مەسعودی مەلا ھەمزە : دوای ئەوەی بە ژەنینی چەند پارچە میوزیکێک لە یەکەمین دیداری گوڵەمێخەک بەشداری کرد، شێوە کامیلی بەھرەمەند و ژەنیار میوانی شاری ھەولێر بوو، بە کۆنسێرتێک توانای خۆی نیشانی ئامادەبووان دا.
ئەم کۆنسێرتە کە لقی ھەولێری سەندیکای ھونەرمەندانی کوردستان بە ھاوکاری پەیمانگای ھونەرەجوانەکانی ھەولێر لەناو ھۆڵی بەشی میوزیک رێکیخستبوو، تێیدا چەند پارچە میوزیکێک نمایشکرا.
شێوەی بەھرەمەند دڵخۆشی خۆی دەربڕی بەوەی توانیویەتی تواناکانی خۆی بگەیەنێتە ھەولێر و لەشاری ھەولێر بە ژەنینی چەند پارچە میوزیکێکی ناوخۆیی و جیھانی بە ئامێری پیانۆ خۆی بناسێنی و چەند ساتێک ئامادەبووان بباتە ناو دنیای خەیاڵ و فەنتازیای میوزیک.
