رێبین حەسەن : لەچوار چێوەی هەفتەی بەرەنگاربوونەوەی توندو تیژی دژ بە ئافرەتان مەکتەبی سکرتاریەتی یەکێتی ئافرەتانی کوردستان، کلیپێکی گۆڕانی بۆ هونەرمەند (هاوتا ئەسعەد و کەژێ هاوتا) نمایش کرد و، لە مەراسیمێکدا بە ئامادەبوونی ژمارەیەکی بەرچاو لەدەزگا راگەیاندنەکانی ناوخۆی و بیانی خەڵاتی رێزلێنان پێشکەشی (هاوتا و کەژێ)و ستافی بەشداربووی کلیپی گۆرانی چریسکتان کران.
لە مەراسیمێکی تایبەت بە هەفتەی بەرەنگاربوونەوەی توندو تیژی ئافرەتان، هەفتەی رابردوو مەراسیمێکی تایبەت لە مەکتەبی سکرتاریەتی یەکێتی ئافرەتانی کوردستان لە شاری هەولێر بەڕێوەچوو. د.ڤیان سلێمان سکرتێری یەکێتی ئافرەتانی کوردستان لە وتەیەکیدا بە هەفەنامەی “هونەر”ـی ڕایگەیاند”ئێمە وەکو یەکێتی ئافرەتان ساڵانە لەم کاتەدا چەندین چالاکی تایبەت بە ئافرەتان ئەنجام دەدەین، چالاکی ئەمڕۆشمان ویستمان لە ڕێگای پاڵپشتی کردنی بۆ دروست کردنی کلیپێک و خەڵاتکردنی چەند کەسایەتیەکی کە لەبواری باشتر کردنی ڕەوشی ئافرەتان کاریان کردووە، خەڵات بکەین، بۆ ئەوەی ببێتە پاڵپشت بۆ کردنی کاری باشتر، کلیپی ئەو گۆرانییە کارێکی ناوازەو شازە کە هونەرمەندی بە هەڵوێست کاکە (هاوتا ئەسعەد)و کچە جوانەکەی (کەژێ خان)، توانیان لەهەفتەی توندو تیژی دژ بە ئافرەتان کارێکی جوان بهێننە بوون، ئێمەش پاڵپشتی ئەو کارەمان کردوو، ئەرکی بەرهەم هێنانی کارەکەمان گرتە ئەستۆی خۆمان، سوپاسی ئەو هەڵوێستە جوامێرانەی (هاوتا ئەسعەد) دەکەین، کە بەو شێوەیە توانی ئەو کارە ئامادە بکات لەو کات و ساتەدا.
هونەرمەند هاوتا ئەسعەد کە بەهاوبەشی لەگەڵ کچەکەی خۆی بەناوی کەژێ گۆڕانیەکەیان ئامادە کردبوو، ڕاگەیاند” دەست خۆشی لەیەکێتی ئافرەتان و هەموو ئەو لایەنانە دەکەم کە پاڵپشتی ئێمەبوون بۆ ئەنجامدانی ئەم کارە، هیوادارم ئێمە توانیبێتمان خزمەتێکی بچووکمان پێشکەش بە ئافرەتانی کورد کردبێت لە ڕێگای ئەم کلیپەوە، من وەک (هاوتا) دەمەوێ هەمیشە دەنگی من و هونەرەکەم دەنگ و سەدای من بۆ هەموو چین و توێژێکی کۆمەڵگاکەم بێت، دیارە کاریگەری ژن کوژی لەوڵاتی ئێمەدا خەریکە بەرەو ئاستێکی خراپ دەچێت، بۆیە منیش بەدەنگ و هونەرەکەی خۆم ئەو پایامە دەگەینم و جوانی ئافرەت لەو کلیپەدا لەناوەرۆکی گۆرانییەکە نیشانی بینەران دەدەم”.
دواتر هەر لەمەراسیمەدا هونەرمەند (هاوتا ئەسعەد و کەژێ) و ستافی بەرهەمەکە کە پێکهاتبوون لە مامۆستا (شەفیق بەیاد) نووسەری شیعری گۆرانییەکە، (توانا خالە حەمرین و ئالان جەمال) وەک دابەشکردنی موزیک، رۆژنامەنووس (عەبدولغەفار عەبدوڵڵا) وەک بەڕێوەبەری بەرهەم لە رۆژنامەی هەولێر خەڵات کرا، نووسەری سینارست (عەبدولوەهاب شوانی) وەک نووسەری سیناریۆی کلیپەکە خەڵات کرا، هەریەک لە (بۆتان عەبدوڵڵا و سامان عەدنان و دلێر عومەر) وەک دەرهێنەر و وێنەگر و مۆنتێری کلیپەکە خەڵات کران، (ئیبراهیم رێکانی) خاوەنی کۆمپانیای هۆڵی کورد و هوتێلی بەرشلۆنە، لەشاری هەولێر ئەرکی سپۆنسەری و سەرپەرشتی بەرهەمەکەیان لەئەستۆ گرتبوو لە خەڵات کراوان بوون، ستۆدیۆی میلۆدی و ئەندایاری دەنگ (ئاکۆ عومەر) خەڵات رێلێنانی پێ بەخشرا، (پەنا عەبدولرەحمان، شوان محەمەد، سۆران محمەد) وەک ئەکتەرانی کلیپەکە خەڵات کران.
دوای تەواوبوونی نمایشەکە کەناڵەکانی راگەیاندن هەریەکەیان دانەیەک لەنووسخەی کلیپەکە پێشکەشی دەزگا راگەیاندنەکان کرا.
هەڵمەتى بەرنگاربونەوەى توندوتیژى دژ بە ژنان ساڵانە لە 25/11 لەلایەن حکومەتى هەرێمى کوردستان رێک دەخرێت بۆ ماوەی 16 رۆژ بەردەوام دەبێت ، بۆ ئەمسالیش چەندین چالاکى وەک کورتە فلیم و کۆڕوسمینار و بڵاوکردنەوەى پۆستەرات ، کە هەموویان ئاماژە بە نەهێشتنى توندوتیژى دژ بەژنان و هۆشیارکردنەوەى کۆمەڵگا لەو دیاردەیە دەکەن ، هەروەها بڕیارە لە رێگاى وەزارەتى ئەوقاف و وتارەکانى مامۆستیانى ئایینى هاوڵاتیان هۆشیاربکرێنەوە.
رێبین حەسەن
