گقتوگۆی: هاوكار نامۆ – دەنگ پرێس
دەنگ:گۆرانی وتن لای چنار چییە؟
چنار:گۆانی وتن لای من هەستێكی نادیاری پاكە كە ڕەنگدانەوەی ناخە، زۆر جار مرۆڤ ناتوانێت باس لە هەستی خۆی بكات بەڵام كاتێك وشەی جوان و ناسك تێكەڵ بە هەستەكانی دەبێت ئەو كات دەربڕین ئاسانترە، بە بۆچونی من هەر مرۆڤەو ڕێگەیەكی خۆی هەیە بۆ دۆزینەوەی وكەسایەتی خۆی، زۆر جار مرۆڤ لە ڕێگەی هاوڕێ ی چاكەوە خۆی دەدۆزێتەوە، هاوڕێیەك كە ماندووت دەكات بەڵام لەهەمان كاتدا خۆشیشت ئەداتێ.
دەنگ:دوابەدوای ئەلبومی (دڵی من)، جەماوەری چنار چاوەڕوانی بەرهەمی نوێ بن؟
چنار:من بەڵێن بە گوێگرانم دەدەم بەردەوام لە هەوڵی نوێ و جواندا بم و هەرگیز لە هونەری كوردی دانەبڕێم.
دەنگ:شارەزاییت لە فولكلۆردا هەیە؟
چنار:هونەری فۆلكلۆر هێندە دەریایەكی گەورە و فراوانە، ئەتوانم بڵێم من تەنها دڵۆپێكم لەو دەریایە، خۆبەهێزكردنم لە هونەری فۆلكلۆری كوردی یەكێكە لە ئامانجەكانم.
دەنگ:جگە لە بواری هونەر لە بوارەكانی تری ژیان بە چییەوە سەرقاڵیت؟
چنار:من كاتەكانی ژیانم بۆ چەند شتێك دابەش كردووە، خۆشحاڵدەبووم ئەگەر هەموو ژیانی خۆم بۆ هونەر و گوێگرانم تەرخانبكردایە، بەڵام ژیانی كۆمەڵایەتیش گرنگەو زۆر بواری تریش هەیە ناكرێ فەرامۆشبكرێ، من ئێستا لە پاڵ هونەرەكەمدا لە زانكۆ لە بەشی كۆمەڵناسی دەخوێنم لە ساڵی یەكەمم لە وڵاتی سوید، ئامانجیشم ئەوەیە كە وەكو توێژەرێكی كۆمەڵایەتی كاربكەم لە داهاتوودا تا بتوانم خزمەت بە كۆمەڵگای كوردی بگەیەنم بە شێوازێكی زانستی، پێموایە كۆمەڵگای كوردی پێویستی بە كەسانێكی زۆرە كە پسپۆڕ بن لەو بوارە، ئێمە هەر نابێ هەوڵی پزیشكی و ئەندازیاری بدەین بەڵكو زۆر بواری گرنگی تر هەن كە دەبێت بە شێوەیەكی پراكتیكی كاری تیادا بكەین.
دەنگ:بۆچی سەربەست دیار نەما؟ یان بڵێین دوركەوتۆتەوە لە گۆرانیبێژی….؟
چنار:ئەوە تەنها خۆی دەتوانێت وەڵامتان بداتەوە، بەڵام دەنگی سەربەست یەكێكە لەو دەنگانەی كە خۆم زۆر پێی سەرسامم، لەبەرئەوەش نا كە برای خۆمە، هیوادارم رۆژێ بە ڕەنگە جوانەی كە من هەستی پێدەكەم بگاتە گوێ ی گوێگرانی هونەری كوردی، پێموایە ئەویش پێویستی بە هاندانی گوێگران هەیە تاوەكو كار لەسەر دەنگی بكات.
دەنگ:بۆ (منداڵ و دایك) گۆرانیت هەیە، ئەی دەربارەی (رۆژی لە دایكبوون و یادی رۆژی هاوسەرێتی و رۆژی عاشقان….)؟
چنار:وەكو دەزانیت دونیای هونەر زۆر فراوانە و بەشی زۆرە، منیش بەو ماوە كەمە نەمتوانیوە كار لەسەر هەموو شێوازەكان بكەم..
دەنگ:بیرت لەوە نەكردۆتەوە گۆرانییەكی ئایینی بڵێیت؟
چنار:لە ڕاستیدا زۆر دەمێك بوو بیرۆكەی وتنی گۆرانی ئایینیم هەبوو، زۆر بە دڵیش حەز دەكەم كاری بۆ بكەم، بەڵام لە ئێستادا زۆر گۆرانی بێژ ئەو كارەیان كردووە لەم دواییەدا، منیش حەز دەكەم كارێك بكەم كە نەكرابێت.
