واشنتۆن، مەسعودى مەلا هەمزە : لەمیانى چالاکییەکانى حەوتەمین فێستیڤاڵی بەدرخان لە واشنتۆن فیلمى سینەمایی “هەرمان” لە دەرهێنانى حوسێن حەسەن لە رۆژی یەکەمى حەوتەمین فێستیڤاڵی بەدرخان و بە ئامادەبوونى بینەرێکى زۆری کورد و ئەمریکى نمایشکرا.
حەوتەمین فێستیڤاڵی بەدرخان لە واشنتۆن کە لەژێر ناوى لە کوردستانەوە بۆ واشنتۆن بە مەبەستى دروستکردنى پردی رووناکبیری لەنێوان گەلى کورد و ئەمریکییەکان دەزگاى چاپ و بڵاوکردنەوەى بەدرخان بەهاوکارى بەشی کلتوورى و هونەرى نوێنەرایەتى حکومەتى هەرێمى کوردستان لە واشنتۆن سازیکردووە، لە رۆژانى 29و30/6/2010 لە هۆڵی ماڵی سویدى بەڕێوەچوو.فیلمى سینەمایی هەرمان کە بەرهەمى وەزارەتى رۆشنبیری و لاوانى حکومەتى هەرێمى کوردستانەو هونەرمەند حوسێن حەسەن کارى دەرهێنانى بۆ کردووە، هەریەک لە “گوڵبەهار کاڤچۆ و هەرمان محەمەد” وەکو ئەکتەر رۆڵی سەرەکى دەبینن، فیلمەکەش لەرێگاى چیرۆکى خۆشەویستى دوو عاشقی کوردەوە باس لە ئێش و ئازارەکانى کورد و کلتوورى کوردى دەکا،.
شایانى باسە فیلمى سینەمایی هەرمان بەشدارى لە چەندین فێستیڤاڵی دیارى جیهانى کردووە، دواترینیان فێستیڤاڵی سانتاباڕباڕا بوو لە ئەمریکا.
فیلمى هەرمان لە واشنتۆن نمایش کرا
