حەیدەر عەبدولڕەحمان : كاتی خۆی لە حەفتاكاندا پەیوەندییەكی توندو تۆڵی نامە گۆڕینەوەم لەگەڵ مامۆستای گەورەی مەقامی كوردی عەلی مەردان دا هەبوو. لە یەكێ لەو نامانەدا كە ئێستاش لام پارێزراوە مامۆستا نووسیبووی:
كاكە حەیدەر لەو رۆژانەدا زۆر سەخڵەتیان كردووم، چەند گوێگرێك نامەیان بۆ بەرنامەكەی سەرچڵ شامل نووسیووە لە -تۆو ئێزگە-دا داوا دەكەن كە من ئیدی بۆ لەمەودوا دەست لە گۆرانی و مەقام گوتن هەڵگرم، ئەمە بۆ من مردنێكە، چونكە زەحمەتە بۆ بنیادەم زەقەی چاوانی بێت و بەچاوی خۆی ببینێ گۆڕی بۆ هەڵدەكەنن، دەست هەڵگرتنیش بۆ من لە گۆرانی و مەقام جۆرێكە لە مردن.
منیش ئەو كاتە كە دڵم سوێی دەبۆوە لەوەی كە دەبێ هەر هەموومان كۆتایی بەچاوی خۆمان ببینین و قەبوڵی قەدەر بكەین، بۆم نووسی: مامۆستای گەورەم راستە تۆ رۆژانێك بوو چیاو دۆڵی كوردستانت بە قەتارو ئەڵڵاوەیسی و دەهێنایە هەژان و بە ست فاتیمەیەك ئاگرت لەدڵی هەزاران ئاشقی ئەو وڵاتەدا بەردەدا، بەڵام چ ناكرێ لەگەڵ قەدەر، ئێستا تۆ بە تەمەن داچوویت و نابیتەوە عەلی مەردانی زەمانی ئیستواناتی چەخماخچی و گۆڕانی كەتان كەتانەو كراسەكەت چیتی مۆرە و شەرتە تا رۆژی حەشرمان بۆ بڵێی، بۆیە بمبوورە ئەگەر بڵێم تۆش دەبێ خۆت رادەستی قەدەر كەیت. بەڵام خۆ ئەوەندەت بەسە كە لەدوای خۆت هەگبەیەكی پڕ لە سەروەریت بەجێ هێشت، كە بەشی ئەوەت دەكات تا هەتایە لەمێژووی پڕ لە سەروەری ئەو نەتەوەیە ناوت وەك ئەستێرەیەكی هەمیشە گەشاوە لەئاسمانی هونەری كوردی دا بەدرەوشاوەیی بمێنێتەوە، پیرۆزت بێت دنیای ئەبەدییەت، ئەو دنیایەی كە هەزارانی وەك ئێمە مانان خەونی پێوە دەبینین و نایگەینێ، خۆشت دەزانی بۆ بنیادەم گرنگ نییە لەسەر دنیادا چەند رۆژو چەند مانگ و چەند ساڵ ژیان دەگوزەرێنی، بەڵكو گرنگتر لەوە ئەوەیە كە بنیادەم دوای مردنی چەند دەژیت.
