پێناسه‌ی مرۆڤێکه له‌دوو وشه‌دا مامی گه‌وره . مام پشتیوان و ڕێنیشانه ، گه‌وره‌ییه‌که‌ی که‌سایه‌تیه سه‌رڕای پێداهه‌ڵدانی دۆسته‌کانی و ڕه‌خنه‌ی که‌موکوڕی نه‌یاره‌کانی هیچ لایه‌ک نکۆڵی ناکا ئه‌و ڕاستیه ده‌سه‌لمێنن مام جه‌لال به‌توانا و پێویستی یه ، تاوڵی ته‌بایی و چه‌قی یه‌کگرتنه‌وه‌ی ته‌وژمه جیاکانه ، باوه‌ڕده‌ری ئاشتی یه سه‌ری گه‌وره‌ی بۆگه‌ڕانه‌وه و چاره‌سازی گرفته گرێکۆره ئاڵۆزه‌کانه . سیاسیه‌کی تیۆری پشت مێز دواکه‌وی ده‌ربڕی پێنوس یا سه‌ربڵنگۆی میدیا نی یه به‌ڵکو سیاسیه‌کی گۆڕه‌پانی ململانێ ، خاراوی لێده‌سیاسی و هه‌ستانه‌وه‌کان ، داغکراوی بوێری ڕووبه‌ڕووی دوژمن هه‌روا لێزانی به‌رئاگردانی دانوستانه . که
سیاسه‌ت وه‌ک ئاو دۆخی شله هه‌رده‌م ڕوو له‌چاڵی به‌رژه‌وه‌ندیه‌کان ڕێ ده‌کا ڕووبار ئاسا له‌گرده ڕه‌قه‌کان لاده‌دا به‌ئاودڕێکدا باده‌داته‌وه به‌ره‌و زه‌ریا ده‌چێ ئه‌وا مام ڕێبه‌ره که‌شتیوانێکی له‌نگه‌رگری زه‌ریا قوڵه‌که‌ی سیاسه‌ته به‌سه‌ر و ژێری شه‌پۆله‌کان گوزه‌ری مه‌له‌وانی کردووه و ده‌کا . پیاوێکی مێژوویی مێژووکردی نێوان سه‌ده‌ی بیست و بیستویه‌که شه‌ست ساڵی ته‌مه‌نی چالاکوانی سیاسی خه‌باتی گه‌لی کورده له‌سه‌رده‌مێکی ناوازه‌ی پڕ گۆڕانکاری شه‌ڕه جیهانیه‌کان ، له‌ناوچه‌یه‌کی گه‌رم و پڕ کێشمه‌کێشمی سیاسی و سه‌ربازی ، پاوانخوازی داگیرکاری گه‌لانی سه‌رده‌سته‌ی عه‌ره‌ب ، فارس و تورکه . مافناسێکی سه‌رکه‌وتووه ده‌یتوانی زۆر ئاسوده بێلایه‌ن بژی به‌ڵام ئه‌و تێکۆشه‌ره خۆڕسک و خۆپێگه‌یه‌نه‌ره ، سیاسه‌تمه‌داری نیشتمانپه‌روه‌ر و جیهانگه‌رێکی کوردپێداوی ده‌گمه‌نه نه‌به‌که‌س ده‌چێ و نه‌که‌سیش لێ ی ده‌چێ ، نه‌جارێکی تریش ئه‌وکه‌سایه‌تیه دروست ده‌بێته‌وه ! کاریزمایه‌کی ورووژ و چاوکێشه به‌وره‌ی کاتی ته‌نگانه و لێبورده‌ی سه‌رکه‌وتنه‌کانه . پیاوی دبلۆماسی هه‌ڵکه‌وته‌ی بێن درێژی به‌رگه‌گری گه‌مه‌ی زار و مارانێ ، که‌وت و هه‌ڵسی زۆر بینیوه ، پێشبین و ئه‌ندازیاری دواڕۆژه سیاسیه‌کانه . پیاوی خه‌باته پێشمه‌رگه‌ی ئازایه سه‌رکرده‌ی نه‌به‌ز و هه‌رگیز ته‌سلیم نه‌بووه و نابێ ، ده‌سته‌مۆ نه‌بووه که‌ویش نابێ . نوسه‌ر و خوێنه‌رێکی به‌سه‌لیقه‌ی زانکۆیی زانیاری ده‌رهاوێشته‌ی خوێندنگای زانستیه ، چاوگێکی بنگه‌یی فه‌رهه‌نگی فێربوونه سیاسیه‌کانه . پیاوی داهاتووی کاریگه‌ره سه‌رباری نه‌خۆشی و به‌ساڵاچوویی تا ئێستا به‌پێوه له‌گۆڕه‌پانه هه‌تا له‌کۆچی دوایی مرۆڤانه‌یدا ده‌دره‌وشێته‌وه ئه‌م پیاوه هه‌ر ده‌ژی ، پێشڕه‌وی سه‌دان ڕامیار و شوێنکه‌تووی لاساکاری داهێنه‌ره . مام جه‌لال ئه‌ستێره ڕژانێکی ده‌گمه‌نی گه‌ردوونی مرۆڤایه‌تیه ئه‌گه‌ر ورد و گه‌ردبین زۆریش دووربین نه‌بی دڵنیا به‌بینینی تیشکه‌که‌ی ڕاناگه‌ی .
