وەرزەکانی تەنھا کتێبن، ڕۆژ و مانگ و ساڵەکانی تەنھا کتێبن، ئەوەندەی دڵم بە کتێبەکان دەکرێتەوە، پەروەردەیان کردم و فێریان کردم ئەوەندە، بە ھاوڕێ و خێزان و کەسە نزیکەکانم نابێتەوە، ڕەنگە ھەر لەبەر ئەوەش بێت کە من دەتوانم بە ساڵ و ساڵان، کەسێک نەبینم، بەڵام ناتوانم ڕۆژانە چاوێک بە کتێبێک نەخشێنم و نەیخوێنمەوە، چونکە ھەستدەکەم خۆم بوومەتە کتێب. ئەو ھۆگربوونە، جۆرێک ئاڵوودەبوونی بە کتێب لا دروست کردووم، کە تەنھا لەگەڵ کتێب بم، زۆرجار ئەمە جێگەی ڕەخنە، نیگەرانی و سەمەرەیە لای ھاوڕێکانم، کە من چۆن بەو شێوەیەم بەڵام ئیدی من وام، چێژ لەو ژیانەی خۆم وەردەگرم و تیایدا ئاسوودەم. چەند ساڵێکە کردوومە بە نەریت، کە ناوی ئەو کتێبانە بنووسم کە لە ماوەی ئەو ساڵەدا خوێندوومنەتەوە، ئەمساڵیش سوپاس بۆ خودای گەورە دەرفەتی ئەوەی پێدام کە ئەوکتێبانە بخوێنمەوە:

١_ چەند دوور بیت ئەوەندە نزیکی / حیکمەت/ و _ ھێرۆ سالار, ١٥٢ ل.
٢_پرسیارەکانی خۆشەویستی / کۆمەڵایەتی / فوزیە دریع / و _عەبدوڵا زەنگەنە ، ٤٣٦ ل.
٣_ئستاتیکاو جیاوازی / دیمانە/ عەبدولرەحمان مەعروف/ ٢٣٤ ل.
٤_شێوازەکانی گێڕانەوە لە ڕۆمانی داگیرکردنی تاریکیدا/ لێکۆڵینەوە/ دیمەن عەبدوڵا ساڵح /٣٢٠ ل.
٤_ سیاسەتی یەکسانی لە نێوان ژن و پیاودا / کۆمەڵایەتی / وەزارەتی ناوخۆ/٢٣ ل.
٥_- دەربارەی مارکسیزم لە زانستی زماندا / زمانەوانی / ستالین / و _ جەلال دەباغ / ٥٦ ل.
٦_ڕیشاڵی تیۆری ڕۆمانی کوردی/ لێکۆڵینەوە/ سەلاح جەلال/ ١٢٦ ل.
٧_ حیکایەتی ڕەشپۆشەکان/ چیڕۆک/ دانا فایەق/ ١٠٠ل.
٨_لە کلاسیکەوە بۆ مۆدێرن/ شانۆ/ دانا ڕەئووف/ ٤٠٥ ل.
٩_دیوەکەی تری دڵدار/ لێکۆڵینەوە/ بوخاری وشیار/ ١٠٥ ل.
١٠_ زەوی پلاستیک وەک دەرخەری کێشەکان/ لێکۆڵینەوە/ پێشەوا کاکەیی/ ١٠٠ ل.
١١_ چشتێک لە چەشنی شیعر/ لێکۆڵینەوە/ عەبدولخالق یەعقوبی/ ٢٥٠ ل.
١٢_ئەدەب و مەینەتی/ لێکۆڵینەوە/ نەجات نوری/ ٣٣٠ ل.
١٣_کۆمۆنیستەکان لە شۆڕش دەترسن/ دیمانە/ سارتەر/ و _شوان ئەحمەد/ ١٣١ ل.
١٤_دەربارەی شیعری گۆران/ لێکۆڵینەوە/ ئەنوەر قادر/ ٢٥٠ ل.
١٥_باولەکەی باوکم/ وتار/ ئۆرھان پامۆک/ و _ سامان کەریم/ ٢٢٠ ل.
