عیشق و ژیان و مردن

به‌ندی عه‌لی .. پاییزی 201

باسی مردن

زۆر به‌ده‌گمه‌ن

ئه‌بێته‌ میوانی خه‌یاڵ

به‌ڵام که‌دێ

سه‌عاته‌ جرپنه‌که‌ی زه‌مه‌ن

له‌سه‌ر خاڵی سفری عه‌ده‌م

ڕائه‌وه‌ستێ و

ده‌روێشه‌ شه‌یداکه‌ی دڵیش

ده‌ف ناژه‌نێ

گوڵیش ڕه‌نگی له‌به‌ر ئه‌بڕێ و

په‌پووله‌ به‌بۆن ئه‌که‌وێ

چۆله‌که‌کانی سه‌ر دره‌ختی زینده‌گیش

هه‌ڵئه‌کوڕمێن و لاڵ ئه‌بن

له‌وساته‌یا

لێوم ئه‌بێ به‌بیابان

ئه‌و به‌قومێ شه‌رابی تاڵ

له‌وساته‌یا

من ئه‌بمه‌ میوان و ئه‌ویش

به‌خاوه‌ن ماڵ

باسی ژیان

هه‌ندێ جار ئه‌و

له‌سێبه‌ری گیانم ئه‌چێ

به‌ڵام نازانم من ڕه‌دوکه‌وتووی ئه‌وم

یاخو ئه‌وه‌ ، من ڕاوئه‌نێ

هه‌ندێ جاریش

له‌وه‌زیفه‌کانی سه‌رده‌می

مناڵیم ئه‌چێ

هه‌رچه‌نده‌ لێی حاڵی نابم

وه‌لێ ئه‌بێ بینووسمه‌وه‌و

له‌به‌ری که‌م

گه‌لێک جاریش

به‌ده‌سیه‌وه‌ ئه‌ناڵێم و

به‌ده‌ستمه‌وه‌ ئه‌ناڵێنێ

یان هه‌ست ئه‌که‌م هێنده‌ که‌مه‌

که‌ته‌نانه‌ت به‌شی پیاسه‌ی

ئێواره‌یه‌کی شه‌قامی عیشق نه‌کا

یان ئه‌وه‌نده دوورو درێژ

وه‌ک په‌پووله‌ پاییزه‌یه‌ک

گوێ ناده‌مێ

ئیتر له‌کوێوه‌ ئه‌مهێنێ و

بۆ کوێم ئه‌با

باسی عیشق

سڵاوت له‌تۆ

ئه‌ی تاکه‌ حه‌قیقه‌تی ڕه‌ها

ئه‌ی پرده‌ خه‌یاڵیه‌که‌ی نێوان

گوڵزاره‌کانی به‌هه‌شت و

گڕکانه‌کانی سه‌قه‌ر

ئه‌ی تاڵه‌مووه‌که‌ی نێوان

به‌یان و شه‌و

سڵاو له‌تۆ

ئه‌ی کانیه‌ سازگاره‌که‌ی

ئه‌م بیابانه‌ی

ئێمه‌ پێی ئه‌ڵێین جیهان

سڵاو له‌تۆ

ئه‌ی سنووری نێوان کۆشکی

ژیان و سه‌ردابی مردن

خۆ ئه‌گه‌ر تۆ نه‌بوویتایه‌

بێ شک وه‌کو یه‌ک بوون له‌لام

بۆن و به‌رامی هه‌ردووکیان