مایکل دیلاهای گەورە راوێژکار لە کەناڵی جەزیرە دەڵێ: (القاعدە الوحیدە فی التفزیون هی ڕنه لا یوجد قواعد)، بەڵام ئەمە ئەوە ناگەیەنێ ئەوکەسانەی پرۆگرامی تەلەفزیۆنی بەرهەمدەهێنن، میزاجی شەخسی خۆیان بەکاربهێنن وئەوەی لەخەوخەیاڵ وکەناڵێکی بیانی وعەرەبیدا دەیبینن بیهێننە سەرشاشە. ئەوەی رۆژێک لەکەناڵێکی تەلەفزیۆنیدا کاریکردبێت و شارەزاییەکی کەمی لەبواری تەلەفزیۆندا هەبێت دەزانێت لە بەرهەمهێنان و دروستکردنی پرۆگرامێکی تەلەفزیۆنیدا چەندەها کەسی پسپۆڕو تایبەتمەند بەشدارە، بۆنمونە بەرهەمهێنانی ریکلامێکی 30 چرکەیی، چەندین کادری هونەری وراوێژکاری جۆراوجۆر کاری تێدا دەکات وسەرکەوتنیشی دەگەرێتەوە بۆ سەرجەم کاستی بەرهەمهێنانەکە، بەشێوەیەکی گشتی کارکردن لەتەلەفزیۆندا کاری گروپەو بەتاکەکەس ئەنجامنادرێت.
وەک پێشتر باسمکرد سەرجەم بەشداربوانی پرۆسەی بەرهەمهێنانی تەلەفزیۆنی کەسانی تایبەتمەندن و بۆ هەموکەس نیە ئەو ئەرکە لەئەستۆ بگرێت گەر شارەزا وتایبەتمەند نەبێت لە بوارێکدا. چونکە بنچینەی سەرکەوتنی هەر پرۆگرامێک پەیوەستە بەڕادەی سەرکەوتویی لەهەڵبژاردنی ئەو ژانر وهۆکارانەی بەباشترین شێوە ئامانجەکە بەدیدەهێنن. لەهەر پرۆگرامێکی تەلەفزیۆنیدا پرۆسەی کۆمیونیکەیشن ناردنی ئەو پەیامانەیە کەدەبێتە هۆی بەدیهێنانی ئامانجێک یاخود چەند ئامانجێکی دیاریکراو. ئەم بوارانەش پێویستیان بەشارەزایی تەواو هەیە و پێویستە پاش ئەوەی بڕیار لەدروستکردنی پرۆگرامێک دەدەرێت، کاستی بەشداربو کۆببنەوەو هەریەکە بەپێی کارو پسپۆڕی خۆی کار بۆ گەیاندی پەیامی پرۆگرامەکە بکات وبڕیار لەوە بدەن چی بکەن وچۆن ئەو پرۆگرامە بەرهەمبهێنن، لە سەرجەم پرۆگرامە تەلەفزیۆنیەکاندا بەبێ جیاوازی، دەبێت کاستی بەرهەمهێنان بەتایبەتی هونەریەکان لەژێر چاودێری وفەرمانی دەرهێنەرو لێپرسراوی بەرهەمهێناندا کار بۆ گەیاندنی پەیامی پرۆگرامەکە بکات بەبەکارهێنانی رەگەزەکانی بەرهەمهێنان بەشێوازێکی داهێنەرانەی گونجاو، هەموو ئەمانەش بۆ بەدیهێنانی ئامانجی پرۆگرامەکەیە بەباشترین شێوە، بۆ نمونە دەبێت جۆرو قەبارەی گرتە وجوڵەی کامێراو ریتمی مۆنتاژ ورەنگ وشێوازی دیکۆر وروناکی چڕوبڵاو ودەنگ وکارتێکەرەدەنگیەکان ومۆزیک ودیالۆگ و….