١٦_گوڵی خۆشەویستی ھەڵوەریو/ ڕۆمان/ جەلال دەباغ/ ٧٠ ل.
١٧_ئەشکەوتی بەکرێگیراوان/ ڕۆمان/ دلێر کەریم/ ١٢٤ ل.
١٨_شیعرو بێدەنگی/ لێکۆڵینەوە/ ئارام سدیق/ ٢٥٧ ل.
١٩_خود و خودبینی/ ڕامانی ڕوحی/ فاروق ھۆمەر/ ٣٤٠ ل.
٢٠_ دارستانی شیعر/ بیۆگرافی/سیروان رەحیم/ ٢٤٠ ل.
٢١_ بیست و یەک تیشکی کوردستان/ چیڕۆکی منداڵان/ پەیام ئیبراھیم/ ١٢٤ل.
٢٢_ گەشتی ژیانم/ بیرەوەری/ عەتییە حەمە سەعید/ ٣٦٩ ل.
٢٣_لە بارەی خۆشەویستییەوە بۆم بدوێ/ ڕۆمان/ ئێزگین کلێچ/ و _ئەسرا وەھاب ١٧٠ ل.
٢٤_کچانی مەلەک تاوس/ ڕۆمان/ حەمەفەریق حەسەن/١٢٥ ل.
٢٥_ با شاعیرێک بکڕین/ ڕۆمان/ ئەفۆنشۆکرووش/ و_عیماد حەسەن/ ١٢٤ ل.
٢٦_ بوون لەگەڕانەوەی زەردەشدا/ لێکۆڵینەوە/ محمەد نەبی/ ١٢٥ل.
٢٧_کۆدەکانی نیگای ژنێک/ ڕۆمان/ سامان حەمە سەعید/ ٢٢٢ ل.
٢٨_ھەندێک کەس ھەرگیز تێناگەن/ ساتیر/ تۆخۆلسکی /و _سەروەرعمر/ ١٠٤ ل.
٢٩_ بە پێچەوانەی ڕەوتی باوە/ شانۆنامە/ فرمێسک مستەف/ ٧٢ ل.
٣٠_مرۆڤێکی تەنیا لەنێو کەوشەنی کتێبدا/ دیمانە/ جوتیار قارەمان / ١١١ ل.
٣١_ کلیدان/ فەرھەنگ/ عەبدولا َتاھیر بەرزنجی/ ٥٧٨ ل.
٣٢_سەرگوزشتەی پیاوێک/ ڕۆمان/ پاتریک سۆزکیند/ و- عەبدولغەنی کاکۆ/ ٨٧ ل.
٣٣_ ھێمن و ھەژار دۆست و دژوار/ لێکۆڵینەوە/ خالید دلێر/ ١٧٠ ل.
٣٤_ئاستەکانی خوێنەوەی شانۆنامە/ لێکۆڵینەوەی شانۆیی / ڕێباز محمد جەزا/ ٢٧٩ل.
٣٥_ پاریسی من/ بیرەوەری/ فەرھاد پیرباڵ/ ١٧٦ ل.
٢٦_تابلۆکانی ماریا/ شانۆنامە/ لیدیا شۆیەرمان/٧٦/و _فرمێسک مستەفا/ ٧٣ل.
٢٧_ ھێما لە دەقە واڵاکانی شێرکۆ بێکەس/ لێکۆڵینەوە/ ھەژار فەقێ/ ٢٥٧ ل.
٣٨_ فەرھەنگی زمانی شیعر/ لێکۆڵینەوە/ زانا خەلیل/ ٣٢٨ ل.
٣٩_ بۆنی خاک لە پرسی نەتەوەییدا / لێکۆلینەوە / فواد سەراج/ ١٩٢ ل.
٤٠_وێناو ئایدیا/ لێکۆڵینەوە/ موحسین ئەحمەد عمر/ ٥٦٣ ل.
٤١_ کورد و دیاسپۆرا/ سیاسی/ دانەر ئەبوبەکر/ ١٦٨ ل.
