له‌ساڵیادی ڕاپه‌ڕینا

به‌ندی عه‌لی .. 2012

ئه‌و ڕۆژه‌ هه‌موو له‌وێ بووین

هه‌ندێ ، هه‌ر له‌وێ به‌جێمان و

له‌گه‌ڵمانا نه‌گه‌ڕانه‌وه‌ به‌ره‌و ماڵ

له‌و ڕؤژه‌وه‌ ئیتر نه‌مان بینینه‌وه‌

ئه‌گێڕنه‌وه‌ ، ئه‌ڵێن ئه‌وان

له‌گه‌ڵ هه‌ندێ ئه‌ستێره‌یا

ده‌ستیان تێکه‌ڵ کردو کشان

هه‌ندێکی تر ، ئه‌وانه‌ی دوا ساته‌کانی

خه‌نه‌به‌ندانی خوێن هاتن

باوه‌جو بۆ چاوو نه‌فه‌س

له‌پی ده‌ستیان گرته‌ خه‌نه‌و

له‌گشت زه‌ماوه‌نده‌کا

چۆپی کێشان نایه‌ن به‌که‌س

ئه‌و ڕۆژه‌ هه‌موو له‌وێ بووین

وه‌لێ ئیتر له‌و ڕۆژه‌وه‌

بووین به‌دوو کاروانی سه‌فه‌ر

… کاروانێکیان ، هه‌میشه‌ ڕوو

له‌به‌رسیله ترشه‌کانی نائومێدی و

سێوه‌ کرمۆڵه‌کانی ئه‌سه‌ف

ئه‌ی تریان ، هه‌میشه‌ ڕوو

له‌ده‌روازه‌ په‌لکه‌زێڕینیه‌که‌ی به‌هه‌شت

ئه‌و به‌هه‌شته‌ی

پڕه‌ له‌هه‌نجیری به‌خت و

هه‌ناره‌ مێخۆشه‌کانی ڕیاکاری

زۆرینه‌مان .. له‌کاروانی یه‌که‌ما بووین

ته‌نیا هه‌ر ئه‌وانه‌ نه‌بێ

پاش خه‌نه‌به‌ندانی خوێن هاتن