قەیفەی سورمەداری خەم
خەریکی دوورینەوەی
خەمە سەرە پارچەکانی تەمەنی خۆمم
خەریکی قایم کردنەوەی
فرمێسکە قۆپچەی کراسی گریانی
شەوانی منداڵیم
شاش و شەش تەقەڵ
کفنی نائومێدی هەڵ ئەپێچم
وەک هەموو خەیاتەکانی شار
بەدیار مەکینەی خەیاڵەوە دا ئەنیشم
کەچی تیرۆژوی کراسی
کچێکی دڵ شکاوم بۆ ناچنرێ
زۆر ستەمە
دەزووی تەمەنم بپچڕێت
هێشتا زەنگیانەی لەچکی
ژنێکی بێوەژنم دانەدووریبێ
یان دەرزی خەیاڵم بشکێت
کەچی متیلی لێفە گوڵ کونی
مناڵە هەژارەکانی شارم
پینەی سەرما نەکردبێ
مەکۆی هەستم پڕبوو لە کڵافەی نائومێدی
بەڵام
دوکانە بچکۆلەکەی سەرم
کراس و کەوای ئەم زەمەنە
عەمبارە پۆیەی لێ نەبڕا !
چاوی یادگاریم کز بوو
دەستم لەتەقەڵ پێچی
دەسترازە و قوماتی
گوڵە ساواکانی گریان بۆ هەڵنەگیرا
ئەم کراسی خەفەتە زۆر درێژە
نەخەیاتێک نەدوان نەهەزار
قۆڵی هەنسکیان بۆ نادوورێ
پراوەی بێکەسیان بۆ ناکرێ
بیشی دوورن تەواویش بێت
بۆ بەری ئاسمان گەورەیە
لەبەری ڕوباردا ئێخە داچەقاو ئەوەستێ
گەر دنیاش لەبەری کات چرچو لۆچە و
لەبەری چیاکانیشدا قۆڵی کورتە
کراسی خەفەت
قەیفەی سورمەداری خەمە
من خۆم نەبم
کەس نازانێ جوان بیبڕێ
کراسی خەفەتی خۆمە
خۆم ئەزانم چۆن بیدوورم
تەماشاکەن
چەند جوان لەبەرما وەستاوە
کتومت بۆ خۆم دووراوە ……
ڕێباز عوسمان عزیز
ستۆکهۆڵم
2012-02-16
diwaninali@hotmail.com
قەیفەی سورمەداری خەم