٤٢_ دەق بیانووە بۆ گێڕانەوە/ ئەدەبی/ حەمەکەریم عارف/ ٢٣٠ ل.
٤٣_ فڕینی دوور/ ئەدەبی/ ناسری حیسامی / ١٢٧ ل.
٤٤_ ڕێبازەکانی ڕەخنەی ئەدەبی/ ئەدەبی/ کۆمەڵێک نووسەر/ و _ عەتا قەرەداغی/ ١٥٧ ل.
٤٥_ شیعری نوێی کوردی/ لێکۆڵینەوە/ فەرھاد پیرباڵ/ ١٣٦ ل.
٤٦_ برسێتی و ئاوریشم/ گوتار/ ھێرتا مۆلەر/ و _ سەروەرعمر/ ٣٥٠ ل.
٤٧_ پرتەفاڵی شین/ گوتار/ موحسین ئەحمەد عمر/ ١٦٥ ل.
٤٨_ دراوسێ/ ھزری/ ھاوار محمەد / ٢٧٥ ل.
٤٩_ پارادۆکسەکانی خوێندن/ پەروەردەیی/ شەرمین ڕەشید/ ٣٧٥ ل.
٥٠_ ئەدەبناسی/ ئەدەبی/ د –کمال میراودەلی/ ٦١٢ ل.
٥١_ئەدەب و مێژوو/ ئەدەبی/ حەمەی حەمە باقی/ ٥٧٠ ل.
٥٢_ ڕەئیس ڕەمەزانەکان/ نۆڤلێت/ فەرھاد پیرباڵ/ ٤٧ ل.
٥٣_خیانەتی حەڵال/ ئەدەبی/ حەمە کەریم عارف/ ٤٢٠ ل.
٥٤_نامەکانی ڤان کۆخ/ نامە/ ڤانکۆخ/ و _ حەمە ھاشم/ ١٥٢ ل.
٥٥_ ڕوانگە یاران و نەیارانی/ ئەدەبی/ حوسێن عارف/ ٤٤٤ ل.
٥٦_ملوانکەی ئەفسووناوی/ ڕۆمانی منداڵان/ ئەمین محمد/ ٩٢ ل.
٥٧_کەسێتی مێژووی لە ڕۆمانەکانی ژان دۆستدا/ لێکۆڵێنەوە/ گزنگ حسن/ ٢٨٥ ل.
٥٨_ من و شێر پەنجەی باوکم/ پزیشکی/ د_شوان عوسمان/ ١٥٤ ل.
٥٩_وێنەی مەعشوق لە شیعرەکانی خاڵە ڕەشدا/ چیابان فارس/ ١٢٢ ل.
٦٠_ سێ وتار دەربارەی ئەدەبیاتی کوردی/ ئەدەبی/ و _ حوسێن محمد زادە/ ١٨٧ ل.
٦١_ ئەو وڵاتەی کەنییە/ شیعر/ ئێدیت سوێدەرگران/ و _ کەریم تاقانە/ ٧٥ ل.
٦٢_ ئاھەنگی دەمامکەکان/ وتار/ مەلوول/ ٨٢ ل.
٦٣_ئافرەت لە شانۆی کوردیدا/ شانۆ/ مەغدید حاجی/ ٢٨٠ ل.
٦٤_منداڵانی ھێڵی ئاسن/ ڕۆمان/ ئەی نزست/ و _ھەڵمەت عوسمان/ ٧٠ ل.
٦٥_شتێکت پێ دەڵێم بەختەوەرت بکا/ وتار/ سارا عەبدولرەحمان/ و _ ئاشنا محمد ٢٢٢ ل.
٦٦_ دادگاییکردنی ئەدەب/ ئەدەبی/ نەوزاد ئەسوەد/ ١٥٠ ل.
٦٧_ لە ستاییشی ژیاندا/ ئەزموون/ ڕەفیق سابیر/ ٥١٠ ل.
٦٨_ ئایکۆنی بەرەنگاری/ توێژینەوە/ نەوزاد عەلی ئەحمەد/ ٣١٠ ل.
٦٩_ھونەرەکانی ئەدەب/ توێژینەوە/ نەوزاد عەلی ئەحمەد/ ٢٥٥ ل.