هتد، لەخزمەت ئامانجی پرۆگرامەکەدابێت، جگەلەمانەش شێوازی پێشکەشکردن وجوڵەی دەست ودەم وچاو وئەداو ئیلقای بێژەر، بەهەمان شێوە لەگەڵ پرۆگرامەکە گونجاوبێت، نابێت ئەوەشمان لەیاد بچێت کە پەیوەندی نێوان ناووناوەڕۆکی هەرپرۆگرامێک گرنگیەکی تەواوی هەیە. لێرەشدا مەبەستم هەردوو پرۆگرامی (تاکسی دیالۆگ ولەگەڵ رەنج)ە، لە هەردوو پرۆگرامەکەدا زۆرێک لەوانەی ئاماژەمپێدا بەدینەدەکران. لەپرۆگرامی(لەگەڵ رەنج)دا تەوەری سەرەکی پرۆگرامەکە(وەرگێڕان)بوو، بەڵام ئەوەی دەبینرا پرۆگرامەکە لەناو کافیتریایەکدا تۆمارکرابوو، باکگراوندی بێژەر پیاڵەو پەرداخو خزمەتگوزار بوو، هەروەها شێوازی وێنەگرتن و قەبارەی گرتەکان کەموکوڕی زۆری تێدابوو، ئەمەش پەیوەندی بەهەڵەی دەرهێنەرو بەڕێوبەری وێنەگرتنەوە بوو لە هەڵبژاردنی ئەو لۆکەیشنەی پرۆگرامەکەی تێدا تۆمارکرابوو، هەروەها تەقەی قاپ وپیاڵەو ژاوەژاوی کافیتریا سەرنجی بینەری تێکدەدا،ئەرکێکی زۆر گرنگ وزەحمەتی تەلەفزیۆن، راکێشانی سەرنجی بینەرە بۆ ئەوەی لەسەیرکردنی پرۆگرامەکە بەردەوام بیتَ وکەناڵەکە نەگۆڕێت، ناکرێ بەپاساوی زۆری میوان وبەشدار بوانی پرۆگرامێک سەرجەم لایەن ورەگەزەکانی تری بەرهەمهێنانی پرۆگرامێک تێک بدرێت وپرۆگرامێکی جدی لە ستۆدیۆوە ببرێتە کافیتریا. ناشزانم پەیام وئامانج ومەبەست لە ناوی پرۆگرامی(تاکسی دیالۆگ)چیە ومەبەست لەدانیشتنی بێژەر وبەشداربووانی پرۆگرامەکە لەناو ئۆتۆمبێلێکی تاکسی لە ستۆدیۆیەکدا چیە؟ گەر مەبەست ئەو دیالۆگانەبێت کە رۆژانە لەناو تاکسیدا لەم وڵاتەدا دەکرێت، ئەوا بەد حاڵیبونێکی گەورەیە، چونکە گفتوگۆو دیالۆگی رۆژانەی ناو تاکسی بەبێ ئامادەسازییەو لە نێوان خەڵکانێکدا دەکرێت کە تاکسییەک کۆیاندەکاتەوە، نەک ئەو تاکسیەی لەستۆدیۆیەکدا دکتۆر ودادوەر وبێژەرێک کۆدەکاتەوەوگفتوگۆ لەمەڕ بابەتێک ساز دەدەن. بەهەمان شێوەی پێشو هیچ پەیوەندییەک نیە لە نێوان رەگەزەکانی بەرهەمهێناندا ودیکۆرو ناوەرۆک هەریەکە لەئاوازێک دەخوێنێت.
دواجار دەمەوێت ئاماژە بەوە بدەم، ئامادەکردنی پرۆگرامی تەلەفزیۆنی دەبێت واقیعی بێت ولەناو ئەو کۆمەڵگەیەوە هەڵقوڵابێت کە پرۆگرامەکەی تێدا ئامادەکراوە، پێویستە سەرجەم کەناڵەکان ئەوە بزانن کە بۆکێ وبەچ مەبەستێک بەرهەمهێنانی تەلەفزیۆنی دەدەن وکێن ئەوانەی بەدیار ئەو پرۆگرامەوە دادەنیشن، دیارە ئەمەش بەرلە دروستکردنی پرۆگرامەکە دەکرێت. بەوهیوایەی کەناڵی کوردسات وئەو کارمەندانەی کار لەبەرهەمهێنان ودروستکردنی پرۆگرامەکانیدا دەکەن، چاوێک بەبەرهەم وپرۆگرامەکانیاندا بخشێننەوە و وەک پرۆگرامەکانی پێشتریان پرۆگرامی دەهێنەرانە دروستبکەن.
