مەنسوور جیهانی ـ یه‌که‌مین خولی فێستیڤاڵی فیلمی سه‌رئاوه‌ڵای “ئاسمان” به تایبه‌تمه‌ندییه‌کانی هونه‌ری و گه‌شتیاری لە لایەن ئەنستیتۆی فیلمسازی “لاوان فیلمی موکریان” بە بەرپرسیاری “ئیبڕاهیم سەعیدی” سینەماکاری ناودار و بەرئەزموونی کورد، لە شاری مەهاباد به‌ڕێوه‌ده‌چێت.
ئەنستیتۆی فیلمسازی “لاوان فیلمی موکریان” بە هاوکاری و پشتیوانی شاره‌وانی و کۆمیسیۆنی که‌لتووری شۆڕای شاری مەهاباد، ئیدارەی گشتیی فەرهەنگ و ئیرشادی ئیسلامی پارێزگای ئازەربایجانی ڕۆژئاوا و هه‌روه‌ها ئیدارەی گشتیی فەرهەنگ و ئیرشادی ئیسلامی مەهاباد؛ یه‌که‌مین خولی فێستیڤاڵی کورته‌فیلم، سیناریۆ و فۆتۆگڕافی سه‌رئاوه‌ڵای “ئاسمان” له سه‌ر ته‌وه‌ره‌‌کانی هونه‌ری و گه‌شتیاری لە شاری مەهاباد له ڕۆژهه‌ڵاتی کوردستان به‌ڕێوه‌ده‌بات.
ئه‌م فێستیڤاڵه، له سه‌ر بنه‌مای بردنه‌سه‌رێی ئاستی هونه‌ری سینه‌ما و ڕۆشنبیری و که‌لتووری ناوچه‌که، ڕاکێشانی هۆگرانی گه‌شتیاریی لە شاری مەهاباد و ناوچه‌که؛ له سه‌ره‌تای مانگی سێپته‌مبه‌ری هه‌موو ساڵێک بۆ ماوه‌ی ٤ ڕۆژ له گۆڕه‌پانی سه‌ره‌کی شاری جوان و گه‌شتیاری مەهاباد به‌ڕێوه‌ده‌چێت.
له فێستیڤاڵی فیلمی “ئاسمان”، به‌رهه‌مه سه‌ره‌کی و لاوه‌کییه‌کان؛ هه‌موو شه‌وێک له شوێنی سه‌رئاوه‌ڵای گۆڕه‌پان و ناوچه‌ی سه‌ره‌کی شاری واته “گۆڕه‌پانی مه‌نگوڕان” له ٢ سانسی پیشان ده‌درێن و به درێژایی ڕۆژیش، کۆر و کۆبوونه‌وه‌ی پسپۆڕانه و ڤۆرکشۆپی فێرکاریی به ئاماده‌بوونی مامۆستایان و کارناسانی به‌رچاو و شاره‌زای سینه‌ما و فۆتۆگڕافی به‌ڕێوه‌ده‌چێت.
میوانانی ئاماده‌بوو له فێستیڤاڵ و ئه‌و گه‌شتیارانه‌ی که له کاتی به‌ڕێوه‌چوونی ئه‌م ڕووداوه سینه‌ماییه سه‌ردانی شاری مەهاباد و ناوچه‌ی موکریان ده‌که‌ن؛ به شێوه‌ی هاوکاتیش، له‌گه‌ڵ تایبه‌تمه‌ندی و توانا فه‌رهه‌نگی و هونه‌رییه‌کانی ئه‌م ناوچه ڕه‌سه‌ن و جوانه ئاشنا ده‌بن. هه‌ر به‌م بۆنه‌یه‌وه، به‌رنامه لاوه‌کییه‌کان بۆ ناساندنی که‌لتوور و ڕۆشنبیری مه‌هاباد و ناوچه‌که داڕێژڕاوه و پلانی بۆ داندراوه و به درێژایی ڕۆژ، له ناوچه جۆراوجۆره‌کانی شاری ماهاباد پێشکه‌ش ده‌کرێن.
دامه‌زراندنی ئه‌م فێستیڤاڵه، دوای ٤ ساڵ کاری کارناسی له لایه‌ن پسپۆڕانی ئەنستیتۆی فیلمسازی “لاوان فیلمی موکریان” ئاماده کراوه؛ که به هاوکاری و پشتیوانی ئه‌ندازیار “بابه‌ک ڕۆسته‌م پوور”
شاره‌وانی شاری مەهاباد و هه‌روه‌ها دکتۆر “ئاڕش شه‌هابی” سه‌رۆکی شۆڕای ئه‌م شاره، به دروشمی بردنه‌سه‌رێی ئاستی که‌لتووری شارۆمه‌ندی و له پێناو خوڵقاندنی که‌شووهه‌وای گونجاوی په‌یوه‌ندی نێوان خه‌ڵکی و گه‌شتیاران به‌ڕێوه‌ده‌چێت.
لۆگۆی یه‌که‌مین خولی فێستیڤاڵی فیلمی سه‌رئاوه‌ڵای “ئاسمان”، له لایه‌ن “مه‌نسوور محه‌مه‌دی” گڕافیست و فۆتۆگڕافه‌ری ناوداری مه‌هابادی دیزاینی بۆ کراوه؛ هێمای فێستیڤاڵ، له نیشانه‌ی مێژوویی “فه‌قره‌قا” Fakhrigah و تێکه‌ڵاوێک له فیلم و وه‌رچه‌رخانی ڕه‌وان له به‌ستێنی شینایی ئاسمان، دیسانه‌وه پێناسه‌یه‌کی ساکار و مۆدێڕنه له شوناسی که‌لتووری و مێژوویی مه‌هاباده که تیایدا هونه‌ر پێگه‌یه‌کی تایبه‌تی هه‌یه. مێژووی شوێنه‌واری به‌ردینه‌ی “فه‌قره‌قا” بۆ سه‌رده‌می ماده‌کان ده‌گه‌ڕێته‌وه که له ته‌نیشت گوندی “ئیندرقاش” له نزیک شاری مه‌هاباد هه‌ڵکه‌وتووه.
ئەنستیتۆی فیلمسازی “لاوان فیلمی موکریان”، ساڵی ڕابردوو؛ یەکەمین خولی فێستیڤاڵی سیناریۆنووسی “لاو” لە پێناو ناساندن و بردنەسەرێی ئاستی سیناریۆنووسی ناوچەکە، به سه‌رکه‌وتوویی و له ئاستێکی گونجاودا بەڕێوەبرد که هه‌واڵ و ڕاپۆرته‌کانی ئه‌م ڕووداوه گرینگه سینه‌ماییه له ده‌زگاکانی ڕاگه‌یاندنی سه‌رتاسه‌ری ئێران و هه‌روه‌ها هه‌رێمی کوردستان، پێشوازییه‌کی بێوێنه‌ی لێکرا و ڕه‌نگدانه‌وه‌ی به‌ربڵاویی به‌دواوه بوو.
بەڕێوەبەرایەتی ڕاگەیاندنی گشتی فێستیڤاڵی فیلمی “ئاسمان”.
Discussion about this post