٧٠ _کلووە بەفرەکان پەنجەکانم نا تەزێنن/ بیرەوەری/ گەزیزە/ ٢٢٥ ل.
٧١_بەھاکانی ژیان/ پەرە پێدانی مرۆیی / فازل جاف/ ١٩٣ ل.
٧٢_ نامۆیی لە شیعری حاجی قادردا/ توێژینەوە/ د_ شوکریە ڕەسول/ ٥٥ ل.
٧٣ _ ڕۆشنبیرە فریو دەرەکان/ وتار/ نەجات نوری/ ٢٨٨ ل.
٧٤_ درەوشانەوەی مێژوو/ وتار/ عیماد ئەحمەد/ ٣١٥ ل.
٧٥-مەرگێکی ھەڵواسراو/ چیڕۆک/ یوسف ئیسماعیل /١٢١ ل.
٧٦_لێکترازان/ شانۆنامە/ دانا ڕەئوف/ ١٦٤ ل.
٧٧_ڕەوتی گەشەکردنی چیڕۆکی کوردی / لێکۆڵینەوە / عەزیز محمد پوور / ١٧٢ ل.
٧٨_ پوورخورشید / ڕۆمان / شێخ سدیق / ٢٠٨ ل.
٧٩_شەڕەف / ڕۆمان / ئەلیف شەفەق/ و _ شەفیقی حاجی خدر / ٤٦٠ لڕ.
٨٠_ یادنامەکانی نیوە شەو / وتار / مستەفا محمود / و _باسیمە ستار / ١٢٧ ل.
٨١_زیاتر لە ژیانێک / شانۆنامە / ئەژین فەھمی / ١٢٦ ل.
٨٢_ژن / ڕۆمان / ڕێواس بانیخێڵانی / ٢٤٠ ل,
٨٣_ئابڕوو / ڕۆمان / جاز ڤیندەر / و _ شیلان دەرگەڵەیی / ٢٢٠ ل.
٨٤_ ڕۆچوون بە نێو ئەندێشەدا / ڕامانی ڕوحی / فاروق ھۆمەر / ٣٠٣ ل.
٨٥ _ چاوەکانی تابان / چیڕۆکی ڕۆژنامەنووسی / یاسین قادر بەرزنجی / ٨٢ ل.
٨٦_کۆچ و تاراوگە / کۆمەڵناسی/ حەمە نوری عومەر کاکی / ١٩٤ ل.
٨٧_پرۆسە سایکۆلۆژییەکان لە زمانی کوردیدا/ زمانەوانی / ئاڤێستا کەمال / ٤٠٠ ل.
٨٨_پیاوانی بەر خۆر/ ڕۆمان/ غەسان کەنەفانی/ عەبدولکەریم شاکر/ ١٠١ ل.
ھیرۆمۆنتیکای دەقە ویژدانییەکان/ توێژینەوە / د_زاھیر لەتیف/ ٢٢٢ ل.
٨٩_ژیانێکی ڕامبۆیانە/ شیعر / ئازاد ئەسوەد/ ٧٢ ل.
٩٠_شۆڕشەکەم دژی شێر پەنجە/ یادەوەری / ستیڤان شەمزینی/ ٢٦٥ ل.
٩١_ عشق و دەرکەوتەکانی / توێژینەوە / محمد تاتانی /٢٠٠ ل.
٩٢_نەفرەتی نەوبەھاران/ ڕۆمان / بە ختیار عەلی/ ٢٦٢ ل.
٩٣_دیاردەناسی شارو شوێن/ ئەنترۆپۆلۆژی/ ڕێبوار سیوەیلی / ٤٠٠ ل.
٩٤_ڕۆمان و خوێنەرە جیاوازەکانی / دیمانە/ شاخەوان سدیق/ ١٢٢ ل.
٩٥_زەماوەندی سیمرخ/ بیرەوەری / عالییە میرزا/ و _ ئاوات محمدامین / ١٦٠ ل.
