هونەرمەند- لوقمان غەریب: قەرار بوو ئەم پەیڤە لە ئاهەنگى چلەى ماتەمینى هاوڕێ و مامۆستاى کۆچکردووم هونەرمەندى گەورەو پڕ ئەزموون خوالیخوشبوو تەها خەلیل لە هۆڵى رۆشنبیرى بخوێنمەوە ، بەڵام بەداخەوە بەهۆى ئەوەى کە یادەکە لەلایەن دەزگایەکەوە بەمەبەست قۆرخ کرابوو . رێگەمان نەبوو ئەم هەستە راستگۆیەى خۆمان دەربڕین . بەهەرحاڵ دڵنیام کە رۆحى زیندوى مامۆستا تەها خەلیلیش ئەم حاڵە بێزەوەرى لا ناخۆش بوو ، وابە هەندێ دەسکارییەوە لەم هەفتەنامە هونەرییە پیرۆزەدا ئەیخەمە بەر دیدى خوینەران
مخابن مەردوم تا ئەو رۆژەى ئەمرێت دەیان خۆزگەو ئاوات و ئومێدى گەورەى هەیە ، بەڵام مەرگ مەودا نادات بە زۆربەیان بگات . ئاواتى هەرە گەورەى مامۆستا (تەها خەلیل) ئەوە بوو دوایین کاریى هونەریى خۆى، کە زنجیرە دراماى تەلەفزیۆنى ( ڕەیحان)ـە بەسەرکەوتویى تەواو بکات ، شوکور ئاواتەکەى هاتە دى ئەگەرچى مخابن خۆى بە بینینى شاد نەبوو.
ئەم پیاوە بەرادەیەکى ئەو تۆ دڵسۆزیى کارەکەى بوو کە وەسف ناکرێت، رۆژانە لەکاتى ئامادەکارییەکانى ئەم بەرهەمەدا پێش هەمووان لە ئۆفیس بوو، زۆر جار گلەیى ئەوەى ئەکرد کە بۆ پێى ناڵین لەئیشوکاریى دانانى دیکۆرو کارگێری دا یارمەتیمان بدات، ئەگەرچى هەمووان ئاگاداریى بارى تەندروستیى مامۆستا بووین. بەڵام بۆ جارێکیش خراپى تەندروستى خۆى نەکردە بیانوو تا ئەگەر خوانەخواستە کەموکورتییەک لە کارەکەیدا هەبووایە پێى پەردە پۆش بکات. بەپێچەوانە هەموو کاتێ وەک کەسێکى لەش ساخ و بەگوڕ ئەهەتە مەیدانى کارکردنەوە و تا دوا گرتەى بەرجەستە کردنى رۆڵى کوێخا فەرەج ئەوپەڕى تواناو لێهاتوویى نواند کە خوایاربێ لە کاتى پەخشبوونى (ڕەیحان) دەیبینن، ئێمە ستافى ئەم بەرهەمە کاتێ کە قۆناغى وێنەگرتنى رۆڵەکەى مامۆستا (تەها خەلیل) لە ئاوایى ئاڵى گۆران تەواو بوو سودفەى عارفە بچکۆلەى جەژنى قوربانى کرد بڕیارماندا لەسەر بودجەى کارەکەمان و بە بۆنەى جەژنەوە هەندێ جلوبەرگ و ئەرزاق بۆ قوتابیان و خەڵکى ئاواییکە ببەین، شەوەکەى تەلەفۆنم بۆ خوالێخۆشبوو کرد، پێم گووت مامۆستا قەرارى کارێکى لەو جۆرەم داوە، حەزم ئەکرد جەنابیشت ئامادە بوویتایە، بەڵام نامەوێ لەوەزیاتر ئەزییەت بکێشى چونکە لەکاتى تۆمارکردندا لەوێ زۆر هیلاک بووى، خۆشت ئەزانى رێگەکە چەند ناخۆشە، کەچی لەوەڵامدا گووتى ( ئەوە تۆ ئەڵێى چى و باسى چى ئەکەى بەخوا هیچ سیحەتم خراپ نییە و عەیبیشم نییە، لەگەڵتانا دێم و رەنگە یادەش بهێنم ، چى لەوە خۆشترە پاداشت و ئەجرى خەڵک لەکاتى خۆیدا بدەیتەوە، بەخوا ئەگەر پێت نەوتمایە گلەییەکى زۆرم لێئەکردى ) … ئەوە بوو بەیانییەکەى هات سەیرانێکى خۆشمان کردو کارەکەشمان ئەنجامدا و دڵى ئەو خەڵکەشمان بەو عارفەیە خۆش کرد، لەڕێگا کە گەڕاینەوە کاک (تەها) کاغەزێکى لەگیرفانى دەرهێنا گووتى ئەها لوقمان تەنها ئەو چەند حیوارەم ماوە کە تەنها دەنگە خۆ ئەوە کامێرامان پێیە بۆ بۆم تۆمار ناکەیت . منیش گووتم کاک (تەها) وازبێنە بەخوا ئەمڕۆ ئیسراحەتیین ئەیخەینە دواى جەژن پەلەمەکە، گووتى کەیفى خۆتە … ئیتر بەداخەوە نەمانتوانى ئەو دواهەمین بینراوە دەنگییەى کاک تەها تۆمار بکەین لە دووەمین رۆژى جەژندا ئەو هەواڵە ناخۆشەمان بیست . من لەئەزموونى دراماى (نامەکانى ئەشرەف)دا گەورەیى و تواناى ئەو هونەرمەندەم زیاتر بۆ دەرکەوت هەر