دەنگ:میلۆدی (دڵی من) زۆر جوانە..بیرت لەوە نەكردۆتەوە كە لە ئەلبومی داهاتوودا زۆرینەی میلۆدییەكان هەر جەنابتان دروستی بكەن؟
چنار:بە بۆچونی من هەر تێكستەو بە سەنگی خۆی ئاوازێك دەخوازێت، منیش وەك چنار بە جۆرێكی تایبەت هەستم بە سەنگی ئەوتێكستە كرد، بۆیە میلۆدیە جوانەكەشم بۆ هات، هەرچەندە منیش چەند ئاوازێكی تریش هی خۆمنلە ئەلبوومی(دڵی من). ئەوانە دواین ئاوازی من نابن، سوپاس بۆ كاك حەمە شوان شەریف یۆ ئەو تێكستە جوانەی گۆرانی دڵی من.
دەنگ:هیچ ئامێرێكی موزیك دەژەنیت؟
چنار:ماوەیەكە خەریكە ئامێری (سێتار)، وە بەڵێنیشم بە خۆم داوە كە بەردەوام بم لەسەری.
دەنگ:هیچ گرێبەستێكت لەگەڵ هیچ كەناڵێكدا هەیە بۆ كارە هونەریەكانت؟
چنار:تا ئێستا نەخێر وە بە هیچ لایەنێكیانەوە نەبەستراومەتەوە، سوپاسی هەموو ئەو كەناڵانە دەكەم كە بەرهەمەكانی من پەخش دەكەن.
دەنگ:سەردەمی منداڵیت چۆن بووە؟ ئەو بیرەوەریانەی لە كوردستان جێتهێشتوون بیریان ناكەیت؟
چنار:سەردەمی مناڵیم خۆش و ناخۆشیش بووە، وەكو هەموو منداڵێكی تر تەنها بیرم لای یاری كردن و هاوڕێ كانم بووە، منداڵێكی بزێو بووم، هەروەها گوێ ڕایەڵیش بوم، هەرگیز بیرم نایەت كە دایكم لێ ی دابم بەڵام باوكم تود بووە لەگەڵمان كە مناڵ بوین، چوار خوشك و سێ برا بووینهەروەها كوڕ و كچێكی مامیشم لەگەڵ ئێمە گەورە بوون، چونكە ئەوان زۆر منداڵ بوون كە باوكیان لە دەست دا. ئیتر لە كاتەوە بون بە بەشێك لە خێزانەكەمان و هیچ جیاوازیەكیان نەبوو لەگەڵ ئێمە، وەئەو جۆرە پەروەردە كردنە كایگەری للەسەرم هەیە هەتاوەكو ئێستاش بێگومان بە شێوەیەكی باش.
دەنگ:پێت چۆنە گۆرانی بێژ خۆی تێكست بنوسێ؟ ئەو كات زیاتر (زاتی) دەبێت.
چنار:هونەرمەندان وەك یەك بیر ناكەنەوە، من وەكو بۆچونی خۆم ئەگەر كات و توانا هەبووخۆی بتوانێ هەست و سۆزی خۆی دەرببڕێت باشترە لای من، بەڵام ئەمەش ئەوە ناگەیەنێت تۆ سود لە توانای شاعیرانی تر وەرنەگریت.
دەنگ:كارەكانت لە ئەوروپا تا چەند قورسن؟؟ هەمووی لەسەر شانی خۆت دەبێت؟
چنار:ژیان لە ئەوروپا بە شێوەیەكی گشتی زۆر زەحمەتە، هەچەندە من نامەوێت بچمەناو قوڵایی ئەو بابەتە، بەڵام دەبێت ئەوە بزانین كە كات و توانای ئابوری زۆر گرنگە وە زۆر جار ڕێگر دەبێت بۆ سنوردار كردنی هونەری گۆرانی، بەداخەوە هەتا ئێستاش هەر لەسەر شانی خۆمانە ئەو قورسایی یە، دەتوانم بڵێم كە ڕۆڵێكی نێگەتیڤی هەبووە، چونكە ئەگەر ئەو قورساییانە نەبوبیە كاری زۆر باشترم هەبوو.
دەنگ:قەد بووە رۆژێ ئەمەندە ماندو و بێزار بیت، بڵێیت من ئیتر ئەواو واز لە گۆرانی بێژی ئەهێنم؟
چنار:ئێمە وەك مرۆڤ سەرچاوەی هەست و سۆزین، بێگومان ئەو دوو حاڵەش كاریگەری خۆی هەیە لەسەر رۆژگاری ئێمە، بۆیە جێگەی سەرسورمان نی یە ئەگەر مرۆڤ بگاتە ئەوەی كە لە كاتە هەستیارەكاندا بریاری لە ناوبردنی هەستەكانی خۆی بكات، ئیتر بە گریان و فرمێسك ڕشتن بێت یان بە پەشیمانی دەربڕین، بەڵام ئەوەش ئەو ناگەیەنێت كە ئیتر تابلۆی ژیانی خۆت بشێوێنیت، بەڵام یەزدان توانایەك و عەقڵێكی وای بەخشیوە بە مرۆڤ كە دەتوانێت دوای هەموو شكست هێنانێك و تەنگانەیەك خۆی نوێ بكاتەوە و زاڵ بێت بەسەر ئەو هەستە كاتیانەیدا.