٩٦_چیڕۆکەکانی ئەدیبێک/ دیمانە/ شاخەوان سدیق/ ١٥٣ ل.
٩٧_خەونەکانی مەتڕان/ ڕۆمان / زرار سەرتاش / ١٣٨ ل.
٩٨_ بازنەکانی شەقامی سوور/ ڕۆمان/ کارزان حیدر/ ٢٥٦ ل.
٩٩_برینا ڕەش/ شانۆنامە/ موسا عەنتەر / و _محمد عزەدین/ ١٤٣ ل.
١٠٠_زەردەخەنەی ئەبەدی/ ڕۆمان/پێر لاگەر ڤڤیست/ و _کەریم تاقانە/ ١٠٥ ل.
١٠١_داھێنان و پەنجەرەیەک بۆ ڕوانین / لێکۆڵینەوە/ نالە حەسەن/ ٢٤٠ ل,
١٠٢_ نامەیلێ بۆ شاعیرێکی گەنج/ ئەدەبی/ ڕینە ماریا/ و _دیلان قادر/ ٩٢ ل.
١٠٣_ ھایکۆ لە ژاپۆنەوە بۆ کوردستان / لێکۆلینەوە/ ملکۆ محمد/ ٢٢١ ل.
١٠٤_ پەیڤ و پەیام ئەدەبی / ڕەفیق سابیر / ٥٣٦ ل.
١٠٥_ئەریکۆلۆژیای ڕۆمانی کوردی / توێژینەوە/ حەمە مەنتک / ٩٠٨ ل.
١٠٦_چارەنووس/ ڕۆمان/ سەلام عومەر/ ١٧٨ ل.
١٠٧_پوختەی خاڵبەندی / زمانەوانی / دیاکۆ ھاشمی / ٩٠ ل.
١٠٨_ مارو پەیژە / نۆفلێت/ بەرھەم ئەنوەر/ ١٠٩ ل,
١٠٩_حەمە کەریم عارف پیاوێک / دیمانە / غازی حەسەن/ ٣٤٨ ل.
١١٠_پێنچ شارو دوو یادگە/ دیمانە/ ئیسکەندەر حەبەش/ و _دلاوەر قەرەداغی/٣٥٤ ل.
١١١_ بازرگانیکردن بە ژنان / کۆمەڵایەتی/ و _ شاکر شاکر نادر / ١٨٢ ل.
١١٢_کەلێنی نێوان نەوەکان / کۆمەڵناسی / شەمال لەتیف / ٣٣٤ ل.
١١٣_شەترەنج/ نۆڤلێت/ شتیفان تسڤایگ/ ڕەشید / ١٠٤ ل.
١١٤_لە دنیای گوڵاندا / ئەدەبی / ڕەفیق سابیر / ١٣٠ ل.
١١٥_وەک قەقنەس دەسووتێم / شانۆ ، گەزیزە / ٢٢٠ ل.
١١٦_حەنۆکە/ مێژوویی / ئیسماعیل تەنیا / ٥٠٠ ل.

بێگومان، بەشێکی زۆر لەو کتێبانە، خوێنەوە و ڕانانم بۆ کردوون، بە خوێنەرانم ناساندوون، ھەندێکیشیان لە بارەیانەوە نووسیومە، بەڵام وتارەکانم بڵاو نەکردۆتەوە. تا دێت زیاتر دەچمە نێو کتێبەکان و کتێبەکان دێنە نێو ناخم، ئارەزوو دەکەم دوورکەومەوە لە مرۆڤەکان، ھەر لەگەڵ کتێبدا بم ڕەنگە کەسانێک ئەمە بەگۆشەگیریی، دابڕان، نائومێدیوون و ئاڵوودەبوون و شکست لە ژیان لێکبدەنەوە، ئەوان ھەر چۆنی دەبینن، ئازادن، چونکە ئەوەی بەلای منەوە گرنگە ئەوەیە چی لە ناخمدایە دەریبببڕم و ڕاشکاو و ڕاستگۆ بم، لەگەڵ خۆم، دواتر لەگەڵ ھەمووان.

ڕواندز_ ٣٠/١٢/٢٠٢٤