ئەوەش بوو گەیایندمیە ئەو قەناعەتەى کە رۆڵى گەوەرە بۆ ئەو دەست نیشان بکەم، هەرچەندە هەندێ کەس ترسى ئەوەیان هەبوو کە خوالێشبوو بەهۆى نائارامى بارى تەندروستییەوە رەنگە نەتوانێ زۆر رۆڵ بگێڕێ، بەڵام بە پێچەوانەوە برادەرانیش شاهیدی حاڵن، کەچەند گورجوگۆڵ و ئامادە ئەهاتە بەردەم کامێرا .. لەکاتى تۆمارکردنى نامەکانى ئەشرەفدا چەند جارێک داخڵى نەخۆشخانەى بوژانەوەى دڵ کرا، بەڵام کە ئەچووم بۆ سەردانى سەیرم ئەکرد لەسەر قەرەوێڵەکەى خەریکى لەبەرکردنى دیالۆگەکانییەتى . بەپێکەنینەوە پێى ئەگوتم (مەترسە بەخوا تا رۆڵى عومەرەفەنى تەواو نەکەم تەسلیم نابم ) هەموو بەشداران شاهیدن کەکەس بەقەد ئەو حیوارەکانى لەبەر نەبوو تەنانەت حیوارە دەنگییەکانیشى لەبەر بوو کە هەندیکییان سێ تا چوار لاپەڕە دەبوو . لەهەموانیش زووتر و خێرا تر دەهات بۆ شوێنى کارکردن . مامۆستا (تەها خەلیل) زۆر سەرسام بوو بەو بابەتانەى کەمن ئیختیارم دەکرد بۆ بەرهەم هینان . هەموو جارێ پێى ئەوتم (بابەتەکانى تۆ زیندوون و گڕوتینێکى زۆرییان پێوە دیارە) . دەشیگوت (ئەم حەماسەى تۆم لە دواى ساڵانى هەشتاکانەوە لە هیچ کارێکى ترى هونەرییدا نەبینیوە . بۆیە حەزئەکەم کارى زیاتر پێکەوە بکەین … تەنها ئەم کارانە جێگە دەگرن و لە میژووى داهێنانا تۆمار دەبن، چونکە لەهەناسەو خەمى خەڵکەوە نزیکن ) .. کاک (تەها) رۆشنبیرێکى زۆر بیر فراوان و تێگەیشتوو بوو، لە دواى خوێندنەوەى تێکستى (ڕەیحان) هەڵسەنگاندنێکى زۆر بابەتیانەى کرد، زۆر سەرسامى خۆى لەناوەرۆکى دەقەکە پیشاندا. هەروەها زۆر خۆشحاڵیش بوو بەوەى کە تازەترین کارى هونەریى لەگەڵ زۆربەى هاوڕێ کۆنەکانییدا و ئەکتەرە خاوەن ئەزموون و ناوەدارەکاندا لە دەقێکى بە پێزى هونەرییدا ئەنجام دەدات، کە بووە دوواهەمین کاریشى بەداخەوە. هەموو جارێ دەیگووت (لە دواى نامەکانى ئەشرەف ئیتر بەشداریى هیچ کارێکى هونەریى ناکەم ئەگەر نەگەمە ئەو قەناعەتەى کە زۆر بە پێز تر ئەبێت لەو) کە بۆ (رەیحان)ـە لیم پرسى راى چۆنە گووتى (تازە نامەکانى ئەشرەفمان بەجێهێشت ئێستا لەناو داهێنانێکى تازەترداین، کە خەسڵەت و سیمایەکى تایبەتى خۆى هەیە) راستگۆیى و راشکاوى و خاکەڕایى هونەرمەندى گەورە (تەها خەلیل) ئەندازەیان بۆ نەبوو . بۆیە لەدواى خۆى جگە لەدەیان کارى ترى بەپێزى ساڵانى هەشتاکان دوو یادگاریى زۆر جوان و پیرۆزى بۆ میژووى هونەریى کوردى بەجێهێشت کە (نامەکانى ئەشرەف و رەیحان)ـەیە، ئەم دوو بەرهەمە لەپاش دابڕانێکى زۆر لەکاریى هونەریى جارێکى تر تواناو بەهرەو گەورەیى ئەو هونەرمەندەیان بەرجەستە کردەوە کە تارادەى عەشق وابەستەى هەردوو بەرهەمەکە بوو … بەڵام جارێکى تر بەداخەوە وەک چاوەڕوان ئەکرا داخ لە دڵان ئەوانەى بەناحەق خۆیان کردە ساحێبى ئاهەنگەکە بەزمانیانا نەهات وەک دواهەمیین دوو داهێنانى ئەو باسى ئەو دوو کارە بکەن . بەڵام ئەو دوو بەرهەمە بەتایبەت رەیحان دواهەمین دوو یادگاریى هونەرمەند تەها خەلیلە لە میژووى هونەریى کوردیى ،لە میژوو ئەرشیفى ئە و هونەرمەندەشدا بە دوا بەخششیى دەمێنێتەوە و لە ئایندەشدا مێژووى هونەریى کوردى بە دوو تەجروبەى درەوشاوە و دوو داهێنانى گەورە بەرجەستەیان دەکات . لەم یادەدا هەزاران سڵاو بۆ رۆحى بەرزە فڕى ئەو مەزنە هونەرمەندەو هەزاران چەپکە (ڕەیحانە) بۆ سەر مەزارى پیرۆزى.