دەنگ:یەكەم كەس كێ هاوكاری كردویت لە بواری هونەردا؟ و ئەو كەسانەی بەردەوام هاوكارتن كێن؟
چنار:ئێمە وەكو خێزان، هونەر دۆستین، بۆیە دەتوانم بڵێم كەیەكەم هاندەری من هەست و سۆزی خۆم بوو پاشان ئەندامانی خێزانەكەم و دەوروبەر.
دەنگ:بۆچی خەڵك وا دەزانن كە هونەرمەند (كەمال محمد) لە پشتی هەموو كارەكانتەوەیە؟
چنار:من خۆشەویستی یەكی زۆرم هەیە بۆ هونەركەند كاك (كەمال محمد) كە وەك خزمێك و وەكو هونەرمەندێك لە سەرەتادا زۆر دەستی گرتم، بەڵام ئەگەر خۆشم توانا و هەستی گۆرانی وتن و خۆ بەهێز كردنم نەبوایە هەر زوو لەناو دەچووم.
دەنگ:لە هیچ قوتابخانەیەكی هونەری دەخوێنیت لە ئەورپا؟
چنار:بەڵێ لە قوتابخانەی هونەری خوێندوومە لە سوید، ماوەیەكی زۆر سەرقاڵ بووم.
دەنگ:گرنگی بە جل و بەرگ دەدەیت؟ ئەم سیفاتە هاندەرە بۆ سەركەوتنی هونەرمەند ؟
چنار:بێگومان وەك و هەموو مرۆڤێكی تر گونجاندنی جل و بەرگ لام گرنگە و تا رادەیەكیش گرنگی بە مۆدێل ئەدەم. بەڵام من زیاتر حەز بە سادەیی دەكەم, من هونەرەكەم و دەنگم لا گرگترە نەك جل و بەرگ و خۆ دەرخستن. دەمەوێ لە ڕێگای دەنگمەوە خۆشی بە خەڵك ببەخشم، ئیتر ئەوە تاكە ڕێگەی منە بۆ خزمەتی هونەرەكەم.
دەنگ:جوانی ڕكەش بە هەمان شێوە كاریگەری نی یە لە ناوبانگی هونەری؟
چنار:جوانی روكەش لەپاڵ دەنگێكی خۆش و ئاوازێكی جوان و تێكستێكی ناسك بێگومان هونەرمەندەكە سەركەوتو دەكات، بەڵام جوانی روكەش بە بێ دەنگ خۆشی لە میوەیەكی جوانی بێتام دەچێت.
دەنگ:چی بە هونەرمەندانە دەڵێیت كەلە خۆیان گۆڕاون و بە شێوەیەكی نامۆ هەڵسوكەوت دەكەن؟
چنار:لە ڕاستیدا من ناتوانم لە جیاتی ئەوان وەڵام بدەمەوە، من وەكو كچە گۆرانی بێژێكی كورد شانازی بەوەوە دەكەم كە مرۆڤێكی ساددەم و لەخۆ بایی نیم، من هەروەك خۆم دەبم چ لەكوردستان و چ لە دەرەوەلەبەر ئەوەی من هەمیشە بەو شێوەیە بووم.ئەو كەسانەش كە لەخۆباین ..لاوازن لە ڕوی ڕوتی كۆمەڵایەتی یەوە.
دەنگ:ئەی دەربارەی ژیانی هاوسەری..چۆن ئەو پرۆسەیە دەبینی؟
چنار:ناتوانم وەڵامی پرسیارەكەت بدەمەوە كە لە ڕاستیدا لە ناوی ناژیم.
دەنگ:تا ئێستا لە بواری هونەریدا فێلیان لێ نەكردویت؟
چنار:بەداخەوە هەندێ لە كۆمپانیا هەرە بەناو بانگەكانی كوردستان بەڵێن بە هونەرمەندان ئەدەن و پا پەندی پەیمانەكانیان نین، مافی هونەرمەندەكان پێشێل دەكەن، لە لایەكی ترەوە باسی مافی هونەرمەنادندەكەن و ریكلام دژی كۆپی كردنی CD دەكەن لە پێناو بەرژەوەندی خۆیان مافی هونەرمەندان قوت ئەدەن. من نامەوێ ناوی ئەو كۆمپانیایە بڵێم و بیشكینم، بەڵام ئەگەر پێویست بكات لە داهاتوودا دەیڵێم
